Nułand naviedała Nihier. ZŠA chočuć paźbiehnuć «vahnieryzacyi» krainy

Nułand raskazała žurnalistam, što sustreča praciahvałasia bolš za dźvie hadziny, adnak dabicca pośpiechu i pierakanać miaciežnikaŭ skončyć pieravarot pakul nie ŭdałosia.

«Hetyja hutarki byli nadzvyčaj adkrytymi i časam davoli składanymi, — skazała jana. — Heta była pieršaja razmova, u jakoj ZŠA prapanoŭvali svaje dobryja pasłuhi, kali ŭ ludziej, adkaznych za [pieravarot], jość žadańnie viarnucca da kanstytucyjnaha paradku».

Pavodle słoŭ Nułand, jana sustrełasia z bryhadnym hienierałam Musoj Sałau Barmu, jaki byŭ pryznačany novym načalnikam vajskovaha štaba, i inšymi lidarami pieravarotu, adnak prośby ab sustrečy z kiraŭnikom prezidenckaj hvardyi Abdurachmanam Čyjani, jaki abviaściŭ siabie novym lidaram krainy, i zrynutym prezidentam Machamiedam Bazumam zastalisia biez adkazu.

Nułand skazała, što pakazała vajskoŭcam niekalki varyjantaŭ mahčymych dziejańniaŭ, a taksama dakładna paznačyła nastupstvy dla adnosin z ZŠA, kali Nihier nie adnović Bazuma na pasadzie abo pojdzie pa šlachu susiedniaj Mali, supracoŭničajučy z rasijskimi najmitami z PVK «Vahnier».

«Ja spadziajusia, što jany buduć trymać dźviery adčynienymi dla dypłamatyi. My zrabili takuju ​​prapanovu. Pabačym, — skazała jana. — Ludzi, jakija raspačali hetyja dziejańni tut, vydatna razumiejuć, jakuju ryzyku dla ich suvierenitetu ŭjaŭlaje zaprašeńnie «Vahniera».

ZŠA byli ŭ liku krain, jakija asudzili zachop ułady vajskoŭcami ŭ Nihiery.

U krainie, jak paviedamlaŭ Bieły dom, znachodzicca kala tysiačy amierykanskich vajskoŭcaŭ, jakija dapamahali źvierhnutamu prezidentu zmahacca z paŭstancami i vykonvali inšyja zadačy.

Pavodle danych Pientahona, vyvodzić ich z krainy pakul nie płanujecca, adnak častka dziejnaści paśla pieravarotu była zhornutaja.

Ekanamičnaja supolnaść zachodnieafrykanskich dziaržaŭ na minułym tydni abviaściła ŭltymatum kiraŭnikam miaciažu, prystrašyŭšy prymianić siłu, kali zrynuty prezident Machamied Bazum nie budzie adnoŭleny na pasadzie da viečara niadzieli.

Vajskoŭcy hety ŭltymatum praihnaravali, ale zakryli pavietranuju prastoru krainy, bajučysia interviencyi z susiednich krain.

I ZŠA, i Jeŭrasajuz raniej zajaŭlali, što šaniec na adnaŭleńnie demakratyčna abranaha ŭrada Nihiera pa-raniejšamu zastajecca. 

«Toj fakt, što ŭ Nihier adpraviłasia mienavita Nułand, śviedčyć ab tym, što administracyja Bajdena ŭsprymaje padziei ŭ afrykanskaj krainie skroź pryzmu vajny va Ukrainie, imkniecca praduchilić «vahnieryzacyju» Nihiera i nie žadaje vialikaj vajny ŭ Afrycy», — prakamientavaŭ vizit historyk Alaksandr Frydman.

• 9
• 0
• 0
• 1
• 0
• 0
• 0
• 0