Dzieviać idej dla zachaplalnych ci karysnych vychadnych. Jak pravieści adpačynak, nie hublajučy šmat hrošaj

1. Zajmiciesia płanavańniem abo składzicie śpis met

Žadajecie ŭparadkavać žyćcio abo pryvieści dumki ŭ paradak — tady płanavańnie jakraz toje, što vam patrebna. Voś niekalki parad, jakija dapamohuć nie tolki vyznačycca z metami, ale i pačać ruchacca da vyniku.

• Farmulujcie mety tak, kab u skazie fihuravała kankretnaje dziejańnie. Naprykład, nie «schudnieć na piać kiłahramaŭ», a «na miesiac vyklučyć z racyjonu mučnyja pradukty»; nie «pačać vučyć zamiežnuju movu», a «inviestavać 15 chvilin svajho času na vyvučeńnie movy štodnia». Čym bolš kankretnym budzie apisańnie pracesu, tym z bolšaj imaviernaściu vy dasiahniacie pośpiechu.
• Štodnia adsočvajcie svoj prahres. Zaviadzicie dziońnik abo prahramu-trekier i adznačajcie tam svaju pracu. Nie zabyvajciesia dziakavać sabie za dasiahnienni.
• Adkarektujcie padychod praź niejki čas, kali niama vyniku. Samaraźvićcio pavinna prynosić zadavalnieńnie, tamu, kali vam składana tracić hadzinu ŭ dzień na treniroŭki, skaracicie ich da 10 chvilin, ale rabicie praktykavańni jakasna i z poŭnaj addačaj.

2. Atrymajcie navyk, ab jakim daŭno maryli

Navučyciesia pakazvać fokusy, asvojcie niekalki akordaŭ na hitary, vyvučycie mastactva aryhami abo zapišycie i apublikujcie padkast. Biaspłatnyja navučalnyja roliki možna znajści na Youtube — hałoŭnaje, kab padčas pošuku patrebnaj infarmacyi nie zavisnuć nad videa z kocikami.

3. Schadzicie ŭ biaspłatny muziej

Va ŭniviersitetach, škołach ci na vialikich pradpryjemstvach časta pracujuć viedamasnyja muziei. Uvachod u ich zvyčajna biaspłatny, a ekspanaty i ekskursii byvajuć vielmi cikavymi. Taki pachod — vydatnaja mahčymaść atrymać novyja viedy abo adkryć zvykłyja rečy ź inšaha boku.

Rekamiendujem naviedać, naprykład: školnyja muziei ŭ Halšanach i Miorach, apteku-muziej u Hrodnie i hancavicki muziej baraćby z ałkahalizmam «AntyBachus».

Pavialičyć

4. Stvarycie kapsułu času

Znajdzicie nievialikuju skrynku abo šklanuju butelku i napoŭnicie jaje «skarbam». U jakaści artefaktaŭ padyduć staronki časopisaŭ ź cikavaj dla vas infarmacyjaj, maniety, znački abo aksiesuary, jakija vyjšli z mody, fatahrafii i list z pažadańniem dla ludziej z budučyni, jakija znojduć vaša pasłańnie. Pakładzicie skrynku ŭ pakiet abo abmatajcie skotčam — tak vašy kaštoŭnaści zachavajucca na šmat hadoŭ. Zakapajcie skrynku ŭ parku ci na svaim prysiadzibnym učastku.

5. Pahartajcie fatahrafii i siamiejnyja archivy

Prahartajcie staryja fotaalbomy, školnyja sšytki abo dziciačyja malunki. Usio, što doraha vašamu sercu, zachavajcie ci aličbujcie. Taki zaniatak moža spadabacca ŭsioj siamji, a pryjemnyja ŭspaminy sapraŭdy padnimuć nastroj.

Pavialičyć

6. Adkryjcie śviet hulniaŭ z dapoŭnienaj realnaściu

Usio, što treba dla hetaha, — vaš smartfon dy dostup u internet. Darečy, akramia znajomaj usim hulni Pokemon GO, jość i inšyja, nie mienš zachaplalnyja prahramy. Voś niekalki prykładaŭ.

Ingress — naviadzicie kamieru telefona na słavutaści vašaha horada i ŭdzielničajcie ŭ zachaplalnych pryhodach. Vas čakaje zajmalnaja prahułka ŭ pošukach artefaktaŭ i pierachodami na roznyja ŭzroŭni składanaści.

Mabilnaja prahrama IKIEA — vydatny prykład praktyčnaha vykarystańnia dapoŭnienaj realnaści, dziakujučy jakomu vy možacie «prymieryć» pradmiety z katałoha IKEA da interjera svajoj chaty.

Zombies, Run! — prahrama dla amataraŭ biehu, jakaja pieratvoryć treniroŭki ŭ sapraŭdnyja pryhody. Padčas prabiežki hulcu prapanujecca ratavacca ad zombi, šukać schovanki sa zbrojaj i miedykamientami i šmat čaho jašče.

7. Pryviadzicie ŭ paradak i pradajcie staryja rečy

Vyzvalić prastoru i zarabić krychu hrošaj možna, raźmiaściŭšy abjavu ab prodažy starych rečaŭ na barachołkach. Ale pamiatajcie važnaje praviła: nie źbirajcie doma niepatrebnyja pradmiety; kali ciaham miesiaca ŭ vas nie atrymałasia znajści pakupnikoŭ na vašy skarby, adviazicie ich u centr pryjomu dapamohi abo vykińcie.

8. Składzicie hienieałahičnaje dreva

Daŭno nie telefanavali rodnym? Hienieałahičnaje dreva — vydatnaja nahoda heta zrabić. Zapišycie imiony, miescy i daty naradžeńnia ŭsich svajakoŭ. Uspomnicie padrabiaznaści žyćcia ci zajmalnyja historyi ab prodkach. Padpišycie fatahrafii. Za hetu pracu naščadki buduć vam udziačnyja.

Pavialičyć

9. Adkryjcie śviet hieakiešynhu

Adpraŭlajciesia na pošuki skarbaŭ z kvestam suśvietnaha maštabu. Prychilniki hieakiešynhu pakidajuć kapsuły ŭ roznych haradach i prydumlajuć zahadki, jakija da ich viaduć. Adkryvajcie sajt prajekta i šukajcie pryhody ŭ svaim horadzie.

I, urešcie, — vyśpiciesia.

Zdarovy son — załoh badzioraści i dobraha nastroju. Adklučycie hadžety, prymicie ciopły duš, pieraścialicie ​​łožak, pravietrycie pakoj — i mocny son vam zabiaśpiečany.

• 13
• 0
• 3
• 2
• 1
• 0
• 2
• 0