«Časam jana vypadała z realnaści». Byłaja sukamiernica ŭdavy Zielcera raspaviała pra jaje šmat detalaŭ
Dziaŭčyna, jakaja siadzieła na Akreścina z Maryjaj Uśpienskaj, udavoj ajcišnika Andreja Zielcera, raskazała ŭ intervju «Biełsat» pra jaje zatrymańnie i žyćcio da turmy.
Hanna (imia źmieniena) kaža, što jany siadzieli ŭ dvuchmiesnaj kamiery, ale tam było 15 čałaviek. Sama Hanna trapiła ŭ tuju kamieru na treci dzień paśla zatrymańnia Maryi Uśpienskaj.
«Maša raskazvała, što pryvieźli jaje na Akreścina biez abutku. Bo jašče doma, kali pačali piłavać dźviery, jana była ŭ chałacie. Śpiecham nadzieła navierch štany i švedar, ale zastałasia biez majtkoŭ. Tolki na Akreścina adna z sukamiernic pazyčyła joj škarpetki i majtki. Spała Maša pad batarejaj», — raskazvaje byłaja palitźniavolenaja.
U kancy vieraśnia 2021 hoda ŭ Minsku było vielmi choładna, ale batareja ŭ kamiery da peŭnaha momantu hreła dobra. Jak paźniej raspaviała Maryja, nastupnym rankam pa jaje zatrymańni na Akreścina (tady ŭ kamiery byli tolki try asoby) pryjechali supracoŭniki KDB, adkryli kamieru i zahadali vynosić «na pradoł» usie rečy. Žančyny padumali, što budzie zvyčajny «šmon», vynieśli rečy na kalidor, u tym liku ŭsio ciopłaje adzieńnie (adzietyja byli lohka, bo kamiera była nacieplenaja). Ale «šmonu» nie adbyłosia — supracoŭniki KDB prosta začynili dźviery, maŭlaŭ, rečy zabieracie potym. Praź niekatory čas Maryja Uśpienskaja zaŭvažyła, što batareja pačynaje chaładnieć i pad viečar zusim «zhasła». I zrazumieła: ich «chočuć dabić choładam».
«Maryja raspaviadała, što, kab nie źmierznuć, jany nalivali haračuju vadu ŭ viadro i zasoŭvali pa adnoj nazie kožnaja. Paryli nohi, nadziavali škarpetki i ŭtraich, skruciŭšysia abarankam, spali», — havoryć Hanna.
Nastupnym dniom, jak raskazvała Maryja, siłaviki viarnulisia. Kali žančyny paskardzilisia, što ŭ kamiery vielmi choładna, adkazali: «A jamu nie choładna?..» Mieli na ŭvazie zabitaha kadebešnika Fiedasiuka.
«Heta ty, poskudź, jaho zabiła», — paŭtarali kolki razoŭ, źviartajučysia da Maryi Uśpienskaj. I začyniali dźviery.
Hanna ŭ kamiery šmat razmaŭlała z Maryjaj.
«Časam jana vypadała z realnaści i kazała: «A jak ža ja zaraz budu apłačvać rachunki za kvateru? Ja nie viedaju, jak heta robicca, 10 hadoŭ nie rabiła hetaha». Voś takija rečy. Byccam ničoha nie zdaryłasia — prosta muža nie stała. A potym u niejki momant viartałasia ŭ śviadomaść i pačynała dzika rydać.
Ale było ŭražańnie, što nie mahła apłakvać muža — apłakvała situacyju, jakaja zdaryłasia. Pačynała dumać pra dzicia, dzie jano i jak. Z taho, što ja pačuła, vynikaje, što Maša zaŭždy bieź piarečańniaŭ vykonvała zahady Andreja. I ŭ toj dzień, kali jon skazaŭ «stoj i zdymaj», jana tak i zrabiła…» — raskazvaje Hanna.
Zaŭvažaje, što kali Maryja paznajomiłasia z Andrejem, to była jahonaju kiraŭnicaju — zajmała pasadu načalnika ekanamičnaha adździeła firmy, kudy ŭładkavaŭsia pracavać maładziejšy za jaje na 10 hadoŭ Zielcer. Maryja ŭžo razvodziłasia tady ź pieršym mužam. Kali syšłasia z Andrejem Zielceram, zvolniłasia ź firmy i nidzie nie pracavała až da 2020 hoda. Jak raskazvała Hańnie, jaje «dekret płaŭna pieraros u chatniuju haspadarku».
U 2020 hodzie ŭ žančyny zdaryŭsia hłyboki kryzis asoby, jaki pieraros u surjoznuju depresiju. Adbyłosia heta jašče da vybaraŭ i da palityki mieła chiba ŭskosnaje dačynieńnie (ahulnaja atmaśfiera ŭ krainie ŭpłyvała na kožnaha).
Maryja źviarnułasia pa dapamohu da psichaterapieŭta, prymała davoli mocnyja antydepresanty. Potym psichołah paraiŭ joj uładkavacca na jakuju-niebudź prostuju pracu. Pajšła pracavać pradavačkaj u «Miłu». Jak raskazvała Hańnie, tam joj padabałasia. Ale antydepresanty prymała až da vosieni 2021-ha.
«Jana nazyvała preparaty, ale ja nie stanu ahučvać. Vielmi surjoznyja. Za adzin momant z takich preparataŭ nie saskočyš. Jana pavoli źnižała dozu. I, jak kazała, tolki za paru tydniaŭ da taho, jak zdaryŭsia incydent sa stralaninaju, pierastała ich užyvać. Nie adnaviłasia jašče, a tut takoje. I ja dumaju, toje, što jaje pryznali ŭ Navinkach nieśviadomaj, adpaviadaje praŭdzie», — miarkuje byłaja palitźniavolenaja.
Pakul Hannu nie etapavali na Vaładarskaha, jana prabyła pobač z Maryjaj Uśpienskaj na Akreścina siem dzion.
Uśpienskuju abvinavacili ŭ saŭdziele ŭ zabojstvie supracoŭnika KDB Dźmitryja Fiedasiuka, ale sudzili jak «asobu, jakaja ŭčyniła hramadska niebiaśpiečnaje dziejańnie ŭ stanie nieśviadomaści». 16 červienia 2022 hoda sud pryznačyŭ joj prymusovaje lačeńnie ŭ psichijatryčnym stacyjanary «da vyzdaraŭleńnia» (termin sudom nie vyznačajecca).
Ciapier čytajuć
Jak vyhladaje znutry rezidencyja Łukašenki «Krasnasielskaje»13
Kamientary