Cichanoŭskaja: Łukašenka pavinien uśviadomić: usia adkaznaść za mahčymyja nastupstvy dla krainy budzie lažać na im
Lidarka demakratyčnych sił Śviatłana Cichanoŭskaja zajaviła pra surjoznaje staŭleńnie da sihnałaŭ z Kijeva adnosna biaśpieki ŭ rehijonie i źviarnułasia da biełarusaŭ.
Śviatłana Cichanoŭskaja zajaviła, što biełaruskija demakratyčnyja siły surjozna staviacca da ŭsich sihnałaŭ, jakija pastupajuć ad ukrainskaha boku adnosna ŭciahvańnia Biełarusi ŭ vajnu i biaśpieki ŭ rehijonie.
«Va Ukrainy jość usie padstavy być pilnaj: mienavita ź biełaruskaj terytoryi ŭ 2022 hodzie pačałosia rasijskaje ŭvarvańnie, i siońnia režym Łukašenki praciahvaje padtrymlivać rasijskuju ahresiju», — adznačyła jana.
Pavodle jaje słoŭ, na hetym tydni ŭ Kijevie Misija demakratyčnych siłaŭ Biełarusi va Ukrainie praviała kruhły stoł, na jakim ekśpierty i pradstaŭniki BELPOL pradstavili infarmacyju pra militaryzacyju Biełarusi i płany Rasii pa dalejšym uciahvańni našaj krainy ŭ vajnu. Hetyja pahrozy nielha ihnaravać abo niedaaceńvać — da ich nieabchodna stavicca z poŭnaj surjoznaściu.
«Ukraina razmaŭlaje z Łukašenkam movaj siły, bo mienavita jaje jon razumieje lepš za ŭsio. Łukašenka pavinien uśviadomić: usia adkaznaść za mahčymyja nastupstvy dla krainy budzie lažać na im», — adznačyła jana.
Cichanoŭskaja nahadała, što režym Łukašenki zastajecca saŭdzielnikam ahresii. Jon pradastaŭlaje terytoryju i infrastrukturu, dapamahajučy Rasii navodzić udary pa ŭkrainskich haradach, pastaŭlaje Rasii zbroju, paliva i abstalavańnie dla rasijskaj vajennaj mašyny.
«Kali Łukašenka sapraŭdy choča miru, jon pavinien dakazać heta nie słovami, a kankretnymi dziejańniami: spynić lubuju padtrymku ahresii», — skazała jana.
Jana źviarnułasia da biełarusaŭ:
«Ja viedaju, što biełarusy suprać vajny. Tamu źviartajusia da kožnaha z vas: bieražycie siabie i nie dazvalajcie ŭciahnuć siabie ŭ čužuju vajnu. Nie paddavajciesia prapahandzie, nie viercie ŭ naviazanyja strachi i varožaść. Nie stanaviciesia instrumientam u čužych impierskich ambicyjach — bo heta nie naš vybar.
Našaja ahulnaja zadača — nie dapuścić, kab Biełaruś była kančatkova ŭciahnutaja ŭ vajnu. Heta adpaviadaje pierš za ŭsio nacyjanalnym intaresam našaj krainy».
Ciapier čytajuć
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!3
Kamientary
====
Muraŭjoŭ-viešalnik pavinien uśviadomić: usia adkaznaść za mahčymyja nastupstvy dla krainy budzie lažać na im
Łaŭreńcij Canava pavinien uśviadomić: usia adkaznaść za mahčymyja nastupstvy dla krainy budzie lažać na im
=====
A što, u rasijskaha šavinistaha jość peŭnyja santymenty da biełaruskaha "narodca", jaki žyvie na "kłočkie ziemli" z movaj, na jakoj "nielzia vyraziť ničieho vielikoho"? Zaraz jon faktyčna represuje bolšaść hramadztva, što suprać jaho. Była b jaho vola - jon by biełarusaŭ - u Sibir, Kurapaty. Niezdarma jon zabaraniŭ film pra Kurapaty. Jak jaho pierakručaje ad hetych "śviadomych", "zmaharoŭ".
Na im, jahonych dzieciach i ŭnukach.