Kala 90% usich ałmazaŭ śvietu prachodziać praz horad Surat u Indyi. U listapadzie tam płanujecca adkryćcio novaha budynka biržy ałmazaŭ, jaki svaimi pamierami pieraŭzychodzić hihancki budynak Pientahona ŭ ZŠA.
Jak adznačaje CNN, budynak Surat Diamond Bourse svajoj płoščaj u 650 tysiač kvadratnych mietraŭ źjaŭlajecca najbujniejšym ofisnym budynkam u śviecie, apiaredziŭšy takim čynam Pientahon u ZŠA.
Horad Surat u štacie Hudžarat na zachadzie Indyi naličvaje amal siem miljonaŭ žycharoŭ i nosić nieaficyjnuju nazvu «Ałmazny horad», pakolki praź jaho prachodziać kala 90% usich ałmazaŭ u śviecie. Ź listapada ŭ novym budynku biržy buduć pracavać bolš za 65 tysiač supracoŭnikaŭ: šlifoŭščyki, paliroŭščyki, dylery.
15-paviarchovy budynak składajecca ź dzieviaci padvojnych błokaŭ, jakija źmiaščajuć 4700 ofisaŭ płoščaju ad 28 da 700 kvadratnych mietraŭ. Ofisy złučanyja centralnym kalidoram, jaki nahadvaje terminał aeraportu. Budynak zajmaje płošču bolšuju za 14 hiektaraŭ. Aproč 131 lifta, u im jość kanfierenc-zały, restarany, kramy i viełnies-zony.
Pavodle danych CNN, budynak kaštuje kala 350 miljonaŭ jeŭra i byŭ sprajektavany indyjskaj architekturnaj firmaj Morphogenesis.
Asablivaja ŭvaha była nadadziena ciepłaźbieražeńniu. Siaredniehadavaja tempieratura ŭ Suracie składaje kala 27 hradusaŭ Celsiju, a ŭ samy ciopły miesiac travień jana pieravyšaje 30 hradusaŭ. Dzieviać unutranych dvaroŭ sprajektavany takim čynam, kab zabiaśpiečvać achaładžeńnie i miescy dla sustreč na volnym pavietry, a taksama zabiaśpiečvać nizkija vydatki na elektraenierhiju.
Pavodle słoŭ architektaraŭ, centralny kalidor pryznačany dla nakiravańnia achaładžalnaj ciahi pavietra praz budynak. U toj ža čas «radyjantnaje achaładžeńnie» («radiant cooling») zabiaśpiečvaje cyrkulacyju achałodžanaj vady pad padłohaju dla źnižeńnia tempieratury ŭ pamiaškańni.
Choć u asobnych ofisach budzie vykarystoŭvacca tradycyjnaja sistema kandycyjanavańnia pavietra, pavodle acenak śpiecyjalistaŭ, prykładna pałova budynku achałodžvajecca z dapamohaj naturalnaj vientylacyi, a ahulnyja pamiaškańni siłkujucca ad soniečnaj enierhii.
Morphogenesis śćviardžaje, što ŭsia kanstrukcyja spažyvaje na 50% mienš enierhii, čym maksimalna dazvolena dla atrymańnia «płacinavaha» rejtynhu ad Indyjskaj rady pa ekałahičnym budaŭnictvie.
Prajekt byŭ inicyjavany ŭ 2015 hodzie. Samo budaŭnictva praciahvałasia čatyry hady i było zapavolena na dva z-za abmiežavańniaŭ, źviazanych z kavidam. Čakajecca, što budynak budzie aficyjna adkryty premjer-ministram Indyi Narendram Modzi (Narendra Modi), jaki naradziŭsia ŭ Hudžaracie i raniej zajmaŭ pasadu hałoŭnaha ministra štata.
Čytajcie jašče:
U centry Minska chočuć pabudavać pravasłaŭnuju carkvu
Spatrebiłasia try hady i $200 000. Jak vyhladaje niezvyčajny dom-ziamlanka biełaruskaha architektara
U Biełarusi adkryli pałac Bułhakaŭ paśla restaŭracyi, jakaja doŭžyłasia 14 hadoŭ
Ciapier čytajuć
Dźmitryj Łukašenka choča pastavić pad kantrol usie mabilnyja telefony9
Kamientary