UEFA paviedamiŭ, što biełaruskaja futbolnaja zbornaja atrymaje formu ad kampanii Adidas. Ani Źviaz jeŭrapiejskich futbolnych asacyjacyjaŭ, ani niamiecki vytvorca nie ŭbačyli ŭ hetaj supracy ź Mienskam ničoha haniebnaha, piša «Biełsat».
U zbornaj Biełarusi pa futbole — novy techničny sponsar, paviedamili miedyi 1 traŭnia. U hety dzień Źviaz jeŭrapiejskich futbolnych asacyjacyjaŭ (UEFA) abviaściŭ, što kampanija Adidas zrobić vopratku dla dziesiaci kamandaŭ pavodle admysłovaj prahramy UEFA Kit Assistance. Jana isnuje z 2007 hoda i «zabiaśpiečvaje nievialikija nacyjanalnyja asacyjacyi formaj dla hulniaŭ i trenirovak, harantujučy, što ich kamandy mohuć vystupać u vysakajakasnaj, indyvidualnaj formie, što adlustroŭvaje ich futbolnuju kulturu i historyju».
Adidas budzie partnioram ciaham dvuch hadoŭ zbornych Andory, Biełarusi, Kipru, Farerskich astravoŭ, Kazachstanu, Kosava, Lichtenštejnu, Paŭnočnaj Makiedonii, Malty i San-Maryna. Na sajcie UEFA prezientavanaja forma ŭsich kamandaŭ, akramia biełaruskaj.
Niamieckaja kampanija faktyčna admoviłasia kamientavać supracu ź biełaruskaj kamandaju: u adkaz na zapyt «Biełsatu» firma paraiła źviartacca ŭ Źviaz jeŭrapiejskich futbolnych asacyjacyjaŭ.
U pres-słužbie UEFA zajavili «Biełsatu», što ekskluziŭnaj supracy ź Biełaruśsiu niama: «Źviartajem uvahu, što prahrama UEFA Kit Assistance adkrytaja dla ŭsich asacyjacyjaŭ-čalcoŭ UEFA».
Tam taksama rastłumačyli, čamu nie pakazali raspracavanuju dla biełaruskich futbalistaŭ ekipiroŭku:
«Biełaruś pastanaviła nie prezientavać svaju novuju formu».
Na astatnija pytańni, u tym liku adnosna imaviernaha parušeńnia sankcyjaŭ, u Źviazie jeŭrapiejskich futbolnych asacyjacyjaŭ nie adkazali, zajaviŭšy, što «na hetym etapie ŭ nas niama dadatkovych kamientaroŭ».
Da apošniaha času futbolnuju zbornuju Biełarusi apranała italjanskaja kampanija Errea Sport. U 2022 hodzie hetaha vytvorcu taksama abrali ŭ jakaści partniora prahramy UEFA Kit Assistance.
Kamientary