U filmie «Djabał nosić Prada — 2» źniałasia biełaruska. Jana ihraje «znakamituju aktrysu» pobač z Merył Stryp
Atrymać hetuju rolu byłaja biełaruskaja žurnalistka Hanna Trubačova zmahła dziakujučy svajmu stylu.
U filmie «Djabał nosić Prada — 2» Miranda Prystli (Merył Stryp) pieražyvaje zachod karjery i kryzis tradycyjnaha časopisnaha biznesu. Kab ažyvić svajo vydańnie, jana prosić dapamohi ŭ byłoj asistentki Emili (En Cheteŭej), jakaja zajmaje vysokuju pasadu ŭ hrupie luksavych brendaŭ.
Byłaja biełaruskaja žurnalistka Hanna Trubačova ŭ filmie «Djabał nosić Prada — 2» pavinna była stać adnoj sa statystaŭ — ci to ziavakaj, ci to paparacy. Ale dziakujučy svajmu aryhinalnamu stylu atrymała rolu «znakamitaj aktrysy».
Ale pra ŭsio pa paradku. Dziesiać hadoŭ tamu biełaruskaja žurnalistka Hanna Trubačova pierajechała ŭ ZŠA. Čas ad času jana zdymajecca ŭ masoŭcy kino. Pra svaje pryhody raspaviadaje ŭ fejsbuku.
Letaś Hańnie niejmavierna pašancavała: jana atrymała rolu ŭ adnym z samych doŭhačakanych sikviełaŭ — «Djabał nosić Prada — 2». Prytym tuju rolu, na jakuju nie raźličvała, bo nie ŭvachodziła ŭ prafsajuz akcioraŭ masoŭki.
Pašancavała praz toje, što paŭsiadzionny styl Hanny davoli jarki i niebanalny. U toj znakavy dzień jana pryjechała na ŭskrainu Ńju-Jorka da hihanckaha budynka studyi, kab atrymać ubor dla zdymkaŭ.
Vobraz biełaruski (a ŭ im možna było pabačyć aksamit, skuru i piory) uraziŭ kaścium-dyzajnieraŭ. Paśla tradycyjnaha «good to see you again» jany parailisia i prynieśli sukienku, jakaja bolš nikomu nie padyšła.
«Mnie vydajuć tuju samuju dyzajnierskuju sukienku, jakaja, klanusia boham, sapraŭdy ni na kim bolš nie sieła b — nie tolki tamu, što treba być vielmi vysokaj i chudoj, ale i charyzmatyčnaj — nie kožny jašče paciahnie, jak tut kažuć: čornaje ŭ padłohu z daŭžeznym chvastom, kaŭnier — varonina piaro, a pamiž kavałkami, ź jakich pašyta sukienka, prahladaje maja biełaja skura.
Prybranaja, vychodžu i tut ža pačynaju hladzieć zvysoku, a ŭsich niazhodnych sa mnoj pieratvarać u žab. «Nibyta naradziłasia ŭ hetaj sukiency», — paviedamlaju kaściumieram. Zvyčajnaja pracedura — sfatahrafavać kaścium na akciory, — ale zamiest pratakołu pačynajecca impravizacyja».
Paklikali apierataraŭ — «Zdymajcie jaje, jana asablivaja». Hanna ŭvajšła ŭ vobraz i atrymlivała biaskoncyja kamplimienty.
U vyniku Hannu zaćvierdzili na rolu «znakamitaj aktrysy №61», jakaja razam pavinna ŭdzielničać u scenie Met Gala (heta štohadovy dabračynny bal Instytuta kaściuma Muzieja Mietrapoliten u Ńju-Jorku).
Voś jak biełaruska zhadvaje dzień zdymak: «U masoŭcy jak minimum paŭtysiačy čałaviek, u arhanizataraŭ hałava kruham. Ale schiema zvykłaja: kaściumiery, makijaž, stylisty pa pryčoskach, fatahrafii, biaskoncaje čakańnie ŭ pierapynkach».
Zdaryłasia i kurjoznaja situacyja ŭ prybiralni: adna z žančyn, jakaja zdymałasia ŭ masoŭcy, z nadziejaj źviartałasia da kožnaj, chto zachodziŭ, ci niama ŭ jaje zubnoj nitki. Maŭlaŭ, heta jaje pieršyja zdymki ŭ masoŭcy, mahčyma, pašancuje ŭbačyć Merył Stryp, a tut zuby nie pačyščanyja. Ni ŭ koha nitki nie było.
