«Biada, na vialiki žal, užo stupaje na paroh Siniavokaj». Ultymatum Zialenskaha Łukašenku: što budzie dalej?

Ultymatyŭnaje patrabavańnie Ukrainy, kab Biełaruś ciaham tydnia spyniła karektavać maršruty rasijskich dronaŭ, pryjšło pa viartańni Uładzimira Zialenskaha z sustrečy ź lidarami G-7, pa ŭdary Ukrainy ŭ NPZ pad Maskvoj i paśla ŭltymatumu jeŭrapiejskich dziaržaŭ Maskvie, pieradadzienaha Siarhieju Łaŭrovu pasłami Francyi, Hiermanii i Brytanii 7 červienia.

Poŭny źmiest jeŭrapiejskaha ŭltymatumu Maskvie dahetul u ŚMI nie raskryty. Toje, što rasijskaje dypłamatyčnaje viedamstva nie zrabiła hetaha, pakazvaje surjoznaść zajaŭlenaha. Miarkujučy pa ŭsim, Maskvie prapanavali pahadzicca na spynieńnie ahniu, u advarotnym vypadku krainy Zachadu zdymuć abmiežavańni na ŭdary Ukrainy ŭhłyb rasijskaj terytoryi. Varta adznačyć, što ŭ vajskovym sensie Biełaruś ujaŭlaje saboj praktyčna častku Rasii — i technična, i ideałahična.

Ultymatum Uładzimira Zialenskaha Łukašenku ahučany publična. Z adnaho boku, jon ćviordy: ź Minskam raniej tak nie razmaŭlali. Z druhoha boku, jon davoli niekankretny — što daje prastoru dla interpretacyi.

Alaksandr Łukašenka, jaki zvyčajna nie strymlivajecca ŭ słovach adnosna ŭsich, chto jamu havoryć papiarok, u hetym vypadku nie śpiašajecca. Pakul jaho asabistaj reakcyi niama.

Biełaruskaja prapahanda, u svaju čarhu, viarnułasia da nazyvańnia ŭkraincaŭ «banderaŭcami» i «ŭkranacystami».

Pieršaj reakcyjaj prapahandysckaha aparata roznych uzroŭniaŭ staŭ jadzierny šantaž.

«Samaje hałoŭnaje ŭ hetaj situacyi — nieadkładny adkaz na napad usimi siłami i srodkami, uklučajučy jadziernuju zbroju, — napisaŭ učora deputat Pałaty pradstaŭnikoŭ Alaksandr Špakoŭski. — Heta budzie realnaj pravierkaj našych sajuznych damoŭlenaściej. Davieści hetuju pazicyju treba nie stolki narkamanu (tak vietliva i zhodna z rasijskim prapahandysckim šabłonam jon nazyvaje Uładzimira Zialenskaha — NN), kolki krainam Jeŭropy i ZŠA».

Luboje ŭžyćcio jadziernaj zbroi vykliča źniščalny ŭdar u adkaz — spačatku kanviencyjnaj, a pry patrebie — i atamnaj zbrojaj, paśla čaho Biełarusi, u tym vyhladzie, u jakim my jaje viedajem, prosta nie zastałosia b. Mahčymaść pierarastańnia vajny ŭ jadziernuju tryvožyła zachodnija raźviedki ŭ 2022—2023 hadach, ciapier takoje raźvićcio padziej analityki ličać małaimaviernym, bo parazy abmiežavanaha charaktaru na froncie nie niasuć pahrozy rasijskamu režymu.

Analityka Juryja Drakachrusta tryvožyć inšaje mahčymaje nastupstva kinietyčnych udaraŭ pa terytoryi Biełarusi — uviadzieńnie ŭ Biełaruś jašče bolšaj kolkaści rasijskich vojskaŭ i dalejšaje razmyvańnie suvierenitetu krainy.

«Jość tut jurydyčny bok — ci jość raźmiaščeńnie retranślataraŭ, jakija stajać davoli daŭno, zakonnaj padstavaj dla vajennych dziejańniaŭ pa ich niejtralizacyi? Ale šmat bolš važny palityčny bok — jašče adzin teatr vajennych dziejańniaŭ na miažy jašče dźviuch krainaŭ NATO, patok uciekačoŭ, udar pa łahistycy handlu z Kitajem i šmat čaho inšaha, navat kali nie ŭličvać biełaruskich achviaraŭ vajny, — piša ŭ siabie ŭ sacsietkach Jury Drakachrust. — Nu i jość jašče adno važnaje dla Jeŭropy i ZŠA pytańnie — a chto budzie kiravać uciahnutaj u vajnu Biełaruśsiu? Łukašenka? Cichanoŭskaja? A nie Pucin časam? I nie tak, jak jon i ciapier šmat na što ŭpłyvaje ŭ Biełarusi, a jak akupavanaj, skažam, Łuhanskaj vobłaściu Ukrainy. Naŭprost, ažyćciaŭlajučy ŭ tym liku i cyvilnaje kiravańnie. Ukrainskija rakiety i drony razam z Pałkom Kalinoŭskaha zdolnyja heta praduchilić? Nie vyklučana, što ŭ jeŭrapiejskich stalicach u hetym nie buduć tak užo ŭpeŭnienyja», — miarkuje Jury Drakachrust.

