Ataka na NPZ u Maskvie — jak «najlepšaja SPA ŭ Rasii» prapuściła ŭdar pa stalicy?
Nakryŭka naftavaha reziervuara, padkinutaja ŭ nieba vybucham, stała jarkim simvałam nalotu ŭkrainskich dronaŭ na Maskvu. Usiaho niekalki bieśpiłotnikaŭ zmahli dalacieć da celi — NPZ u Kapotni — i parazić jaje, adnak dym ad pažaraŭ nad stalicaj Rasii vyklikaŭ vialiki rezanans.
Maskva, jak śćviardžajuć mnohija błohiery i ekśpierty, źjaŭlajecca adnym z najbolš abaronienych miescaŭ u Rasii. Da jaje ściahnuli vialikuju kolkaść sistem supraćpavietranaj abarony. Tamu ŭdar, jaki dasiahnuŭ celi — naftapierapracoŭčaha zavoda — u hetak abaronienym miescy, vyklikaŭ abureńnie z boku niekatorych prarasijskich błohieraŭ. Kanały ź vialikaj kolkaściu padpisčykaŭ albo nie krytykavali pracu SPA, albo vydalali svaje zapisy, ale ŭ nievialikich krytyki chapała, piša VVS.
«Učora i siońnia bieśpiłotniki znoŭ dalacieli da Maskvy i Padmaskoŭja. Razam ź imi viarnułasia i hałoŭnaje pytańnie pra toje, dzie abiacanaja niepranikalnaja sistema SPA stalicy dziaržavy, jakaja piaty hod uciahnuta ŭ najbujniejšy vajenny kanflikt u Jeŭropie?» — piša kanał «Kriemlevskaja matrieška».
Acanić jakaść SPA Maskvy niaprosta. Kolki mienavita bieśpiłotnikaŭ było zapuščana pa Maskvie, nieviadoma. Ministerstva abarony Rasii ŭ čaćvier ranicaj zajaviła, što za sutki nad terytoryjaj Rasii, u jakuju jany ŭklučajuć anieksavany Krym, byli źbity 992 drony i čatyry kryłatyja rakiety.
Mer Maskvy Siarhiej Sabianin skazaŭ, što pavodle danych na 9:40 ranicy 18 červienia na padlocie da horada byli źbity 194 bieśpiłotniki.
«Sapraŭdy, dronavyja ataki praciahvajucca. Prymajucca adpaviednyja miery pa likvidacyi nastupstvaŭ. Vysokija pakazčyki sistem SPA, niahledziačy ni na što», — tak prakamientavaŭ nastupstvy nalotu pres-sakratar rasijskaha prezidenta Dźmitryj Piaskoŭ.
Kolki mienavita bieśpiłotnikaŭ dalacieła da celi, taksama nieviadoma. Sudzić pra heta pa słupach dymu, što padymalisia nad Maskvoj, nielha, bo ŭ adzin i toj ža abjekt mahli prylacieć niekalki dronaŭ.
Hienštab USU paviedamiŭ, što ŭ vyniku nalotu na NPZ utvaryłasia «nie mienš za piać punktaŭ hareńnia»: «Pavodle papiaredniaj hieałakacyi, harać kambinavanaja ŭstanoŭka pierapracoŭki nafty, ustanoŭki druhasnaj pierapracoŭki i reziervuarny park».
Na kadrach nalotu, zroblenych vidavočcami, bačny bieśpiłotniki, jakija paśla traplańnia ŭ ich rakiety padajuć i vybuchajuć na ziamli. Narešcie, viersija, zhodna ź jakoj reziervuar z nakryŭkaj, što ŭźlacieła ŭ nieba, mahła padarvać rakieta SPA, jakaja patrapiła tudy pa pamyłcy, nabiraje papularnaść siarod kamientataraŭ.
