Karabli Čarnamorskaha fłotu Rasii adstupili ź Sievastopala ŭ Novarasijsk i Fieadosiju
Pa danych zachodnich čynoŭnikaŭ i spadarožnikavych zdymkaŭ, pravieranych ekśpiertami, nie mienš za 10 karabloŭ Čarnamorskaha fłotu Rasii pierabazavalisia ŭ Novarasijsk, a inšyja byli pierakinutyja ŭ Fieadosiju na paŭdniovym bierazie Kryma. Heta vialiki pośpiech Ukrainy.
Jak piša The Wall Street Journal, Rasija vyvieła bolšuju častku svajho Čarnamorskaha fłota sa svajoj hałoŭnaj bazy ŭ akupavanym Krymie. Heta adbyłosia paśla sieryj udaraŭ Ukrainy, naniesienych u apošnija tydni, u vyniku jakich byli surjozna paškodžanyja rasijskija sudny i sam štab fłotu.
Kamandujučy pavietranymi siłami Ukrainy paćvierdziŭ, što rasijskija karabli ŭ Krymie byli padbityja zachodnimi rakietami Storm Shadow.
Vyvad vojskaŭ zjaŭlajecca svoječasovym stymułam dla Ukrainy, bo jaje kontrnastupleńnie prasoŭvajecca pavolniej, čym płanavałasia, na fonie ciažkich strat i palityčnaha roznahałośsia ŭ ZŠA pa pytańni ab finansavańni namahańniaŭ Kijeva pa vyhnańni rasijskich akupacyjnych sił.
Vydańnie cytuje dziaržaŭnaha ministra uzbrojenych sił Vialikabrytanii Džejmsa Chipi (James Heappey), jaki na kanfierencyi pa biaśpiecy ŭ Varšavie na hetym tydni nazvaŭ razhrupavańnie karabloŭ «funkcyjanalnaj parazaj Čarnamorskaha fłotu».
Spadarožnikavyja zdymki, datavanyja 1 kastryčnika i pradstaŭlenyja Planet Labs, pakazali, što asnoŭnaja častka vajskovych karabloŭ była pierakinutaja ŭ Novarasijsk, u tym liku try dyzielnyja padvodnyja łodki, piać desantnych karabloŭ i niekalki małych rakietnych karabloŭ.
Jak zajaviŭ vydańniu staršy analityk Centra analizu stratehij i technałohij u Maskvie Michaił Barabanaŭ, inšyja sudny, u tym liku vialiki desantny karabiel, šerah małych rakietnych karabloŭ i novyja tralščyki, byli pierakinutyja ŭ port Fieadosija, raźmieščany dalej na ŭschod uzdoŭž Krymskaha paŭvostrava.
Adnak i z novych pazicyj karabli pa-raniejšamu zmohuć stralać kryłatymi rakietami pa Ukrainie.
Pry novym raskładzie adlehłaść ad linii sudakranańnia ŭ Chiersonskaj vobłaści i z boku Adesy składzie 400 da Fieadosii i 580 km da Novarasijska, što pieravyšaje bajavuju dalnaść kryłatych rakiet Storm Shadow i SCALP.
Choć hety krok moža ŭjaŭlać saboj tolki časovuju mieru dla abarony ad dalejšych udaraŭ Ukrainy, łahistyčny hałaŭny bol, źviazany ź pieramiaščeńniem niekatorych z samych ciažkich rasijskich karabloŭ, padkreślivaje pahrozu ŭdarnaha patencyjału Kijeva.
Joruk Isik (Yoruk Isik), vajenna-marski ekśpiert i kiraŭnik kansałtynhavaj firmy Bosphorus Observer, zajaviŭ, što na spadarožnikavych zdymkach bačnyja sietki i baržy, ustanoŭlenyja la ŭvachoda na vierf u Fieadosii, što ilustruje zaniepakojenaść Rasii z nahody dalejšych napadaŭ Ukrainy na hety abjekt.
Natalla Humianiuk, načalnica pres-centra Paŭdniovaha vajskovaha kamandavańnia Ukrainy, zajaviła, što Ukraina adsunuła liniju frontu ŭ Čornym mory jak minimum na 100 marskich mil (185 km) ad svajoj bierahavoj linii. Ciapier rasijskija karabli i katary Čarnamorskaha fłotu nie zachodziać dalej mysa Tarchankut na zachodnim uskrajku Krymskaha paŭvostrava.
Jak paviedamlaje «Radyjo Majak», pradstaŭnik prezidenta Dźmitryj Piaskoŭ admoviŭsia kamientavać paviedamleńni ab pieravodzie Čarnamorskaha fłotu Rasii ź Sievastopala ŭ Novarasijsk i stvareńni marskoj bazy ŭ Abchazii.
«Nie, ja nijak nie mahu heta kamientavać. Naturalna, pytańni, źviazanyja z dysłakacyjaj našych padraździaleńniaŭ, našych karabloŭ, našych čaściej, heta <…> kampietencyja Ministerstva abarony», — skazaŭ Piaskoŭ.
Ekśpierty zaŭvažajuć, što dziakujučy hetym pośpiecham Ukraina ŭžo prarvała błakadu ŭkrainskich partoŭ, pazbaviŭšy Čarnamorski fłot Rasii dostupu da zachodniaj častki Čornaha mora i adkryŭšy dla Ukrainy novy kalidor dla ekspartu ŭkrainskich tavaraŭ, najpierš zbožža.
Pieršaje sudna, jakoje vyjšła pa hetym kalidory, adpłyło ŭ žniŭni, pry hetym u apošnija dni kolkaść sudnaŭ, jakija zachodziać na sudnachodny šlach i pakidajuć jaho, raście z narastajučaj chutkaściu. Pa danych VMS Ukrainy, na hetym tydni jašče 12 karabloŭ čakali ŭvachodu ŭ kalidor.
Čytajcie jašče:
Na mysie Fijalent u akupavanym Sievastopali prahučali vybuchi, tam vajskovaja čaść
Ciapier čytajuć
Cichanoŭski raskazaŭ, jak siabie pavodziŭ Kola Łukašenka na sustrečy ŭ SIZA13
Kamientary