Maštabnaja pavietranaja ataka na rehijony Rasii za 4 dni da paradu. U Čuvašyi haryć zavod VPK
Bujnaja ataka na RF adbyłasia nočču: vybuchi ŭ Tatarstanie, pažar na hihanckim NPZ i vybuchi za 2000 km ad frontu. U niekatorych rehijonach ataka dronami praciahvajecca i rankam.
Noč z 4 na 5 maja stała napružanaj dla rasijskaj sistemy SPA. Pavietranaja pahroza achapiła adnačasova minimum 18 rehijonaŭ krainy — ad pamiežnych abłaściej da hłybokaha tyłu ŭ Sibiry.
Asnoŭnymi metami načnoha nalotu stali abjekty enierhietyki i vajenna-pramysłovaha kompleksu.
U horadzie Kiryšy Leninhradskaj vobłaści paśla ŭdaru bieśpiłotnikaŭ uspychnuŭ pažar na terytoryi «Kiryšynaftaarhsintez». Heta adzin z najbujniejšych naftapierapracoŭčych zavodaŭ u Rasii. Spadarožnikavaja sistema NASA Firms zafiksavała mahutnyja ciepłavyja vykidy ŭ pramzonie. Hubiernatar rehijona zajaviŭ pra źbićcio 18 BPŁA, a taksama paćvierdziŭ fakt uzharańnia.
U Čebaksarach (Čuvašyja) pad udar trapiŭ zavod «VNIIR-Prahres», jaki vyrablaje elektratechničnaje abstalavańnie dla rasijskaha VPK.
U horadzie prahrymieła sieryja vybuchaŭ, pracavała SPA. U vyniku ataki ŭ Čebaksarach paciarpieli najmieniej try čałavieki. Ataka na horad praciahvajecca.
Upieršyniu z pačatku vajny režym rakietnaj niebiaśpieki byŭ uviedzieny ŭ Chanty-Mansijsku (CHMAO). Hety rehijon znachodzicca za 2000 kiłamietraŭ ad miažy z Ukrainaj.
Sireny taksama hučali ŭ Tatarstanie, Baškartastanie, Samarskaj, Pienzienskaj, Śviardłoŭskaj i Čalabinskaj abłaściach. Pavietranaja pahroza vyklikała maštabnyja zboi ŭ pracy transpartu. Ahułam abmiežavańni na paloty ŭvodzilisia ŭ 18 aeraportach krainy. Siarod ich Kazań i Nižniakamsk, Nižni Noŭharad, Ufa, Samara, Pierm, Vałhahrad, Sarataŭ, Pskoŭ.
Hetaja ataka pakazała pašyreńnie hieahrafii ŭdaraŭ: kali raniej pad atakaj, u asnoŭnym, była jeŭrapiejskaja častka Rasii, to ciapier pad pahrozaj apynulisia pramysłovyja centry Urała i Sibiry.
Kamientary