SPA Maskvy
U kamientaryjach i navinavych paviedamleńniach pra nalot čaściej za ŭsio havorycca, što NPZ u Kapotni parazili «niekalki» dronaŭ. Heta słova nie paznačaje dakładnuju ličbu, ale ŭ hutarkovaj movie jaho časta vykarystoŭvajuć dla paznačeńnia ad adnaho da dziesiaci.
I kali SPA Maskvy sapraŭdy źbiła 192 drony, a da celi prarvalisia navat 10, to hety pakazčyk efiektyŭnaści SPA i praŭda možna ličyć vysokim. Ukrainskaja supraćpavietranaja abarona, pavodle acenak ukrainskich vajskoŭcaŭ, pierachaplivaje kala 90% celaŭ, a pa dalokich bieśpiłotnikach hety pakazčyk dasiahaje 92%. Heta ličycca dobrym vynikam. Takoha vyniku možna dasiahnuć, naprykład, vysokaj kancentracyjaj srodkaŭ supraćpavietranaaj abarony, jakaja jość u Maskvie i Maskoŭskaj vobłaści.
Maskva tradycyjna ličyłasia samym abaronienym miescam ad atak z pavietra. Heta tyčyłasia ŭdaraŭ mižkantynientalnych balistyčnych rakiet (nakolki ad ich naohuł možna abaranicca), kryłatych rakiet i zvyčajnych bajavych samalotaŭ.
Adnak drony ŭjaŭlajuć saboj pa sutnaści lohkamatorny samalot, jaki pavolna lacić na nievialikaj vyšyni ŭ dziasiatki mietraŭ i nie vielmi dobra bačny na radary. Zaŭvažyć jaho niaprosta, źbić taksama: jon znachodzicca ŭ zonie dziejańnia sistemy SPA niadoŭhi čas. Tamu vielmi važna svoječasova zaŭvažyć dron, adsačyć kirunak jaho palotu i papiaredzić srodki pierachopu pra toje, što jon chutka źjavicca ŭ zonie ich dziejańnia.
Za čas vajny z Ukrainaj vakoł Maskvy byli stvorany pazicyi ZRK blizkaha radyusa dziejańnia — takich, jak «Tor» abo «Pancyr». Akramia taho, z dronami zmahajucca strałkovaj zbrojaj i pieranosnymi zienitnymi kompleksami. Akramia ich, z dronami možna zmahacca i avijacyjaj — dla hetaha dobra padychodziać udarnyja i zvyčajnyja šmatmetavyja viertaloty. Ale ich niebiaśpiečna vykarystoŭvać pablizu naziemnych sistem, pakolki vialikaja vierahodnaść pamyłki — ahniu pa svaich.
Adnak jakoj by nasyčanaj ni była supraćpavietranaja abarona, kolkaść aparataŭ, jakuju jana moža pierachapić, abmiežavanaja. Jana nie moža pieravysić kolkaść rakiet u zienitnych ustanoŭkach. Tamu navat tearetyčna možna raźličyć tuju kolkaść bieśpiłotnikaŭ, jakaja pieraadoleje SPA. Na praktycy, miarkujučy pa kadrach, zroblenych padčas nalotu na Kapotniu, bačna, što davoli šmat rakiet, puščanych pa dronach, pramachvajucca, pavialičvajučy vierahodnaść praryvu.
Taktyka
Masiravanaje prymianieńnie vajennaj techniki — asnova ŭdarnaj taktyki. Ale Ukraina tracić šmat namahańniaŭ nie tolki na vytvorčaść udarnych dronaŭ, ale i na padrychtoŭku samich udaraŭ.
Vydańnie Politico apublikavała 19 červienia, heta značyć na nastupny dzień paśla nalotu na Kapotniu, vialiki materyjał, u jakim raspaviało pra padrychtoŭku nalotaŭ bieśpiłotnikaŭ na Rasiju.
U im havorycca, što ŭkrainskija vajskoŭcy imknucca ŭ kožnym nalocie vykarystoŭvać roznyja srodki — bieśpiłotniki-kamikadze vialikaj dalnaści, drony-prynady i BPŁA rakietnaha typu, heta značyć, pa sutnaści, — kryłatyja rakiety.
