Zialenski ci Załužny — kamu ŭkraincy daviarajuć bolš? Vyniki sacapytańnia
Davier hramadzian Ukrainy da prezidenta Uładzimira Zialenskaha źniziŭsia z 84% u śniežni 2022 hoda da 62% u śniežni 2023-ha. Kijeŭski mižnarodny instytut sacyjałohii apublikavaŭ vyniki apytańnia, praviedzienaha z 29 listapada da 9 śniežnia 2023 hoda, piša «UP».
Pa vynikach apytańnia, Uładzimir Zialenski, niahledziačy na niekatoraje padzieńnie rejtynhu, zachoŭvaje pieravažny davier siarod ukrainskaj hramadskaści.
Tak, ciapier 62% apytanych daviarajuć prezidentu Ukrainy, a nie daviarajuć — 18%. U śniežni 2022 hoda 84% daviarali jamu, nie daviarali — 5%. Adpaviedna, kali bałans davieru-niedavieru ŭ śniežni 2022 hoda dla prezidenta składaŭ +80%, to ciapier jon składaje +42%.
«Heta značyć, z adnaho boku, bačym istotnaje źnižeńnie, ale, z druhoha boku, jon zastajecca adnaznačna stanoŭčym sa značnaj pieravahaj tych, chto daviaraje prezidentu, u paraŭnańni z tymi, chto jamu nie daviaraje», — pakazvajuć sacyjołahi.
Absalutny davier u hramadstvie zachoŭvajuć Uzbrojenyja siły Ukrainy — jak i ŭ śniežni 2022 hoda, tak i ciapier 96% daviarajuć USU.
Akramia hetaha, 88% ukraincaŭ daviarajuć hałoŭnakamandujučamu Valeryju Załužnamu (nie daviarajuć — tolki 4%).
Taksama sacyjołahi pakazvajuć na toje, što ŭ biahučaj situacyi važna razumieć, jak «pierasiakajucca» pali davieru da prezidenta i hałoŭnakamandujučaha. Bolšaść ukraincaŭ, abo 59%, adnačasova daviarajuć i prezidentu Ukrainy, i hałoŭnakamandujučamu.
Dola ŭkraincaŭ, jakija majuć palaryzavanyja pohlady, zjaŭlajecca dastatkova nievialikaj. Tolki 14% daviarajuć hałoŭnakamandujučamu i pry hetym nie daviarajuć prezidentu, i tolki 1% daviaraje prezidentu, ale nie daviaraje hałoŭnakamandujučamu.
Ciapier čytajuć
Chto pradaŭ kvateru ŭ «Majaku Minska» źnikłaj Mielnikavaj? Takoha čałavieka nie isnuje8
Kamientary