«Moža, u vyniku retranślatary navat i prybiaruć, — dapuskaje jon. — Ale kali nie, kali dypłamatyja nie spracuje, praz tydzień dla Biełarusi moža adkrycca brama ŭ piekła», — piša Jury Drakachrust.

Toj samy niepakoj vykazvaje ŭ svaich sacsietkach inšy žurnalist radyjo «Svaboda», Dźmitryj Hurnievič: «Kali Ukraina praz tydzień udaryć pa vajskovych abjektach na terytoryi Biełarusi, to parušyć hetym samym status-kvo, jakoje isnuje piaty hod adnosna Biełarusi. Tady Pucin atrymaje «apraŭdańnie», kab «baranić Biełaruś». Što tady moža pačacca, lepš nikomu navat nie ŭjaŭlać. Biełaruskija palityki pavinny na hałavu zaraz stać, kab hetaha nie stałasia, a nie zajmać pazicyju padčas školnaj bojki, kali adny raściahvajuć bojku, a trecija adciahvajuć ich, bo bojka heta ž viesieła. Aby nie było vajny, jak ni dziŭna, zaraz vielmi tałkovy łozunh», — piša Hurnievič.

«Ukraina nie źviartałasia ŭ Radu Biaśpieki AAN, nie pradstaŭlała nijakich śviedčańniaŭ niepaźbiežnaj pahrozy z boku Biełarusi i nie pravodziła pa hetym pytańni navat niefarmalnych kansultacyj z čalcami Rady Biaśpieki, — krytykuje Zialenskaha apazicyjanier da apazicyi, były biełaruski dypłamat Valer Kavaleŭski. — Možna zrabić vysnovu, što śviedčańniaŭ realnaj vajennaj pahrozy z boku Biełarusi dla Ukrainy nie było pradstaŭlena. Ultymatum Kijeva vyhladaje rezkim padvyšeńniem stavak biez dokazaŭ novaj pahrozy i biez praliku nastupstvaŭ chacia b na adzin chod. U vyniku Ukraina, a razam ź joj i krainy ES mohuć bolš stracić, čym zdabyć, kali kanflikt pieraraście ŭ rehijanalny», — piša Kavaleŭski ŭ siabie ŭ fejsbuku.

Pierśpiektyvy dla Biełarusi jon pry hetym nazyvaje «katastrafičnymi».

«Eskałacyja pačałasia ŭ 2022 z boku rasijskich i biełaruskich uładaŭ. Prosta tady Ukraina nie mieła mahčymaściaŭ na hetu eskałacyju adkazać tak, jak patrabavała situacyja. Časy źmianilisia, ciapier Ukraina moža heta zrabić i hučna pramaŭlaje, što ŭmovy, jakija jana vymušana była pryniać u 2022 u dačynieńniach ź Biełaruśsiu, joj nie padychodziać. Raniej taksama nie padychodzili, prosta zrabić z hetym jana ničoha nie mahła. A zaraz, mabyć, ličyć, što moža. I prapanoŭvaje viarnuć situacyju da stanu da 2022, to bok da pieršapačatkovaj eskałacyi. Abranaja forma (ultymatum), viadoma, nie spryjaje vyrašeńniu hetaj mety. Jak i pašyreńnie vajskovych dziejańniaŭ na terytoryju Biełarusi naŭrad ci adpaviadaje intaresam Ukrainy. Ale niešta z vajskovaj infrastrukturaj Rasii ŭ Biełarusi rabić treba, nie? Hladzieć, jak jaje vykarystoŭvajuć dla zabojstvaŭ svaich hramadzian Ukrainie vidavočna nie padabajecca. To, moža, i ŭładam Biełarusi pavinna nie chaciecca svaich hramadzian pad ryzyku takuju stavić? I treba pierastać dapamahać Rasii zabivać ukraincaŭ?» — adkazaŭ Kavaleŭskamu inšy były biełaruski dypłamat, Pavieł Śluńkin.

