«Разгляд заявы прыпынены». Беларусы распавядаюць пра затрымкі пры афармленні ДНЖ у Літве

«Добры дзень, паведамляем вам, што разгляд вашай заявы аб змене дазволу прыпынены ў адпаведнасці з пунктам 5 артыкула 33 закона «Аб прававым становішчы замежнікаў у Літоўскай Рэспубліцы», бо адказ ад кампетэнтнага органа, які неабходны для прыняцця рашэння, не атрыманы», — такая інфармацыя прыходзіць некаторым беларусам, якія падаліся на атрыманне або замену дакумента.

У пісьме таксама гаворыцца, што разгляд заяўкі будзе адноўлены пасля атрымання неабходнай інфармацыі. Аб прынятым рашэнні абяцаюць паведаміць дадаткова. Ніякія тэрміны не агучваюцца.

Чытач, які падзяліўся гэтай інфармацыяй, кажа, што падобны ліст яму прыслалі праз два тыдні пасля падачы дакументаў.

Тэму затрымак пры афармленні ДНЖ таксама актыўна абмяркоўваюць у адмысловых чатах беларусаў, якія жывуць у Літве, бо такія лісты атрымліваюць не адзінкі.

Чытач, які падаваўся на атрыманне ДНЖ па паскоранай праграме ў першыя дні ліпеня, кажа, што дагэтуль не змог атрымаць дакумент, хоць ён мусіў быць гатовы цягам месяца.

«Мы заплацілі 240 еўра замест 120 за разгляд заявы ў тэрміновым парадку (каля месяца таму цэны паднялі да 160 і 320 еўра. — НН). Пры падачы казалі, што дакумент будзе гатовы праз тры тыдні, але прайшло ўжо паўтара месяца, і нават ніякай інфармацыі няма», — кажа чытач.

Пры гэтым суразмоўца сцвярджае, што ніякіх дадатковых лістоў ад міграцыі з інфармацыяй аб прыпыненні разгляду заявы, як у вышэй апісаным выпадку, ён не атрымліваў.

Але з праблемамі пры атрыманні ці абнаўленні ДНЖ сутыкаюцца не ўсе беларусы. Некаторым пры падачы па паскоранай праграме выдавалі дакументы ў тэрмін.

Іншыя кажуць, што атрымлівалі падобныя лісты аб прыпыненні разгляду заявы, але ўсё адно атрымалі дакумент праз два з лішнім месяцы пасля падачы.

Таксама вядома пра выпадкі, калі чалавеку падобны ліст не прыходзіў, але дакументы рабілі крыху больш за тры месяцы.

Павялічыць

Па апошніх даных, з канца лістапада 2022 года, калі ад грамадзян Беларусі і Расіі пачалі патрабаваць запоўніць дадатковую анкету, Літвой было ўстаноўлена, што пагрозу нацыянальнай бяспецы ўяўляюць 910 грамадзян Беларусі, 337 з якіх адмовілі ў выдачы дазволу на часовае пражыванне ў Літве, 121 — адмовілі ў замене такога дакумента. 205 беларусаў былі пазбаўленыя раней дзейных дазволаў на часовае пражыванне.

Таксама двум грамадзянам Беларусі адмовілі ў выдачы дазволаў на пастаяннае пражыванне ў Літве, а чацвярым такія дакументы анулявалі.

241 беларус атрымаў адмову ў атрыманні літоўскай нацыянальнай візы.

Усе гэтыя беларусы таксама атрымалі забарону на ўезд у Літву. Усяго ў Літве сёння афіцыйна жыве каля 60 тысяч грамадзян Беларусі.

Чытайце таксама: 

Сейму трэба вярнуцца да пытання ўніфікацыі санкцый супраць беларусаў і расіян — дарадца прэзідэнта Літвы

Літоўская міністарка заступілася за беларусаў: Не варта гнаць іх з краіны

Кіраўнікі беларускіх ІТ-кампаній задумваюцца пра рэлакацыю з Літвы. Некаторыя пачалі працэс

• 14
• 0
• 8
• 6
• 5
• 12
• 22
• 0