Zamiest śviatkavańnia jubileju — za kraty. Viciablanka Ludmiła Kaminskaja sustreła svajo 60-hodździe ŭ IČU
19 kastryčnika žančynu vyklikaŭ na razmovu supracoŭnik Kastryčnickaha RAUS Viciebska Uładzisłaŭ Šyškaviec. Na pytańnie, pra što razmova, milicyjanier adkazaŭ karotka: «Pryjdziecie — daviedajeciesia». U vyniku ab 11-j hadzinie na žančynu skłali pratakoł «za raspaŭsiud ekstremisckaj infarmacyi» (pa č. 2 art. 19.11 KaAP) — na jaje staronkach u sacsietkach znajšli spasyłki amal trochhadovaj daŭniny na infarmacyjnyja resursy, jakija ciapier pryznanyja «ekstremisckimi».
Adnak u sud Ludmiłu Kaminskuju nie nakiravali ni ŭ toj samy dzień, ni na nastupny. Paśla nočy ŭ izalatary časovaha ŭtrymańnia jaje znoŭ pryvieźli ŭ rajadździeł milicyi i skłali jašče adzin pratakoł pa tym samym artykule.
«Heta takoje milicejskaje vynachodnictva — «pierazatrymańnie», kali 72 hadziny, jakija zakanadaŭstva dazvalaje trymać čałavieka za kratami da sudu, adličvajucca nanoŭ z momantu składańnia čarhovaha pratakoła, — tłumačyć pravaabaronca Pavieł Levinaŭ. —
20 kastryčnika žančyna źbirałasia adznačyć 60-hadovy jubilej. I jana całkam mahła b heta zrabić, kab sud pryznačyŭ joj štraf i adpuściŭ dadomu. Ale viciebskaja milicyja prajaviła siabie z najhoršaha boku: na Ludmiłu Kaminskuju skłali druhi pratakoł za dva dni i kinuli za kraty na ŭsie vychodnyja».
Pravaabaronca napisaŭ zvarot da prakurora horada Viciebska Andreja Šklareŭskaha, zaŭvažyŭšy, što ličyć pazicyju supracoŭnikaŭ Kastryčnickaha RAUS niezakonnaj i niehumannaj. Apošniaje tyčycca nie tolki sapsavanaha asabistaha śviata. Stałuju žančynu amal sutki katavali hoładam — z momantu źjaŭleńnia ŭ RAUS ranicaj 19 kastryčnika da śniadańnia ŭ IČU 20 kastryčnika.
Siabry Ludmiły Kaminskaj pierakananyja, što zatrymańnie napiaredadni jubileju — heta śviadomy ździek z boku supracoŭnikaŭ milicyi, jakija mieli ŭsie asabistyja danyja žančyny i mahli vyklikać jaje ŭ luby inšy dzień.
Pad uvahu supracoŭnikaŭ milicyi spadarynia Ludmiła trapiła nie ŭpieršyniu: jana była adnoj z šaści žančyn, jakich zatrymali ŭ studzieni 2021 hoda ŭ pryharadnym lesie padčas zaniatkaŭ sa skandynaŭskimi pałkami. Milicyjanty vyrašyli, što spadaryni, pieravažna piensijnaha vieku, vypravilisia ŭ les pravodzić niesankcyjanavanuju akcyju.
Toj incydent mieŭ šyroki rezanans, bo zatrymańnie było absalutna biazhłuzdym, i navat sudy admovilisia razhladać administracyjnyja spravy, raspačatyja suprać žančyn zvyšpilnymi milicyjantami.
Kamientary