«Tak, zaraz ataka banderaŭcaŭ na našu krainu realnaja jak nikoli. Tamu naš adziny adkaz — zhurtavańnie vakoł Prezidenta i hatoŭnaść abaraniać krainu. Usie, chto suprać — vorah», — piša prapahandyst Alaksiej Dziermant.

Jaho kanał «Čyrvonaja Skifija» zaklikaje vieryć u Alaksandra Łukašenku: «Nichto inšy akramia hetaha sapraŭdnaha RUSKAHA čałavieka nie kłapocicca lepš pra svaju krainu i nichto lepš za prezidenta Biełarusi nie razumieje canu miru. I ŭ Rasii niama sajuźnika nadziejniejšaha za hetaha čałavieka. I zaraz, kali biada, na vialiki žal, užo stupaje na paroh Siniavokaj, tolki hety čałaviek uratuje i abaronić», — dramatyčna piša Dziermant.

Jaki vajenny patencyjał Ukrainy i čym moža adkazać Biełaruś

A što možna skazać pra srodki realizacyi pahroz?

Naŭrad ci Ukraina maje niejki nazapašany rezierv takich uzbrajeńniaŭ, jakija jana nie vykarystoŭvała suprać Biełarusi, ale moža vykarystać suprać Rasii. Heta značyć, što Kijeŭ moža raspaŭsiudzić na Biełaruś ataki taho typu, jakija nanosiacca pa abjektach u hłybini RF. 

Najpierš havorka pra kropkavyja dronavyja ŭdary suprać biełaruskich vyšak suviazi na poŭdni Paleśsia. Anałahičnuju baraćbu Ukraina daŭno viała ŭzdoŭž usioj linii frontu.

Lubyja ataki bolšaha maštabu stvarali b ryzyki bolš maštabnych udaraŭ u adkaz.

U svaju čarhu, płanamiernyja ataki pa rasijskim naftahazavym siektary majuć na mecie danieści da abałvanienaha šavinistyčnaj prapahandaj nasielnictva Rasii, što vajna — pobač i što Pucin nie pieramahaje. U niejki momant dla dasiahnieńnia hetaj mety Kijeŭ i jaho sajuźniki mohuć paličyć nieabchodnym adrezać i biełaruskija NPZ — kali jany stanuć vyratavalnym kołam dla zapravak jeŭrapiejskaj častki Rasii.

Naŭrad ci Minsk maje bolšuju ščylnaść SPA, čym sama Rasija, i vialiki zapas bojekamplektu SPA va ŭmovach, kali sama Rasija, miarkujučy pa mnohich prykmietach, pačała adčuvać jaho deficyt. Heta značyć, što adbić ukrainskija dronavyja ataki ŭjaŭlała b składanaść dla biełaruskaj armii. A voś udary z F-16 pa abjektach, prykrytych biełaruskimi S-300 i «Pancyrami», naŭrad ci realizabielnyja — kali tolki biełaruskaje nieba nie aholenaje, kab prykryć rasijskaje.

Što da mahčymaści suchaputnaj apieracyi, to hety scenar ryzykoŭny. Naŭrad ci jon aktualny na hetym etapie, choć abaraniać terytoryi na poŭdzień ad Prypiaci łahistyčna składana. Biełaruskija ŭłady i madernizavali masty cieraź vialikuju paleskuju raku ŭ Mazyry i Žytkavičach. Budaŭnictva jašče adnaho mosta, miž Łuninieckim i Stolinskim rajonami, płanujecca.

Niebiaśpiečnym dla Ukrainy scenarom było b adnaŭleńnie ŭdaraŭ pa poŭnačy Ukrainy rakietami i dronami z terytoryi Biełarusi, jak toje mieła miesca ŭ 2022 hodzie. Padlotny čas ich mały, u vypadku takoha adkazu Ukraina vymušanaja była b razhledzieć varyjant intensiŭnych, a nie kropkavych apieracyj na terytoryi Biełarusi. 

Sam ton, jakim Kijeŭ ciapier razmaŭlaje ź minskimi staŭlenikami Maskvy, pakazvaje, jak źmianiŭsia bałans siłaŭ u rehijonie. Biełaruś zastajecca na pazicyi tatalnaj padtrymki Rasii. Napeŭna, kali b Minsk źmianiŭ pazicyju na niejtralnuju i narmalizavaŭ adnosiny z krainami Jeŭrasajuza, takich razmoŭ nie było b i pahrozy nie hučali b. 

• 1
• 0
• 1
• 1
• 0
• 0
• 0
• 0