Kiroŭcaŭ jeŭrasajuznych furaŭ sudziać za zapraŭku ŭ Biełarusi nie tym palivam

U mai 2022 hoda ŭ ramkach «kontrsankcyj» biełaruskija ŭłady abaviazali kiroŭcaŭ hruzavych aŭtamabilaŭ na numarach krain Jeŭrasajuza zapraŭlacca tolki na peŭnych AZS, dzie ŭstanoŭlenaja pavyšanaja cana na kankretny vid dyzielnaha paliva.

Na toj momant (19 maja 2022 hoda) kiroŭcam furaŭ na jeŭrapiejskich numarach prapanoŭvaŭsia śpiecyjalny vid dyzpaliva (DT-Ł-K5 ECO) pa «śpiecyjalnaj» canie — 3,58 rubla za litr.

Nijakich inšych alternatyŭ dla pieravozčykaŭ ź ES nie było, choć fury na biełaruskich numarach mahli tady zapravicca značna tańniej (litr salarki kaštavaŭ 2,34 rubla).

Pry hetym kancern «Biełnaftachim» razasłaŭ na AZS, dzie dyzpaliva pradajecca pa zvyčajnych cenach, pamiatku dla apierataraŭ. Zhodna z hetaj instrukcyjaj, rabotniki zapravak pavinny byli adsočvać numary fur, jakija pryjechali pa paliva. Kali heta hruzavik ź ES, to na praciahu paŭhadziny apieratary AZS pavinny paviedamić pra fakt zapraŭki ŭ mytniu. Na padstavie hetych danosaŭ mytniki składali pratakoły ab administracyjnym parušeńni.

Ciapier hety praces nabyŭ maštabny charaktar: viadoma, što tolki za śniežań 2022 hoda sudy ŭ Breście pakarali niekalkich kiroŭcaŭ fur ź jeŭrapiejskimi numarami.

U dačynieńni da ich byli vyniesienyja pastanovy ab administracyjnym pravaparušeńni pa artykule 24.3 KaAP (niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni joj słužbovych paŭnamoctvaŭ).

Va ŭsich vypadkach rašeńni sudoŭ byli jak pad kapirku — pryznańnie dalnabojščykaŭ vinavatymi i štraf u pamiery 50 bazavych vieličyń (1600 rubloŭ na kaniec 2022 hoda).

Cikava, što nivodzin z kiroŭcaŭ na sudovaje pasiadžeńnie nie źjaviŭsia. U bolšaści vypadkaŭ na kanfiskavanyja ŭ ich hrošy na sumu štrafu nakładali aryšt: ich pradpisvałasia zabrać u košt vypłaty spahnańnia ŭ vypadku nievykanańnia pastanovy.

Jak praviła, heta tyčyłasia hramadzian Biełarusi i Polščy, jakija byli za rulom fur na jeŭrapiejskich numarach i zajechali na terytoryju našaj krainy dla pieračepki.

Usie jany abvinavačvalisia ŭ adnym i tym ža: zapravilisia na AZS, nie ŭklučanych u peŭny pieralik dla pieravozčykaŭ ź ES, nabyli paliva pa zvyčajnaj canie (a nie zavyšanaj), čym parušyli pastanovu Savieta Ministraŭ № 247 «Ab pieramiaščeńni transpartnych srodkaŭ».

Z 16 krasavika 2022 hoda Biełaruś uviała «kontrsankcyi» suprać aŭtapieravozčykaŭ ź Jeŭrasajuza. Ciapier jany mohuć ujazdžać u našu krainu tolki dla dastaŭki hruzaŭ u śpiecyjalnyja transpartna-łahistyčnyja centry dla pieračepki (dalej hruz mohuć dastaŭlać biełaruskija pieravozčyki).

Pry hetym jeŭrapiejskija hruzaviki mohuć ujechać u Biełaruś tolki praz peŭnyja punkty propusku. Mienavita kala hetych pahranpierachodaŭ i raźmieščany AZS, dzie pradajuć śpiecyjalnaje dyzpaliva DT-Ł-K5 ECO, jakim pavinny zapraŭlacca fury na zachodnich numarach. 

Naprykład, u Bresckaj vobłaści jaho možna nabyć na dźviuch zapraŭkach, jakija znachodziacca la punkta propusku «Kazłovičy».

• 3
• 0
• 6
• 41
• 2
• 4
• 21
• 0