Amierykanski mirny płan praduhledžvaje demilitaryzavanuju zonu na Danbasie i admovu Ukrainy ad ustupleńnia ŭ NATA

Pa słovach amierykanskich čynoŭnikaŭ, Donald Tramp nie imkniecca da kapitulacyi Ukrainy, ale, mahčyma, staŭ achviaraj rasijskaj infarmacyjnaj śpiecapieracyi.

Surazmoŭcy vydańnia śćviardžajuć, što hałoŭnaja ŭvaha Trampa ciapier zasiarodžanaja na pramiežkavych vybarach u Kanhres ZŠA, jakija projduć 3 listapada. Napiaredadni hałasavańnia apytańni pakazvajuć rekordna nizkija rejtynhi Respublikanskaj partyi i samoha prezidenta. Pavodle krynic The Economist, Tramp znachodzicca pad mocnym ciskam i bačyć va ŭkrainskim prezidencie Uładzimiry Zialenskim vinavataha ŭ prablemach, jakija ŭźnikli.

Amierykanskija čynoŭniki taksama krytykujuć śpiecpasłańnikaŭ Trampa Džareda Kušniera i Styva Uitkafa, jakija viaduć pieramovy z Maskvoj. Na ich dumku, pasłańniki niapravilna aceńvajuć matyvy prezidenta Rasii Uładzimira Pucina i tamu mohuć paddavacca rasijskim manipulacyjam. Na situacyju, pavodle surazmoŭcaŭ vydańnia, upłyvaje i Iłan Mask, čyjo staŭleńnie da Ukrainy jany nazyvajuć składanym.

U Biełym domie ličać, što Kijeŭ nie piarečyć suprać asnoŭnych pałažeńniaŭ novaha amierykanskaha płana. Akramia stvareńnia demilitaryzavanaj zony na Danbasie, jon praduhledžvaje źmiakčeńnie sankcyj suprać Rasii i šerah ekanamičnych damoŭlenaściaŭ, u tym liku adnaŭleńnie pastavak rasijskaha hazu ŭ Jeŭropu.

Uzamien Ukraina pavinna atrymać inviestycyjny pakiet i pierśpiektyvu členstva ŭ Jeŭrasajuzie, admoviŭšysia ad ustupleńnia ŭ NATA. Adnak u Kijevie sumniavajucca, što Maskva sapraŭdy hatovaja da miru, i miarkujuć, što rasijski bok moža zaciahvać pieramovy.

Amierykanskija čynoŭniki padkreślivajuć, što Tramp nie stavić za metu prymusić Ukrainu kapitulavać. Pry hetym jany pryznajuć, što adnosiny pamiž Vašynhtonam i Kijevam stanoviacca ŭsio bolš napružanymi.

Paśla damoŭlenaści z Pucinym ab pytańni pastavak dyzielnaha paliva 9 kastryčnika Tramp uzmacniŭ cisk na Ukrainu. Jon abvinavačvaŭ ukrainski bok u zaciahvańni vajny, zaklikaŭ spynić udary pa rasijskich naftapierapracoŭčych zavodach i navat prapanoŭvaŭ ukraincam vybrać novaha kiraŭnika dziaržavy.

Napružańnie ŭzmacniłasia i paśla taho, jak z 14 kastryčnika ŭkrainskija vajskoŭcy pačali sutykacca ź pierabojami ŭ pracy spadarožnikavaj suviazi Starlink. Iłan Mask i Bieły dom nie ŭziali na siabie adkaznaść za hetyja zboi.

20 kastryčnika śpiecpasłańniki Kušnier i Uitkaf uzhadnili ź Zialenskim u Osła asnoŭnyja detali novaha mirnaha płana, paśla čaho pavinny byli pieradać prapanovy ŭ Maskvu. 22 kastryčnika Tramp zajaviŭ, što ZŠA ŭpieršyniu za doŭhi čas nablizilisia da mirnaj damoŭlenaści pa Ukrainie.

• 2
• 1
• 1
• 2
• 1
• 0
• 2
• 0