Novaja akumulatarnaja technałohija moža zrabić elektrasamaloty realnaściu

Elektramabili ŭžo nastolki stali častkaj paŭsiadzionnaści, što latajučyja elektryčnyja mašyny ŭžo nie vyhladajuć niečym nierealnym.

Kitajski vytvorca akumulataraŭ CATL (Contemporary Amperex Technology Co. Limited) na aŭtašou ŭ Šanchai vypuściŭ akumulatar, jaki, jak śćviardžajecca, moža siłkavać elektryčnyja pasažyrskija samaloty. Paŭćvierdacielny akumulatar z kandensavanym elektralitam moža zachoŭvać 500 Vt-hadzin enierhii na kožny kiłahram svajoj vahi.

Kampanija zajaŭlaje, što moža dasiahnuć masavaj vytvorčaści kandensavanaj batarei za karotki pramiežak času i raźličvaje pačać masavuju vytvorčaść aŭtamabilnaha varyjanta pry kancy hoda. Dadatkova CATL zajaŭlaje, što pracuje ź nienazvanymi partniorami nad raspracoŭkaj latajučych elektramabilaŭ.

Akramia taho, u kampanii kažuć, što pracujuć nad palapšeńniem vuhlarodnaha śledu svaich akumulataraŭ i płanujuć dasiahnuć vuhlarodnaj niejtralnaści dla svaich vytvorčych pradpryjemstvaŭ da 2025 hoda, a va ŭsim vytvorča-zbytavym łancužku — da 2035-ha.

Kampanija raspłyvista, ale ambicyjna zajaŭlaje, što zapusk kandensavanych akumulataraŭ adkryje eru ŭsieahulnaj elektryfikacyi marskoha, naziemnaha i pavietranaha transpartu, adkryje bolš mahčymaściaŭ dla raźvićcia haliny i paspryjaje dasiahnieńniu hłabalnych met vuhlarodnaj niejtralnaści ŭ bolš rannija terminy.

U hety ž čas inšyja surjoznyja hulcy pracujuć nad padobnymi technałohijami. Tak, NASA uvieś čas vypraboŭvaje elektryčnyja samaloty na praciahu apošniaha dziesiacihodździa, Rolls-Royce taksama pravodzić vyprabavańni svajho poŭnaściu elektryčnaha samalota, a inšyja pracujuć nad hibrydnymi samalotami, takimi, jak, naprykład, vadarodna-elektryčny samalot ZeroAvia, jaki ździejśniŭ 10-chvilinny palot u hetym studzieni.

Tym nie mienš, varta źmiakčyć našy čakańni adnosna latučych elektramabilaŭ, raić Engaget. Peŭny ruch u hetym kirunku moža dapamahčy skaracić vykidy parnikovych hazaŭ ad avijacyjnaj pramysłovaści, na dolu jakoj prypadaje kala troch adsotkaŭ suśvietnych vykidaŭ. Ale dla taho, kab jany stali žyćciazdolnaj alternatyvaj sučasnym samalotam, jakija pracujuć na reaktyŭnym palivie, spatrebiacca bolš značnyja dasiahnieńni, čym novaja batareja CATL.

Takim čynam, choć my, musić, i zmožam ubačyć, jak niekatoryja kamiercyjnyja elektryčnyja samaloty padnimucca ŭ nieba ciaham nastupnaha dziesiacihodździa, nie varta čakać, što ŭ chutkim časie akumulatary zmohuć siłkavać niešta bolšaje za nievialikija samaloty na karotkija adlehłaści.

• 31
• 0
• 2
• 0
• 2
• 2
• 2
• 0