Hanna ž prydumała aryhinalnaje rašeńnie prablemy — vyrvała niekalki vałasoŭ z nakładnych pasmaŭ, jakija joj daviałosia pryčapić dadatkova da hniazda ŭ styli «Maryja-Antuaneta ŭdała praviała noč».
«Dama aniamieła, biaskonca dziakuje, a paśla ŭ dadatak atrymlivaje majo niečakanaje pryznańnie: nie ŭsprymajcie siabie zanadta surjozna».
Za Hannu vielmi chvalavałasia jaje siastra, jakaja maryła, kab Hanna sustrełasia z Merył Stryp na zdymačnaj placoŭcy.
«I na 14‑j hadzinie 16‑hadzinnaj źmieny ja pišu joj, što bolš nie mahu hladzieć na Merył Stryp, što jana tolki što sama abrynułasia na prystupkach prosta pobač sa mnoj, miž inšym spytała ŭ spadara Tučy, ci varta im viartacca na zychodnuju kropku. Napeŭna, varta, kaža jana, tamu što kali vierniešsia, to chutčej za ŭsio pačuješ, što «we are wrapped», maŭlaŭ, «usio, skončyli», a nie vierniešsia — dyk budzieš znoŭ i znoŭ uzychodzić pa leśvicy, kab całavać kalenku karalevy balu».
U vyniku pracoŭny dzień dla Hanny ciahnuŭsia 16 hadzin i 6 hadzin — dla Merył Stryp. Ci adčuvała biełaruska siabie niejkaj asablivaj u momant zdymkaŭ pobač z suśvietnaj zorkaj? Kaža, što nie.
«Ale, pryznacca, niešta zajmalnaje ja ŭsio ž adčuła, kali mianie vyvieli ŭ, tak by mović, uščylnienuju scenu, dzie akciory, fanaty, fatohrafy i žurnalisty ŭžo vystrailisia ŭzdoŭž dyvanovaj darožki. Mianie pieršuju pastavili na jaje davać biazhučnaje intervju. I voś staju ja na vierchnich prystupkach leśvicy, hladžu ŭ bok parka i baču nievierahodnuju kolkaść ludziej, što vystrailisia ŭzdoŭž aharodžy Centralnaha parka: usie jany pryjšli pahladzieć na zdymki filma i nie razychodzilisia da piataj ranicy, pakul my ŭsie pracavali dubl za dublem. Cikavaja historyja, dumaju: ci budu ja kali-niebudź bližej da ŭdziełu ŭ sapraŭdnym kino…».
Užo doma, viarnuŭšysia sa zdymak, Hanna daviedałasia, što rola, jakuju joj davieryli pradziusary, praduhledžvała ŭdzieł u prafsajuzie (dla akcioraŭ masoŭki, jakija tudy ŭvachodziać, značna lepšyja ŭmovy pracy). Upieršyniu Hanna atrymała ček z ašałamlalnaj sumaj — kaža, paśla jaho nikoli ŭ žyćci nie zaikniecca, što 16‑hadzinnaja źmiena moža być stamlalnaj.
A ahient biełaruski napisaŭ, što za jaje ŭžo padali prašeńnie na pryniaćcie ŭ toj samy prafsajuz.
«Kab vy razumieli: prafsajuznyja akciory atrymlivajuć značna bolš, im usiudy pieršym zialonaje śviatło, lepšyja roli i pierśpiektyvy».
Ciapier Hanna ličyć tuju rolu «znakamitaj aktrysy №61» losavyznačalnaj — paśla jaje karjera pajšła ŭ haru.
«Niadaŭna ja była na zdymkach, hrym da jakich mnie rabiła dvojčy ŭładalnica «Oskara». «Ja ciabie pamiataju z «Djabał nosić Prada — 2», — skazała Džudzi».
Hanna raić usim zaŭsiody zastavacca samim saboj — bo mienavita ŭ hetym jość siła.
I sapraŭdy, chto jaho viedaje, ci atrymała b jana rolu pobač z halivudskaj zorkaj, kali pryjechała b za kaściumam nie ŭ svaim zvyčajnym epatažnym vobrazie, a ŭ ścipłych džynsach dy džempiery.
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary
Paklikali apierataraŭ — «Zdymajcie jaje, jana asablivaja».
Šmat čuł čytał sustrakałsia
Biełaruska ( biełarus) ?? Ad vas niejki śviet idzie ??
I jašče ludzkaść prystojnaść Prafiesijnaść adukavanaść vychavanaść ŭsio naša Svaje Voźmie....I ni svaje)))
Mahła b u musarni słužyć. Dastatkova pastavić jaje na vysokija abcasy, i navat pierja nie treba.
Dziŭna, jakija niezdarovyja ciapier standarty žanočych pavodzinaŭ.