Google ŭdaskanalvaje svoj dadatak Google Lens — prahramu, jakaja šukaje infarmacyju pa fota.
Ciapier Lens moža vyjaŭlać roznyja anamalii i zachvorvańni skury, naprykład, radzimki ci vysypku. Paśla taho, jak vy zrobicie fota ci zapampujecie jaho ŭ Lens, dadatak pačnie pošuk u siecivie pa vizualnych supadzieńniach, što taksama budzie pracavać dla inšych zachvorvańniaŭ, kali vy nie viedajecie, jak apisać ich słovami (naprykład, puchir na hubie, linija na paznohciach abo vypadzieńnie vałasoŭ).
Darečy, u 2021 hodzie Google zapuściŭ asobnuju prahramu na asnovie ŠI dla dyjahnostyki stanu skury, vałasoŭ i paznohciaŭ — DermAssist. Hety dadatak, jaki ŭpieršyniu debiutavaŭ u ES, sutyknuŭsia z barjerami dla ŭvachodu ŭ ZŠA, dzie jon pavinien byŭ być uchvaleny Upraŭleńniem kantrolu za praduktami i lekami (Google prosta admoviŭsia zapytać adabreńnie).
Novaja funkcyja Lens moža być karysnaja ludziam, jakija vyrašajuć, ci źviartacca pa miedyčnuju dapamohu, adznačaje TechCrunch.
Da taho ž było abvieščana, što Lens intehrujecca z Bard — čat-botam Google na bazie ŠI. Karystalniki zmohuć uklučać vyjavy ŭ padkazki Bard, a Lens budzie pracavać «za kadram», kab dapamahčy Bard zrazumieć, što mienavita pakazvajecca. Google inviestuje ŭsio bolš resursaŭ u hienieratyŭnyja technałohii štučnaha intelektu kštałtu Bard, jaki ŭjaŭlaje saboj adkaz Google na ChatGPT.
Naprykład, tolki niadaŭna Google pradstaviŭ mahčymaść, jakaja dazvalaje Bard pisać, vykonvać i testavać ułasny kod u fonavym režymie, palapšajučy jaho zdolnaść prahramavać i rašać składanyja matematyčnyja zadačy.
Ciapier čytajuć
Čaćviortuju liniju minskaha mietro paviaduć u Dražniu. A «Ślapianka» i «Daŭhabrodskaja» źmianili svajo miesca3
Kamientary