Zabityja pamyłkova izrailskija zakładniki pisali reštkami ježy prośby ab dapamozie
Izrailskija vajskoŭcy pryznali, što zabojstva mužčyn, jakija trymali ŭ rukach bieły ściah, było parušeńniem «praviłaŭ viadzieńnia bajavych dziejańniaŭ».
Troje izrailskich zakładnikaŭ, pamyłkova zabitych sałdatami CACHAŁ u siektary Haza ŭ minułuju piatnicu, vykarystoŭvali reštki ježy, kab napisać prośby ab dapamozie, piša Bi-bi-si.
Zakładniki — 28-hadovy Jotam Chaim, 22-hadovy Samier Tałałka i 26-hadovy Ałon Šamryz — byli zabityja ŭ rajonie Šedžaja ŭ Hazie, dzie izrailskija vojski sutyknulisia z žorstkim supracivam bajevikoŭ CHAMAS.
Izrailskija vajskoŭcy pryznali, što zabojstva mužčyn, jakija trymali ŭ rukach bieły ściah, było parušeńniem «praviłaŭ viadzieńnia bajavych dziejańniaŭ».
Sa słoŭ izrailskaha vajskovaha čynoŭnika, jaki havaryŭ ź Bi-bi-si na ŭmovach ananimnaści, mužčyny vyjšli z budynka biez kašul, adzin ź ich nios pałku ź biełaj tkaninaj.
Pavodle słoŭ pradstaŭnikoŭ armii abarony Izraila, jakaja viadzie rasśledavańnie vypadku, mužčyny pražyvali ŭ budynku, pobač ź jakim ich zastrelili, «na praciahu niekatoraha času».
U niadzielu CACHAŁ paviedamiŭ, što padčas pieratrusu budynka izrailskija vajskoŭcy znajšli biełuju tkaninu, na jakoj reštkami ježy było napisana «SOS» i «Dapamažycie, 3 zakładniki».
Siemji zakładnikaŭ, jakija byli zachopleny bajevikami padčas napadu na Izrail 7 kastryčnika i zastajucca ŭ pałonie ŭ siektary Haza, zaklikajuć izrailski ŭrad ukłaści novaje pieramirje z CHAMAS, kab vyzvalić choć by častku pałonnych.
Pieršapačatkovaja ŭhoda pryviała da vyzvaleńnia bolš jak 100 zakładnikaŭ u abmien na paleścincaŭ, jakija adbyvali pakarańnie ŭ izrailskich turmach.
Premjer-ministr Bińjamin Nietańjachu nastojvaje, što «vajenny cisk nieabchodny jak dla viartańnia zakładnikaŭ, tak i dla pieramohi».
U niadzielu ministarka zamiežnych spraŭ Francyi Katryn Kałana padčas svajho vizitu ŭ Izrail zaklikała da «novaha nieadkładnaha i doŭhaterminovaha spynieńnia ahniu».
Jaje izrailski kaleha Eli Koen zajaviŭ, što spynieńnie ahniu było b pamyłkaj i «padarunkam CHAMAS».
Vialikabrytanija i Niamieččyna taksama zaklikali da «ŭstojlivaha spynieńnia ahniu», ale pry hetym nie kazali pra toje, što jano pavinna być nieadkładnym.
Ciapier čytajuć
Biełaruska pracuje ŭ Dubai rusałkaj, kab addać doŭh 20 tysiač dalaraŭ2
Kamientary