Złavić udałosia pakul tolki vosiem reptylij.
Jak paviedamili kitajskija ŭłady, padčas pavodki, vyklikanaj tajfunam «Chajkuj», ź fiermy pa hadoŭli žyvioł na poŭdni Kitaja źbiehli dziasiatki krakadziłaŭ, piša Bi-bi-si.
Kali voziera ŭ Maaminie (pravincyja Huandun), dzie raźmieščana fierma, vyjšła ź bierahoŭ, na volu vyrvalisia 75 krakadziłaŭ.
Niekatorych uciekačoŭ udałosia ŭziać žyvymi, niekatorych miascovyja ŭłady zastrelili abo prybili elektratokam «u metach biaśpieki».
Pavodle paviedamleńniaŭ dziaržaŭnych miedyja, pakul uciekačy paśpiachova abychodziać zasady ŭładaŭ: udałosia złavić usiaho vosiem reptylij.
Na ŭsialaki vypadak žycharoŭ najbližejšych viosak paprasili zastavacca doma.
Tajfun «Chajkuj» užo bolš za tydzień hulaje pa poŭdni Azii, užo pabyvaŭšy ŭ Hankonhu, na Tajvani, u Japonii i ŭ niekatorych rajonach Kitaja.
Tajfun panižany ŭ statusie da trapičnaha štormu. Adnak «Chajkuj» užo staŭ pryčynaj hibieli siami čałaviek, jašče troje źnikli bieź viestak. Tajfun taksama vyklikaŭ apoŭźni i pavodki na poŭdni Kitaja.
Dziaržaŭnyja miedyja paviedamlajuć, što ŭ vyniku ŭciokaŭ krakadziłaŭ nichto nie paciarpieŭ. Aficyjnyja asoby, adnak, pryznajuć, što niekatoryja z uciekačoŭ mohuć chavacca ŭ hłybini pierapoŭnienych vadajomaŭ. Dla ich pošuku ratavalniki vykarystoŭvajuć hidrałakacyjnaje abstalavańnie.
Supracoŭnik biuro pa kiravańni nadzvyčajnymi situacyjami horada Maamin paviedamiŭ dziaržaŭnaj haziecie Dazhong Daily, što ciapier situacyja znachodzicca pad kantrolem, ale kolkaść źbiehłych krakadziłaŭ davoli vialikaja.
Pa danych biuro, ź fiermierskich zaścienkaŭ źbiehli 69 darosłych krakadziłaŭ i šaściora zusim maładych. Uciekačy — sijamskija krakadziły.
Pa danych brytanskaha zaaparka Crocodiles of the World, heta presnavodnyja reptylii, jakija mohuć dasiahać troch mietraŭ u daŭžyniu.
Adzin z pažarnych, jaki braŭ udzieł u pošukach, paviedamiŭ kitajskim miedyja, što siaredniaja vaha złoŭlenych darosłych krakadziłaŭ składaje kala 75 kh, a daŭžynia — bolš za 2 m.
U horadzie Maamin raźmieščana niekalki krakadziłavych fiermaŭ. Reptylij razvodziać jak dla skury, tak i na miasa.
Pamior 50-hadovy śpiecnazaviec Bućko. Jon byŭ udzielnikam vykradańnia i zabojstva Zacharanki i Hančara37
Kamientary