Małady dzied z Karmy zachacieŭ dałučyć Sumy da Rasii. Praktyčny vynik — unučka ŭ Mazyry ubačyć jaho tolki na fota
Šmatrazova sudzimy Siarhiej Sałaŭjoŭ z Homielskaj vobłaści pavioŭsia na ščodryja abiacańni rasijskich viarboŭščykaŭ, ale nie praličyŭ ryzyki. U vyniku vajskovaja karjera skłałasia bieź niečakanaściaŭ, jak va ŭsich: viasnoj 2025‑ha pieršaje fota ŭ sacsietkach u rasijskim kamuflažy i z błatnoj raspalcoŭkaj, letam 2025‑ha fota ŭ kampanii takich ža džentlmienaŭ udačy, a zimoj 2025‑ha — zakinutaja staronka, na jakoj płačacca žonka.
Siarhiej Sałaŭjoŭ naradziŭsia ŭ 1977 hodzie ŭ Rasii, ale vyras na terytoryi našaj krainy i staŭ hramadzianinam niezaležnaj Biełarusi. A taksama daŭ žyćcio mnohim hramadzianam Biełarusi.
Sałaŭjoŭ — vielmi małady dzied. U 2017‑m jon staŭ dziedam u pieršy raz — u jaho syna naradziŭsia syn, u 2020 hodzie jon staŭ dziedam druhi raz — u syna naradziłasia dačka. Tyja žyvuć u Mazyry.
I nie było b nijakaj nahody pisać pra hetaha čałavieka, kali b nie fakt, što Siarhiej užo nikoli nie dapamoža synu zabrać unukaŭ sa škoły i nie zmoža acanić ščaście być maładym dziedam — u 2025 hodzie Sałaŭjoŭ naniaŭsia vajavać suprać Ukrainy i, miarkujučy pa ŭsim, pratrymaŭsia na froncie ŭsiaho kala šaści miesiacaŭ.
Ciapier jon ličycca bieź viestak źnikłym bajcom v/č 52055, a jaho žonka biespaśpiachova napisvaje jahonym siabram «UKantakcie» z pytańniem, kali jany apošni raz bačyli Siarhieja.
Što prymusiła Siarhieja naniacca na pucinskuju vajnu — nieviadoma. Ale pavodle svajho sacyjalna-psichałahičnaha partreta Sałaŭjoŭ nasamreč byŭ u hrupie ryzyki jak były recydyvist.
U daŭnim minułym Siarhiej, pavodle dadzienych Belpol, dvojčy byŭ asudžany sudom Karmianskaha rajona Homielskaj vobłaści. Pieršy raz u 1998 hodzie za złosnaje chulihanstva (z umoŭnym terminam), a druhi raz u 2002 hodzie za kradziež aŭtamabila (atrymaŭ try hady kałonii, ale ŭvieś termin nie siadzieŭ: hod «źjeła» amnistyja, a reštu dabyvaŭ na papraŭčych pracach).
Ź siaredziny 2010‑ch danyja pra jaho ŭ biełaruskich bazach abryvajucca. Imavierna, Siarhiej jeździŭ na zarobki ŭ Rasiju i pierastaŭ pracavać u Biełarusi aficyjna.
Kamientary