Kampanija, jakaja raspracavała samy darahi ŠI-startap u śviecie, maje niezvyčajnuju strukturu kiravańnia
«Heta daje nievierahodnuju svabodu», — kaža kiraŭnik Anthropic Darya Amadei.
U kiraŭnika Anthropic Darya Amadei tolki adzin supracoŭnik u pramym padparadkavańni — jaho chief of staff (kiraŭnik aparatu). Astatnija kiraŭniki kampanii dajuć spravazdaču pierad prezidentam Anthropic Daniełaj Amadei, jaho siastroj i suzasnavalnicaj kampanii, piša devby.io.
«Heta daje nievierahodnuju svabodu», — raspavioŭ Amadei. Pavodle jaho słoŭ, takaja struktura dazvalaje jamu zasiarodzicca na stratehii, źniešnich pieramovach i inšych zadačach, nie traciačy čas na kiravańnie vialikaj kamandaj kiraŭnikoŭ.
Padychod Anthropic niezvyčajny dla bujnoj technałahičnaj kampanii. U siarednim u hienieralnaha dyrektara kala dziesiaci pramych padnačalenych, tady jak u Amadei — tolki adzin. Pry hetym Anthropic naličvaje bolš za 2 tysiačy supracoŭnikaŭ.
U supraćlehłaść hetamu kiraŭnik Nvidia Džensien Chuanh naŭprost kiruje prykładna 60 top-mieniedžarami. Jon ličyć, što šyrokaja struktura dapamahaje jamu atrymlivać infarmacyju z roznych častak kampanii i abmiarkoŭvać prablemy adrazu ź vialikimi hrupami kiraŭnikoŭ.
Ekśpierty pa kiravańni adznačajuć, što ŭniviersalnaj kolkaści pramych padnačalenych nie isnuje. Nievialikaja kolkaść kiraŭnikoŭ u padparadkavańni dazvalaje hienieralnamu dyrektaru zasiarodzicca na stratehii i źniešnich adnosinach, ale patrabuje vysokaha davieru da kiraŭnickaj kamandy. Šyrokaja struktura, naadvarot, skaračaje biurakratyju i dapamahaje kiraŭniku kampanii być bližej da apieracyjnych pracesaŭ, ale moža pierahružać jaho.
U Anthropic za apieracyjnaje kiravańnie šmat u čym adkazvaje Danieła Amadei. Darya Amadei pry hetym moža ŭdzialać bolš uvahi raźvićciu madelaŭ niejrasietki Claude, biaśpiecy ŠI i pieramovam z uładami ZŠA.
Na fonie ŠI-bumu kampanii ŭsio čaściej pierahladajuć kiraŭnickija struktury. Adny, jak Anthropic, robiać staŭku na bolš vuzkuju viertykal kiravańnia. Inšyja, uklučajučy Meta i Nvidia, pašyrajuć kolkaść supracoŭnikaŭ i kiraŭnikoŭ, jakija naŭprost dajuć spravazdaču pierad kiraŭnikom kampanii.
Ciapier čytajuć
Zialenski nazvaŭ, jakija retranślatary na miažy i biełaruskija pradpryjemstvy chvalujuć Ukrainu36
Kamientary