Polšča prapanoŭvała Biełarusi spynić represii, ale pieramovy nie prynieśli vynikaŭ — MZS Polščy
Polšča prapanoŭvała biełaruskim uładam spynić represii ŭ abmien na «prastoru dla palityčnaha i ekanamičnaha manieŭru», ale pieramovy nie prynieśli vynikaŭ. Kali represii ŭ krainie buduć praciahvacca, Varšava budzie damahacca pašyreńnia sankcyj suprać režymu, zajaviŭ ministr zamiežnych spraŭ Polščy Źbihnieŭ Rau, vystupajučy ŭ Siejmie 13 krasavika, piša reform.by.
«Našaj doŭhaterminovaj metaj zjaŭlajecca demakratyčnaja, svabodnaja i niezaležnaja Biełaruś», — zajaviŭ Rau. Jon padkreśliŭ, što Polšča nie budzie ŭ biaśpiecy, pakul jaje susiedzi nie buduć suvierennymi, zdolnymi vyznačać svoj napramak raźvićcia demakratyčnym šlacham.
«Niama sumnievu, što miesca biełarusaŭ — u ahulnym jeŭrapiejskim domie», — adznačyŭ Rau i dadaŭ, što Polšča budzie paśladoŭna damahacca jeŭrapiejskaj budučyni dla biełarusaŭ, dajučy časovy prytułak usim, chto nie moža adčuvać siabie ŭ biaśpiecy ŭ Biełarusi za palityčnyja pierakanańni.
Rau zajaviŭ, što Polšča ličyć Biełaruś poŭnaściu zaležnaj ad Rasijskaj Fiederacyi.
«Siońnia my ličym Biełaruś krainaj, całkam zaležnaj ad ahresiŭnaj Rasii, jakaja kirujecca pazbaŭlenym usialakaj demakratyčnaj i sacyjalnaj lehitymnaści režymam, jaki pieratvaryŭ radzimu biełarusaŭ u vialikuju turmu i daje svaju terytoryju Rasii dla praviadzieńnia napadu na Ukrainu», — ličyć ministr zamiežnych spraŭ Polščy.
Pa słovach Rau, Polšča prapanoŭvała biełaruskim uładam spynić represii, ale pieramovy nie dali vynikaŭ.
«Niejki čas tamu my nakiravali ŭładam Biełarusi prapanovu, nakiravanuju na pavieličeńnie prastory dla palityčnaha manieŭru i taksama ekanamičnaha manieŭru ŭ abmien na spynieńnie represij i pieraśledaŭ. Na žal, hetyja pieramovy nie prynieśli zdavalniajučaha vyniku», — zajaviŭ Rau.
Jon adznačyŭ, što biełaruskija ŭłady praciahvajuć represii suprać ułasnych hramadzian i praciahvajuć pravodzić varožuju palityku ŭ adnosinach da Polščy.
«Adnym z elemientaŭ zjaŭlajecca spravakavany režymam Łukašenki pamiežny kryzis. Takaja palityka budzie mieć nastupstvy dla našych adnosinaŭ», — papiaredziŭ kiraŭnik polskaha MZS.
Rau adznačyŭ, što palityka Polščy źmienicca paśla demakratyčnych pieramien u Biełarusi, jakija taksama dazvolać krainie ŭdzielničać u inicyjatyvie «Uschodniaje partniorstva».
«Tamu Polšča padtrymlivaje i budzie padtrymlivać biełaruskaje niezaležnaje asiarodździe, u tym liku ŚMI, biełaruskich uciekačoŭ, studentaŭ i pradprymalnikaŭ», — zajaviŭ Rau. Jon dadaŭ, što Polšča budzie damahacca vyzvaleńnia palitviaźniaŭ, u tym liku Andreja Pačobuta.
Pa słovach Rau, kali biełaruskija ŭłady buduć admaŭlacca vyzvalić Pačobuta, buduć praciahvać represii suprać ułasnych hramadzian, pravakavać ataki mihrantaŭ na miažy, Polšča budzie damahacca ŭ ES uviadzieńnia dadatkovych sankcyj, a taksama vykarystoŭvać «poŭny kompleks represij, jakija znachodziacca ŭ rasparadžeńni Polščy».
Čytajcie taksama:
«Miniruje ŭsiu Jeŭropu». MZS Biełarusi vystupiła z antypolskim kamientarom
Polšča damahłasia vyzvaleńnia bolš za 10 palitviaźniaŭ u Biełarusi — pradstaŭnik MZS
MZS Polščy vitała vyzvaleńnie Anžaliki Borys i nazvała vyzvaleńnie Pačobuta pryjarytetam
Ciapier čytajuć
Zahinuŭ biełaruski dobraachvotnik Vasil «Dzir» Rapicki2
Kamientary