Takuju taktyku vykarystoŭvajuć i rasijanie, jakija časta zapuskajuć razam z «Šachiedami» kryłatyja i balistyčnyja rakiety — raznastajny skład srodkaŭ paražeńnia ciažka pierachapić.
USU prymianiajuć dla padrychtoŭki i praviadzieńnia atak śpiecyjalnuju sistemu kiravańnia «Pryzma», jakaja ŭklučaje ŭ siabie štučny intelekt, havorycca ŭ materyjale Politico. Jana źbiraje i analizuje apieratyŭnyja danyja, paśla čaho ź jaje dapamohaj płanujecca čarhovy ŭdar.
«My viedajem, jak jany pieramiaščajuć svaje sistemy SPA i srodki radyjoelektronnaj baraćby kožny dzień i kožnuju hadzinu. Kožnuju noč my vykarystoŭvajem roznyja maršruty palotaŭ. My nikoli ich nie paŭtarajem», — cytuje vydańnie ŭkrainskaha aficera z pazyŭnym «Viektar».
«Narodnaja SPA»
Adzin z rasijskich vajennych błohieraŭ — «reparcior Fiłataŭ» — paśla nalotu napisaŭ hnieŭny post, u jakim raskrytykavaŭ sistemu zakupak Ministerstva abarony Rasii.
«Usio, što lacieła pa Msk — «łajno i pałki», jakija byli viadomyja hady 2 jak. Hetyja «łajno i pałki» marnujuć najlepšyja ŭ śviecie SPA-rakiety za šmat miljonaŭ, razradžajuć SPA i jak vynik videa vyšej. 3 hady ŭsie, chto ŭ temie, kazali pra nieabchodnaść raźvićcia «małoj SPA» z «łajna i pałak», h. zn. jakaja stvarajecca ŭ haražach», — havorycca ŭ jaho publikacyi.
U Rasii mnohija vajennyja błohiery krytykujuć hruvastkuju i niepavarotlivuju sistemu zakupak Minabarony, jakaja, pavodle ich słoŭ, zanadta pavolna reahuje na novyja pahrozy i formy vajny, jakija vielmi chutka źmianiajucca.
Rasijskaje kiraŭnictva sprabuje prajavić hnutkaść, stvaraje novyja dla siabie formy supraćpavietranaj abarony — arhanizuje mabilnyja ahniavyja hrupy, u kancy maja Minabarony pasprabavała adrehulavać miechanizm zakupki sistem SPA pryvatnymi pradpryjemstvami.
Na kadrach nalotu na Kapotniu było vidać i čuvać pracu strałkoŭ: drony lacieli da celi pad kananadu strełaŭ z aŭtamataŭ i kulamiotaŭ. Na adnym z kadraŭ, mahčyma, źbity bieśpiłotnik byŭ paražony strałkovym ahniom ź ziamli.
Ale navat kali praca SPA stanie jašče bolš efiektyŭnaj, u vypadku z Maskvoj heta nie vyrašyć prablemy taho, što drony na apošnich kiłamietrach da celi laciać nad ščylnaj haradskoj zabudovaj.
Kali bieśpiłotnik źbivajuć i jon nie vybuchaje ŭ pavietry, to jon padaje na ziamlu, dzie moža patrapić u žyły dom abo, naprykład, handlovy centr, jak heta zdaryłasia 18 červienia. Tady dva drony ŭpali na rynak «Sadavod» i handlovy centr «Biełaja dača».
Jak tolki dron dalacieŭ da vialikaha horada, jon užo vykanaŭ bajavuju zadaču — navat kali jaho sabjuć,
to heta, chutčej za ŭsio, budzie źniata na telefon i vykładziena ŭ internet. I jak minimum psichałahičny efiekt ad ataki budzie dasiahnuty.
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary