Łatuška pieradaść infarmacyju pra Mielnikavu polskaj prakuratury
Na jahonuju dumku, ciapier «Kibierpartyzany» i ŭładalniki fondu Białoruś Liberty, ź jakoha Mielnikava vyvieła hrošy, majuć padstavy, kab padać na jaje ŭ polski sud.
Kiraŭnik NAU Pavieł Łatuška paviedamić novyja źviestki pra byłuju śpikierku Kaardynacyjnaj rady Anžaliku Mielnikavu Nacyjanalnaj prakuratury Polščy. Pra heta jon paviedamiŭ u razmovie z «Biełsatam».
Učora stała viadoma, što Mielnikava z dvuma dziećmi žyvie ŭ Minsku ŭ kvatery na vulicy Piatra Mścisłaŭca, a taksama toje, što ŭ 2022 hodzie jana pryjazdžała z Polščy ŭ Biełaruś, a jaje muž viarnuŭsia ŭ Polšču.
Pavieł Łatuška ŭ adkaz na pytańnie «Biełsatu», ci źmianiłasia z novymi źviestkami jahonaja acenka historyi z Anžalikaj Mielnikavaj, adznačyŭ, što infarmacyja, jakuju pradstaviła inicyjatyva «Kibierpartyzany», važnaja, ale nie daje adkazu na šerah važnych pytańniaŭ: kali Anžalika Mielnikava pajšła na supracu sa śpiecsłužbami režymu, było heta prymusam, šantažom albo dobraachvotnaj supracaj, pry jakich abstavinach heta adbyłosia.
Na jahonuju dumku, ciapier «Kibierpartyzany» i ŭładalniki fondu Białoruś Liberty, ź jakoha Mielnikava vyvieła hrošy, majuć padstavy, kab padać na jaje ŭ polski sud.
«Dumaju, što hetaja infarmacyja budzie taksama važnaj i dla ŭładaŭ Polščy, bo Anžalika Mielnikava jość i hramadziankaj Polščy. U svaju čarhu, jak zajaŭnik pa fakcie źniknieńnia Anžaliki Mielnikavaj, ja taksama nakiruju hety artykuł [«Kibierpartyzanaŭ» pra toje, što Mielnikava žyvie ŭ Biełarusi i maje pašpart prykryćcia] na adras Nacyjanalnaj prakuratury Polščy, departamient u Łodzi, jaki viadzie rasśledavańnie pa fakcie źniknieńnia Anžaliki Mielnikavaj», — adznačyŭ Pavieł Łatuška.
Z punktu hledžańnia biaśpieki supraca sa śpiecsłužbami, na što pakazvaje najaŭnaść pašparta na imia Anhieliny Radzivonavaj, na čalcach Kaardynacyjnaj rady nie mocna adabjecca, miarkuje surazmoŭca.
«Kali my havorym pra pracu Kaardynacyjnaj rady, to možna jašče raz paŭtaryć, što Kaardynacyjnaja rada jość publičnaj, absalutna adkrytaj arhanizacyjaj i ŭsie delehaty viadomyja», — skazaŭ jon.
Adnak Mielnikava pracavała i ŭ NAU, dzie častka kamandy ananimnaja.
«Biezumoŭna, šerah ludziej u našaj kamandzie jość niepubličnymi, ale my ŭśviedamlali: kali Anžalika Mielnikava apynułasia pad kantrolem śpiecsłužbaŭ, to heta infarmacyja ŭžo daŭno jość u ich rasparadžeńni. Heta ryzyki našaj pracy. I pry acenkach davajcie zychodzić najpierš z taho, što suprać nas idzie abvieščanaja sistemaj śpiecsłužbaŭ adkrytaja vajna. Nie adnoj, a ŭsich śpiecsłužbaŭ režymu Łukašenki. I heta jość pieršapryčynaj takich situacyj», — dadaŭ Pavieł Łatuška.
***
Byłaja śpikierka Kaardynacyjnaj rady Anžalika Mielnikava źnikła ŭ sakaviku 2025 hoda.
Apošni raz jaje bačyli na Šry-Łancy, kudy ŭ toj ža čas pryjazdžaŭ Alaksiej Łabiejeŭ — 32‑hadovy mužčyna, ź jakim u Mielnikavaj byli adnosiny i jaki, jak vyśvietlili žurnalisty, pracuje va Upraŭleńni vajskovaj kontrvyviedki KDB.
Paśla jaje źniknieńnia ŭ Polščy zaviali kryminalnuju spravu, ale što adbyłosia z Anžalikaj, dahetul niezrazumieła.
Praz hod u sacsietkach źjavilisia jaje fatahrafii ź minskaj spartzały, a baćka pryznaŭsia «Našaj Nivie», što jana ŭžo «daŭnieńka» ŭ Biełarusi. Inšyja bačyli jaje ŭ «Dana Mole». «Lusterka» vyśvietliła, što ŭžo paśla źniknieńnia Mielnikava nabyła dźvie kvatery ŭ Minsku. Z treciaj jaje kvatery byŭ źniaty aryšt i aformleny padzieł majomaści z byłym mužam.
Ciapier čytajuć
Minčanka Anhielina, jakaja prasiła ŭ Łukašenki kvateru za trojniu, atrymała žyllo26
Minčanka Anhielina, jakaja prasiła ŭ Łukašenki kvateru za trojniu, atrymała žyllo
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii22
Kamientary
A jość praca Mielnikavaj na kdb vynikam prymusu, šantažu ci dabraachvotnaści, pa sutnaści, drobiazi, jakija ŭžo anijak nie paŭpłyvajuć na stan rečaŭ.
Dziŭna, što Łatuška kštałtu pra heta nia viedaŭ i zusim nia moh pradbačyć taki varyjant... Heta nie aznačaje, što Mielnikavu tre było aŭtamatyčna nie nabližać da dziejnaści arhanizacyi na harmatny streł, ale, jak minimum, nie davać joj pasady, na jakoj jana nabyvała vialikuju painfarmavanaść, i chacia b časova niejk manitoryć aktyŭnaść i ruchi. Jak tak mahło adbycca, što ŭ Łatuški nia viedali pra jaje vizyty ŭ Biełaruś, dy ich mety, paśla 2022 ? Duža niesurjozna.
Adnak polskija adpaviednyja słužby pavinny byli viedać, i viedali. I tut jość pytańni...