Biełarusy ŭ Varšavie sabralisia hladzieć čempijanat śvietu pa-biełarusku. Cichanoŭskaja i Łatuška zaŭzieli za Ispaniju
Kala 400 biełarusaŭ sabralisia ŭ Varšavie na sumiesny prahlad finału čempijanatu śvietu. Čerhi pa burhiery, biełaruskija kamientary ad Sašy Ivulina i Jarasłava Pisarenki, sustrečy sa znajomymi i zbor dla dziaciej palitviaźniaŭ — viečar atrymaŭsia značna bolšym, čym prosta futbolnaja tranślacyja.
Arhanizatary padrychtavali dla haściej nie tolki futboł. Kvitok uklučaŭ pačastunak ad Burgerlab — kukuruzu i kielich piva. Achvotnych akazałasia tak šmat, što vystrailisia doŭhija čerhi.
Pakłapacilisia i pra tych, chto pryjšoŭ ź dziećmi. Spartyŭny kłub «Vołat» arhanizavaŭ asobnuju dziciačuju zonu, dzie małodšyja hości mahli pahulacca, pakul baćki sačyli za matčam.
Pryjšli nie tolki zaŭziatyja amatary futboła, ale i ludzi, jakija prosta chacieli pravieści viečar u biełaruskaj kampanii.
Vałanciorka i byłaja palitźniavolenaja Maryja Babovič pryznałasia, što nie ličyć siabie vialikaj futbolnaj zaŭziatarkaj, ale hetym razam vyrašyła padtrymać zbornuju Ispanii.
«Nie viedaju čamu. Prosta tak skłałasia. Raniej ja šmat hadoŭ zaŭzieła za Bielhiju, a ciapier vybrała Ispaniju. Mnie padabajecca, što heta maładaja kamanda. A Arhiencina — heta nie toj futboł, jaki mnie chaciełasia b bačyć u finale», — kaža jana.
Ekanamistka i biełaruskaja aktyvistka Taćciana Pankova taksama pryjšła nie stolki dziela futboła.
«Ja ŭvohule nie vielmi raźbirajusia ŭ futbole. Pryjšła, bo tut sabralisia našy ludzi. Kali ŭžo vybirać, to budu zaŭzieć za Arhiencinu — tam chacia b viedaju proźvišča adnaho futbalista».
Prykładna takoha ž mierkavańnia prytrymlivajecca i suzasnavalnik inicyjatyvy «Maldzis» Pavieł Macukievič.
«Kab ja jašče viedaŭ, chto siońnia hulaje. Davajcie budu zaŭzieć za Arhiencinu. Spadziajusia, jany pieramohuć», — žartuje jon.
Na mierapryjemstva taksama zavitali Śviatłana Cichanoŭskaja i Pavieł Łatuška.
«Ja nie vielmi fanatka futboła, ale budu zaŭzieć za Ispaniju, bo heta siabry Biełarusi», — skazała Śviatłana Cichanoŭskaja.
Pavieł Łatuška spačatku pažartavaŭ, što zaŭzieje za Kaba-Verde, a paśla padzialiŭsia, što na finale čempijanata śvietu padtrymaje Ispaniju, dzie niekali pracavaŭ pasłom Biełarusi.
Pakul hledačy čakali pačatku matča, dla ich praviali futbolny kviz. A padčas viečara Bysol źbiraŭ achviaravańni dla dziaciej palitviaźniaŭ. Meta kampanii — sabrać 10 tysiač jeŭra, kab dapamahčy sta dzieciam padrychtavacca da novaha navučalnaha hoda. Siarod tych, chto zrabiŭ danat, razyhryvali kopiju miača čempijanatu śvietu 2026 hoda z aŭtohrafami viadomych biełarusaŭ.
Ciapier čytajuć
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2626
Kamientary