Film «Na inšym bierazie» ź siaredziny vieraśnia idzie ŭ kinateatrach. Dziaržaŭnyja miedyja havorać pra vysokuju cikavaść naviedvalnikaŭ i vyklučna stanoŭčyja acenki ad hledačoŭ. Pravieryli, jakija acenki film atrymaŭ na resursach pra kino.
Vysokija pakazčyki prahladaŭ filma, stvoranaha na zakaz dziaržavy, kab vykryć žachi polskaha pryhniotu ŭ Zachodniaj Biełarusi, zabiaśpiečvajucca tradycyjnym dla ideałahičnych karcin mietadam — zahonam školnikaŭ, studentaŭ i biudžetnikaŭ u zały kinateatraŭ. Premjera filma była prymierkavanaja da 17 vieraśnia — dnia ŭźjadnańnia Uschodniaj i Zachodniaj Biełarusi, jaki byŭ abvieščany Dniom narodnaha adzinstva, — i dahetul praciahvaje iści ŭ kinateatrach bujnych haradoŭ.
Kali da naviedvalnaści možna prykłaści administracyjny resurs, to voś acenku hledačoŭ padrabić bolš składana.
Ale tut isnuje prablema, jakaja sama pa sabie ŭžo dosyć pakazalnaja acenka — film adsutničaje amal na ŭsich papularnych mižnarodnych bazach danych pa kiniematohrafie.
Niama jaho ni na Metacritic, ni na AllMovie, ni na Rotten Tomatoes.
Adšukaŭsia film tolki na Internet Movie Database, najbujniejšym u śviecie sajcie pa kiniematohrafie. Ale za dva miesiacy prakatu filma nivodnaja duša nie dała jamu jakoj-niebudź acenki.
Nieviadomy film i dla bolšaści «siabroŭskich» rasijskich prajektaŭ. Staronka filma na «Kino-tieatr.ru» nie maje recenzij i vodhukaŭ, na «Kino Mail.ru» dy Film.ru niama navat staronki pra film.
Adzinaje vyklučeńnie — rasijski «Kinopoisk»: tut jość i staronka, i acenki, i navat para recenzij.
Film na hetym sajcie sabraŭ ažno 1 072 acenki, atrymaŭšy vielmi nizki siaredni rejtynh 3.3. Mienš z navinak kino atrymaŭ chiba što rasijski prapahandyscki film «Śviedka», jaki byŭ całkam praihnaravany biełaruskimi hledačami i atrymaŭ siaredni rejtynh 3.0.
Pry hetym blizka da 60% hledačoŭ pastavili filmu «Na inšym bierazie» najnižejšuju acenku, i tolki kala 16% — najvyšejšuju. Varta adznačyć, što krajnija acenki, 1 i 10, zaŭsiody trochi vybivajucca ź siaredniaha raźmierkavańnia acenak hledačoŭ. Ale kali ŭ filma katehoryi B jany buduć pracentna adroźnivacca prykładna ŭdvaja ad susiednich acenak, to ŭ vypadku ź biełaruskim filmam usio nie tak.
Pačynajučy ad 1-ki i vyšej pracentnaja vaha acenak hledačoŭ «Na inšym bierazie» niaŭchilna źmianšajecca (tak, acenku 2 filmu pastavili 5,41% hledačoŭ, a acenku 9 — usiaho 1,97%). Ale ŭžo 10-ki jon atrymaŭ adrazu ad 15,82% hledačoŭ. Anałahičnaje raźmierkavańnie maje i rasijski film «Śviedka».
Takuju niezvyčajnuju kolkaść maksimalnych acenak možna vytłumačyć tolki tym, što rejtynhi prapahandysckich filmaŭ śviadoma nakručvalisia. Ale pierałamić ahulnuju niezadavolenaść ideałahičnaj pradukcyjaj nie atrymałasia.
Adzinyja dva recenzienty pastavili filmu stanoŭčyja acenki 9 i 6. Jany adznačyli ździŭleńnie vysokaj naviedvalnaściu filma ŭ kinateatrach, pachvalili ihru maładych akcioraŭ i «staroj hvardyi», atmaśfiernaść abstanoŭki i apieratarskuju pracu, ale byli niezadavolenyja tym, što była zamoŭčanaja tema «čyrvonaha teroru» suprać «ruskaha naroda», a taksama tym, što ŭ filmie zašmat biełaruskaj movy.
«Miarkujučy pa havorcy hierojaŭ, jakija pražyvajuć pa siužecie ŭ vioskach, składvajecca ŭražańnie, što paśla 1917 hoda ŭsie žychary terytoryi Biełarusi rezka stali razmaŭlać na biełaruskaj movie, što zusim nie adpaviadała rečaisnaści, tamu što bolšaja častka naroda razmaŭlała na ruskaj movie. Polskaja ž mova, jak i biełaruskaja, aktyŭna naviazvałasia, što, darečy, u filmie taksama nie zakranuta», — aburajecca adzin z recenzientaŭ.
Ale takoje ŭražańnie mahło zastacca tolki ŭ čałavieka z ruskim impierskim myśleńniem, bo pa-rusku tady ŭ vioscy nichto miž saboj nie razmaŭlaŭ — ni ŭ Zachodniaj, ni va Uschodniaj Biełarusi, a ŭ samim filmie jakraz usie hieroi havorać na čyściutkaj ruskaj movie, i tolki ludzi stałaha vieku karystajucca rodnaj movaj u vioscy.
Tym nie mienš, recenzient pastaviŭ filmu paraŭnalna vysokuju acenku, i hetaja detal pakazvaje na toje, kamu nasamreč moh spadabacca taki film.
«Naša Niva» — bastyjon biełaruščyny
PADTRYMAĆ«Pačaŭsia film — z zały stali sychodzić ludzi». Biełarus raskazaŭ, jak ludzi prahladajuć karcinu «Na inšym bierazie»
Pahladzieli film «Na inšym bierazie». Raskazvajem siužet i toje, što pabačyli ŭ kinateatry
«Enkavedešnik amal płača, što hinuć nievinavatyja». Vodhuk na film «Na inšym bierazie». I na mora pamyłak u im
Kamientary