Amierykanski śpiecyjalist u kampjutarnaj biaśpiecy Kievin Mitnik pamior 16 lipienia ŭ ZŠA ad raku piečani. Jon byŭ viadomy jak adzin ź pieršych chakieraŭ, jaki paśpiachova ŭzłomvaŭ telefonnyja i kampjutarnyja sietki viadučych amierykanskich kampanij. U hetaj roli jon staŭ pieršym kampjutarnikam, jakija trapili ŭ śpis FBR samych šukanych złačyncaŭ ZŠA. Heta zrabiła jaho kultavaj fihuraj u industryi, piša Radyjo Svaboda.
Z 12 hadoŭ Mitnik, vykarystoŭvajučy mietady sacyjalnaj inžynieryi i techničnyja pryłady, uzłomvaŭ telefonnyja sietki, atrymlivajučy mahčymaści biaspłatnych zvankoŭ i pieranakiravańnia vyklikaŭ. U 17 jon upieršyniu atrymaŭ niezakonny dostup da kampjutarnaj sietki ŭ svajoj škole. Jaho achviarami stanavilisia sietki Pacific Bell, łabaratoryi Beła, «Mataroły», Nokia, Sun Microsystems. Za heta jon niekalki razoŭ adbyvaŭ turemnyja terminy.
Bijahrafija Mitnika i adno ź jaho pajmańniaŭ stali siužetnaj asnovaj dla knihi «Uzłom» Cutomu Simamury i Džona Markafa, u 2000 hodzie jana była ekranizavana Džo Čapielem. U tym ža hodzie chakier vyjšaŭ na volu paśla svajho apošniaha turemnaha terminu. Jon kansultavaŭ u pytańniach biaśpieki najbujniejšyja suśvietnyja kampanii, u tym liku FedEx, Toshiba i IBM, vystupaŭ ź lekcyjami i napisaŭ niekalki knih, samaj viadomaj ź jakich stała «Mastactva padmanu» (2002).
Pra śmierć 59-hadovaha chakiera havorycca ŭ niekrałohu mohiłak cara Davida ŭ Łas-Viehasie. Infarmacyju paćvierdziła vydańnie SecurityWeek.
U materyjale the New York Times u 1994 hodzie śćviardžałasia, što Mitnik uzłomvaŭ sietku kamandavańnia pavietrana-kaśmičnaj abarony Paŭnočnaj Amieryki. Hetaja infarmacyja časta vykarystoŭvałasia ŭ bijahrafijach chakiera, ale nikoli aficyjna nie paćviardžałasia i, chutčej za ŭsio, źjaŭlajecca vydumkaj.
Ciapier čytajuć
Kamientary