«Razhlad zajavy prypynieny». Biełarusy raspaviadajuć pra zatrymki pry afarmleńni DNŽ u Litvie

«Dobry dzień, paviedamlajem vam, što razhlad vašaj zajavy ab źmienie dazvołu prypynieny ŭ adpaviednaści z punktam 5 artykuła 33 zakona «Ab pravavym stanoviščy zamiežnikaŭ u Litoŭskaj Respublicy», bo adkaz ad kampietentnaha orhana, jaki nieabchodny dla pryniaćcia rašeńnia, nie atrymany», — takaja infarmacyja prychodzić niekatorym biełarusam, jakija padalisia na atrymańnie abo zamienu dakumienta.

U piśmie taksama havorycca, što razhlad zajaŭki budzie adnoŭleny paśla atrymańnia nieabchodnaj infarmacyi. Ab pryniatym rašeńni abiacajuć paviedamić dadatkova. Nijakija terminy nie ahučvajucca.

Čytač, jaki padzialiŭsia hetaj infarmacyjaj, kaža, što padobny list jamu prysłali praz dva tydni paśla padačy dakumientaŭ.

Temu zatrymak pry afarmleńni DNŽ taksama aktyŭna abmiarkoŭvajuć u admysłovych čatach biełarusaŭ, jakija žyvuć u Litvie, bo takija listy atrymlivajuć nie adzinki.

Čytač, jaki padavaŭsia na atrymańnie DNŽ pa paskoranaj prahramie ŭ pieršyja dni lipienia, kaža, što dahetul nie zmoh atrymać dakumient, choć jon musiŭ być hatovy ciaham miesiaca.

«My zapłacili 240 jeŭra zamiest 120 za razhlad zajavy ŭ terminovym paradku (kala miesiaca tamu ceny padniali da 160 i 320 jeŭra. — NN). Pry padačy kazali, što dakumient budzie hatovy praz try tydni, ale prajšło ŭžo paŭtara miesiaca, i navat nijakaj infarmacyi niama», — kaža čytač.

Pry hetym surazmoŭca śćviardžaje, što nijakich dadatkovych listoŭ ad mihracyi ź infarmacyjaj ab prypynieńni razhladu zajavy, jak u vyšej apisanym vypadku, jon nie atrymlivaŭ.

Ale z prablemami pry atrymańni ci abnaŭleńni DNŽ sutykajucca nie ŭsie biełarusy. Niekatorym pry padačy pa paskoranaj prahramie vydavali dakumienty ŭ termin.

Inšyja kažuć, što atrymlivali padobnyja listy ab prypynieńni razhladu zajavy, ale ŭsio adno atrymali dakumient praz dva ź lišnim miesiacy paśla padačy.

Taksama viadoma pra vypadki, kali čałavieku padobny list nie prychodziŭ, ale dakumienty rabili krychu bolš za try miesiacy.

Pavialičyć

Pa apošnich danych, z kanca listapada 2022 hoda, kali ad hramadzian Biełarusi i Rasii pačali patrabavać zapoŭnić dadatkovuju ankietu, Litvoj było ŭstanoŭlena, što pahrozu nacyjanalnaj biaśpiecy ŭjaŭlajuć 910 hramadzian Biełarusi, 337 ź jakich admovili ŭ vydačy dazvołu na časovaje pražyvańnie ŭ Litvie, 121 — admovili ŭ zamienie takoha dakumienta. 205 biełarusaŭ byli pazbaŭlenyja raniej dziejnych dazvołaŭ na časovaje pražyvańnie.

Taksama dvum hramadzianam Biełarusi admovili ŭ vydačy dazvołaŭ na pastajannaje pražyvańnie ŭ Litvie, a čaćviarym takija dakumienty anulavali.

241 biełarus atrymaŭ admovu ŭ atrymańni litoŭskaj nacyjanalnaj vizy.

Usie hetyja biełarusy taksama atrymali zabaronu na ŭjezd u Litvu. Usiaho ŭ Litvie siońnia aficyjna žyvie kala 60 tysiač hramadzian Biełarusi.

Čytajcie taksama: 

Siejmu treba viarnucca da pytańnia ŭnifikacyi sankcyj suprać biełarusaŭ i rasijan — daradca prezidenta Litvy

Litoŭskaja ministarka zastupiłasia za biełarusaŭ: Nie varta hnać ich z krainy

Kiraŭniki biełaruskich IT-kampanij zadumvajucca pra rełakacyju ź Litvy. Niekatoryja pačali praces

• 14
• 0
• 8
• 6
• 5
• 12
• 22
• 0