U Minsk zapuskajuć avijarejs ź Irana pa dzikich cenach. Ale nie ŭsio tak strašna, kali siačy ŭ niuansach
Zaŭtra paśla doŭhaha pierapynku ź iranskaj stalicy Tehierana ŭ Minsk pačynajuć lotać samaloty. Praŭda, ceny na kvitki mohuć zdacca, miakka kažučy, dziŭnymi: ad 3500 dalaraŭ u adzin kaniec u ekanom-kłasie da 10000 dalaraŭ tudy-nazad u «biznesie». Jak heta naohuł mahčyma, chto ž za takija hrošy palacić? Niuansy tłumačyć vydańnie Blizko.by.
Pradstaŭniki Ministerstva transpartu abiacali, što z 26 sakavika pačnucca paloty iranskaj avijakampanii Mahan Air u Tehieran. Jašče ŭ listapadzie 2022-ha Departamient pa avijacyi vydaŭ pieravozčyku akredytacyju, ale pakul ni ŭ siezonnym raskładzie minskaha aeraporta, ni ŭ sistemie braniravańnia samoj kampanii hety rejs nie źjaŭlaŭsia. I voś ciapier raptam u raskładzie aeraporta Minsk značycca rejs hetaj samaj Mahan Air, a na sajcie pieravozčyka možna kupić kvitki.
Heta budzie pieršy za apošnija amal šeść hadoŭ rejs u Iran. Raniej «Biełavija» ŭžo vykonvała paloty ź Minska ŭ Tehieran z 4 žniŭnia 2010 hoda da 28 kastryčnika 2017-ha. Ale tady Minsk niadrenna spraŭlaŭsia z chabavaj madellu pieravozak, dajučy mahčymaść pasažyram ź Irana dalej pierasadžvacca na dziasiatki rejsaŭ u Jeŭropu. Ciapier ź Minska na zachad šlach zakryty.
Što za dzikaja cana kvitkoŭ?
Hladzim u sistemu braniravańnia. Kvitok u adzin kaniec kaštuje 146 597 000 iranskich ryałaŭ u ekanom-kłasie i 268 957 000 ryałaŭ u biznes-kłasie. Kvitki tudy-nazad abyducca ŭ 240 607 000 ryałaŭ u «ekanomie» i 430 327 000 u «biznesie».
Kolki heta ŭ zvykłych nam adzinkach? Ciapier aficyjny kurs taki: 1 ryał kaštuje 0,00002368 dalara. Inšymi słovami, za 1 dalar možna atrymać prykładna 42230 ryałaŭ. Takim čynam, pavodle aficyjnaha kursu atrymlivajecca, što kvitki ŭ adzin bok u ekanom-kłasie i biznes-kłasie kaštujuć 3471 i 6369 dalaraŭ adpaviedna, a tudy-nazad — 5698 i 10190 dalaraŭ adpaviedna.
Dziesiać tysiač dalaraŭ za 5-hadzinny palot? Heta što, pryvatny biznes-džet? Nie, nie biznes-džet, a asablivaści kursu iranskaj valuty.
Z-za devalvacyi i inflacyi ŭ Iranie dziejničajuć niekalki kursaŭ valuty: umoŭna ich možna nazvać «bieły», «čorny» i «šery».
«Bieły», aficyjny kurs, — heta tyja samyja prykładna 42 tysiačy ryałaŭ za dalar. Jaho vykarystoŭvajuć iranskija kampanii, jakija impartujuć žyćciova važnyja tavary — leki, pšanicu, miasa.
Kurs NIMA — jaho možna ŭmoŭna nazvać «šerym» — vykarystoŭvajecca eksparciorami, kab uvieści ŭ iranskuju ekanomiku valutu, atrymanuju ad handlu z zamiežžam. Kurs NIMA ciapier składaje prykładna 382 000 ryałaŭ za dalar. Jość jašče kurs SANA, jaho taksama možna nazvać «šerym», — jon ustalavany dla abmieńnikaŭ. Pa hetym kursie dalar kaštuje prykładna 420 000 ryałaŭ.
Narešcie, «čorny» kurs — kurs na čornym rynku — najbolš nabližany da realnaści: kala 515-520 tysiač ryałaŭ za dalar. Na hetym sajcie možna adsočvać realnyja (heta značyć, «čornyja») kursy valut u Iranie — tyja kursy, pa jakich možna budzie kupić valutu. Źviarnicie ŭvahu na toje, što vykarystoŭvajecca termin «taman» — heta 10 ryałaŭ.
Tak, siońnia dalar pradajuć za 51750 tamanaŭ — abo 517500 ryałaŭ. A ciapier pieravodzim ceny kvitkoŭ pa realnym kursie i atrymlivajem:
U adzin bok: 283 dalary ŭ ekanom-kłasie i 520 dalaraŭ u biznes-kłasie;
Tudy-nazad: 465 dalaraŭ u ekanom-kłasie i 832 dalary ŭ biznes-kłasie.
Takim čynam, ničoha zvyšnaturalnaha, jak akazvajecca, u hetych cenach niama.
Dźmitryj Łukašenka choča pastavić pad kantrol usie mabilnyja telefony11
Kamientary