Biełarusku ŭ Polščy spačatku pahadzilisia ŭziać na pracu, a potym admovilisia — praz toje, što ŭ Biełarusi na jaje zaviedziena kryminałka
Asabliva aburaje Taćcianu Pankovu toj fakt, što ŭładalniki polskaj firmy — biełarusy.
Padčas vybaraŭ 2020 hoda Taćciana pracavała ŭ Mahiloŭskim abłvykankamie — była hałoŭnaj śpiecyjalistkaj upraŭleńnia ekanamičnaha analizu kamiteta ekanomiki. Taksama vykładała va ŭniviersitecie.
Jana chadziła na pratesty i na pracy nie bajałasia demanstravać svaju pazicyju. U 2021 hodzie adzin ź ideołahaŭ pabačyŭ na pracoŭnym stale Taćciany kubak z Pahoniaj — paśla hetaha vypadku na jaje źviarnuli ŭvahu siłaviki. U vyniku žančynu vymusili zvolnicca z abłvykankama.
U Taćciany atrymałasia chutka znajści pracu na adnym z pradpryjemstvaŭ, ale ŭ 2022 hodzie jana ŭsio ž vyrašyła źjechać z krainy.
Zaraz biełaruska znachodzicca ŭ aktyŭnym pošuku pracy ŭ Polščy. Adna ź siabrovak dasłała joj vakansiju na biełaruskaj movie — kampanija Key Food Support Sp. z o.o. šukała buchhałtarku.
Hetaja kampanija pastaŭlaje inhredyjenty dla charčovaj pramysłovaści. Key Food Support Sp. z o.o. była zarehistravana ŭ Polščy ŭ 2022 hodzie. Zhodna z dadzienymi sajta aleo.com, pałova kampanii naležyć 22‑hadovaj Jaŭhienii Tatarčuk, pałova — 38‑hadovamu Jaŭhienu Zavadskamu.
Na sajcie kampanii paznačana: «Key Food Support była stvorana ŭ Polščy hrupaj vopytnych prafiesijanałaŭ z šyrokim vopytam raboty ŭ charčovaj pramysłovaści. Uśviedamlajučy nieabchodnaść u nadziejnym pastaŭščyku vysakajakasnych inhredyjentaŭ, my vyrašyli stvaryć ułasnaje pradpryjemstva dla zadavalnieńnia rastučych zapatrabavańniaŭ vytvorcaŭ praduktaŭ charčavańnia pa ŭsioj Jeŭropie».
Taćciana adhuknułasia na vakansiju i jaje zaprasili na sumoŭje — pravodzili jaho ŭłaśniki kampanii. Ale byli cikavyja momanty: Jaŭhienija Tatarčuk prosta pravodziła patencyjnuju supracoŭnicu ŭ pieramoŭnuju, a samo sumoŭje pravodzili jaje maci Alena Hierasimienka i Jaŭhien Zavadski.
Alena raspaviała, što žyvie ŭ Minsku, a ŭ Polšču tolki pryjazdžaje čas ad času. I zrabiła kamplimient kułonu ŭ vyhladzie konturaŭ karty Biełarusi, jaki byŭ na šyi ŭ Taćciany.
Paśla pieršaha etapu žančynie prapanavali dva dni nieapłočvajemaj stažyroŭki (pa čatyry hadziny na dzień). Jaje heta krychu ździviła, bo ŭ Polščy zvyčajna niama takoj praktyki, ale žančyna ŭsio ž pahadziłasia.
— Ja pabyvała na stažyroŭcy, unikła ŭ pracesy, paznajomiłasia z kalektyvam, — raspaviała Taćciana «Našaj Nivie».
Ad patencyjnych pracadaŭcaŭ Taćciana daviedałasia, što im taksama naležyć kampanija «Pampuškin» u Rasii, kudy jany pastaŭlajuć pradukcyju.
Zhodna z dadzienymi sajta rusprofile.ru, u TAA «Pampuškin» Alena Hierasimienka sapraŭdy źjaŭlajecca adnoj z zasnavalnic i vałodaje pałovaj statutnaha kapitału. Taksama jana paznačana na sajcie kampanii jak dyrektarka pa raźvićci.
