Čynoŭnik NATA nie vyklučyŭ členstva Ukrainy ŭ Aljansie, ale ŭ abmien na admovu ad častki terytoryi. Ukraina pratestuje
Kiraŭnik aparatu hienieralnaha sakratara Paŭnočnaatłantyčnaha aljansu Styjan Jensen dapuściŭ, što Ukraina moža stać siabram NATA ŭ vypadku terytaryjalnych sastupak Rasijskaj Fiederacyi, paviedamlaje «Jeŭrapiejskaja praŭda» sa spasyłkaj na vydańnie VG.
Jensen na publičnaj dyskusii ŭ narviežskim horadzie Arendał nie vyklučyŭ mahčymaha siabroŭstva Ukrainy ŭ NATA. Pavodle jaho, «važna, kab my heta abmierkavali». Ale pry hetym dapuściŭ vielmi skandalnaje vykazvańnie:
«Ja liču, što adnym z rašeńniaŭ moža być admova Ukrainy ad terytoryi i atrymańnie siabroŭstva ŭ NATA ŭ abmien na heta».
U adkaz na prośbu ab udakładnieńni Jensen adznačyŭ, što dyskusii pra budučy status Ukrainy ŭ kantekście Aljansu paśla vajny ŭžo praciahvajucca, i ŭ ich, u pryvatnaści, hučać opcyi z admovaj Kijeva ad častki terytoryi.
«Ja nie kažu, što pavinna być mienavita tak. Ale heta moža być mahčymym rašeńniem», — rastłumačyŭ kiraŭnik aparatu hienieralnaha sakratara NATA.
Jensen padkreśliŭ, što mienavita Ukraina «pavinna vyrašać, kali i na jakich umovach choča vieści pieramovy».
MZS Ukrainy adreahavała na hetaje vykazvańnie praz svajho pres-sakratara Aleha Nikalenku, jaki napisaŭ u fejsbuku:
«Razmovy ab ustupleńni Ukrainy ŭ NATA ŭ abmien na admovu ad častki ŭkrainskich terytoryj absalutna nieprymalnyja. My zaŭsiody zychodzili z taho, što Aljans, jak i Ukraina, terytoryjami nie handlujuć.
Śviadoma ci nieśviadoma ŭdzieł słužbovych asob NATA ŭ farmiravańni naratyvu ab mahčymaści admovy Ukrainy ad svaich terytoryj ihraje na ruku Rasii.
Zatoje ŭ intaresach jeŭraatłantyčnaj biaśpieki — abmiarkoŭvać šlachi paskareńnia pieramohi Ukrainy i zdabyćcia joju paŭnapraŭnaha siabroŭstva ŭ NATA».
Čytajcie taksama:
Polšča tracić na vojska bolš za inšyja krainy NATA
-
Iłan Mask viartajecca ŭ administracyju Trampa, užo ŭ novaj roli
-
U Efiopii paśla niekalkich hadoŭ pierapynku znoŭ razharajecca poŭnamaštabnaja hramadzianskaja vajna. Moža destabilizavacca i ŭvieś rehijon
-
Šviejcarskija ledaviki rastajuć, za minuły hod stračanaja rekordnaja kolkaść lodu. Čym heta pahražaje?
Kamientary