Jeŭrapiejskija pieravozčyki hublajuć cikavaść da zapraŭki ŭ Biełarusi. Čamu?
Apošnim časam jeŭrapiejskija pieravozčyki, vymušanyja zapraŭlacca tolki na adviedzienych dla ich AZS, usio čaściej admaŭlajucca ad zapraŭki ŭ Biełarusi na karyść polskich i litoŭskich AZS. Pacikavilisia ŭ pieravozčykaŭ, čamu tak adbyvajecca.
Paliva tańnieje, ale nie dla ŭsich
Pačynajučy z 7 sakavika ŭ Biełarusi raz na tydzień na adnu kapiejku tańnieje paliva. Bienziny roznych hatunkaŭ i zvyčajny dyziel za hety pieryjad zhubili ŭ canie pa 8 kapiejek. Niaźmiennaj zastajecca tolki cana na DT-Ł-K5 ECO — śpiecyjalny hatunak dyziela, jaki pryznačany dla zapraŭki hruzavikoŭ na jeŭrapiejskaj rehistracyi. Litr takoha paliva kaštuje 3 rubli 58 kapiejek.
U pieravodzie na jeŭra atrymlivajecca, što litr dyziela dla jeŭrapiejskich pieravozčykaŭ kaštuje kala 1,14 jeŭra, što ŭsiaho na 16 jeŭracentaŭ tańniej, čym ciapier kaštuje salarka ŭ Polščy abo Litvie. Nastolki nievialikaja roźnica stała mahčymaja dziakujučy tamu, što apošnim časam u jeŭrapiejskich krainach značna źmienšylisia ceny na paliva.
Tolki za apošni tydzień paliva ŭ Jeŭropie patańnieła na 5—6 jeŭracentaŭ. Kali na piku litr salarki ŭ Polščy i Litvie kaštavaŭ kala 2 jeŭra, to ciapier ceny na dyziel tam pačynajucca z 1,29 jeŭra za litr.
Vyhadniej zapraŭlacca ŭ krainie rehistracyi
Jak tłumačać pieravozčyki, pry nastolki nieistotnaj roźnicy ŭ cenach im vyhadniej zapraŭlacca ŭ Jeŭropie. Tłumačycca heta tym, što kali, naprykład, polskaja firma nabyvaje paliva ŭ Polščy, a litoŭskaja ŭ Litvie, to jany majuć mahčymaść zaličvać vydatkavanyja na zapraŭku PDV (21% u Litvie i 23% u Polščy). Pry kupli paliva ŭ Biełarusi hrošy, vydatkavanyja na PDV, taksama možna brać u zalik, ale adbudziecca heta tolki praz 6—12 miesiacaŭ.
«Praz najaŭnaść u palivie PDV firmam zručniej za ŭsio nabyvać paliva ŭ krainach rehistracyi, bo tady PDV zaličvajecca najchutčej (ad 25 sutak). Navat pry zapraŭcy ŭ miežach ES termin moža pavialičvacca na 3—6 miesiacaŭ. A kali brać Biełaruś, to heta budzie jašče značna daŭžej. Tamu, majučy roźnicu ŭ cenach na paliva 10—20 centaŭ, niama nijakaha sensu kuplać jaho ŭ Biełarusi», — tłumačyć pieravozčyk.
Mužčyna kaža, što jon i jaho kalehi ŭ Biełarusi zapraŭlajucca tolki tady, kali bačać, što im nie chopić paliva, kab pastajać u čarzie i viarnucca damoŭ.
Što budzie, kali jeŭrapiejec zapravić hruzavik zvyčajnym palivam?
Viadomy šerah vypadkaŭ, kali kiroŭcam hruzavikoŭ ź jeŭrapiejskaj rehistracyjaj, jakija zapraŭlalisia zvyčajnym palivam, vynosili pastanovy ab administracyjnym pravaparušeńni pa artykule 24.3 KaAP (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni joj słužbovych paŭnamoctvaŭ). Sud štrafavaŭ ich na 50 bazavych vieličyniaŭ.
Paralelna z hetym kancern «Biełnaftachim» abaviazaŭ apierataraŭ AZS, dzie dyzpaliva pradajecca pa zvyčajnaj canie, paviedamlać na mytniu, kali takim palivam zapraŭlajucca fury ź ES.
«Naša Niva» — bastyjon biełaruščyny
PADTRYMAĆ«Zialonaja karta» chutka ŭsio. Jak buduć afarmlacca strachavyja polisy na aŭto dla vyjezdu za miažu?
Ciapier čytajuć
Pamierła 39-hadovaja eks-palitźniavolenaja Hanna Kandracienka. U kałonii ŭ jaje znajšli rak, ale nie vyzvalili27
Kamientary
Ničoha asabistaha — tolki biźnies.