Sama kampanija «Pampuškin» była zarehistravanaja ŭ Maskvie ŭ lipieni 2022 hoda — amal što adnačasova z kampanijaj u Polščy.
Pa dadzienych RBK, u Rasii ŭ 2019 hodzie była zarehistravanaja handlovaja marka «Mister Pampuškin». Jaje pravaŭładalnikam było biełaruskaje TAA «Piakarskaja sprava» (likvidavana ŭ 2025 hodzie).
Letam 2022 hoda Jaŭhien Zavadski na vystavie Modern Bakery u Maskvie jak pradstaŭnik «Mistar Pampuškin» chvaliŭsia, što deficyt inhredyjentaŭ na kirmašy (nie składana zdahadacca, čym jon byŭ vyklikany) im tolki dapamahaje: «Nam dapamahaje deficyt inhredyjentaŭ na kirmašy, tamu što klijenty šukajuć kruchmału, načyńnia, a my možam ich prapanavać. Rynak mianiajecca, i kali raniej my klijentam akazvali ŭ asnoŭnym technałahičnuju padtrymku, to ciapier heta chutčej zabieśpiačeńnie. Niekatoryja vytvorcy, jakija raniej byli kankurentami, ciapier stali našymi klijentami, tamu pracy tolki dadałosia. Ale my hetamu rady».
Darečy, da hetaha času hrupu kampanij «Mistar Pampuškin» možna znajści ŭ śpisie kampanij, jakija zajmajucca impartazamiaščeńniem u Rasii.
Paśla stažyroŭki ŭ Taćciany spytali, čamu jana źjechała ź Biełarusi i ci zaviedzieny na jaje na radzimie kryminalnyja spravy. Ale supakoili — maŭlaŭ, my ž sami biełarusy, dobra ŭsio razumiejem.
— Ja sumlenna adkazała, što kryminałka jość. Pra jaje jany daviedalisia ad mianie samoj — ja ničoha nie chavała. Nie ŭpeŭniena, što jany sami niešta jašče śpiecyjalna praviarali.
Kryminałku ŭ Biełarusi na Taćcianu zaviali ŭ 2025 hodzie — za ŭdzieł u biełaruskim mitynhu ŭ Varšavie. Abvinavacili jaje pa druhoj častcy artykuła 361‑4 (sadziejničańnie ekstremisckaj dziejnaści hrupaj asob pa papiaredniaj zmovie).
U chutkim časie Taćciana atrymała paviedamleńnie ad Jaŭhiena Zavadskaha: toj napisaŭ, što jany hatovy pryniać biełarusku na pracu. Jon rastłumačyŭ, što joj nieabchodna zrabić i kali jaje čakajuć na pracy. Žančyna adpraviła nieabchodnyja dla pracaŭładkavańnia dakumienty.
Ale ŭ vyniku Jaŭhien napisaŭ, što jurysty kampanii praz termin dziejańnia pašparta (da krasavika 2027 hoda) i kryminalnuju spravu ŭ Biełarusi paraili ŭziać inšaha kandydata na pracu.
Taćciana takim rašeńniem vielmi aburanaja: «Doma zvolnili z vykankama, potym — z univiersiteta, paśla — z pradpryjemstva. I što, ciapier jašče tut?». Kaža, samy dziŭny dośvied mihracyi — kali ty ŭžo vyjechaŭ ź Biełarusi, a jaje strach usio jašče chodzić za taboj.
Biełarusy ŭ Threads taksama aburylisia i ŭžo abrynuli rejtynh Key Food Support Sp. z o.o. na huhł-kartach — zaraz tam 1,7 zorki z 5 mahčymych. Kamientary taksama ŭražvajuć.
«Naša Niva» źviarnułasia ŭ Key Food Support Sp. z o.o. pa kamientar, ale adkazu pakul nie atrymała.
Kamientary
pracavać u abłvykankakamie i adkryta vykazvać svaju pazicyju, nie kožny zmoža
A ludiej za pdd vyšvyrivajut.