Mužčyna z Paŭnočnaj Irłandyi vyjhraŭ 4 miljony jeŭra, ale praciahnuŭ pracavać dastaŭščykam, kab nie padvieści kaleh
«Ranicaj u niadzielu ja siadzieŭ na krai łožka i sprabavaŭ zrazumieć, što ja baču», — kaža Džoni Džonstan.
16 śniežnia 45-hadovy Džoni Džonstan z hrafstva Fierman u Paŭnočnaj Irłandyi vyjhraŭ u łatareju 3,8 miljona funtaŭ sterlinhaŭ. Adnak jon usio roŭna vyjšaŭ na pracu i praciahnuŭ razvozić pradukty klijentam, kab dać adpačyć svaim kaleham, piša Bild.
Džonstan byŭ udzielnikam Nacyjanalnaj łatarei na praciahu 26 hadoŭ, tamu, kali jon atrymaŭ paviedamleńnie na elektronnuju poštu ŭ siaredzinie śniežnia, jon navat nie adrazu adkryŭ jaho, padumaŭšy, što čarhovy raz jamu dastaŭsia nievialiki vyjhryš. Tolki na nastupny dzień jon zrazumieŭ, što ŭ nabytym łatarejnym bilecie supali ŭsie šeść ličbaŭ.
«Ranicaj u niadzielu ja siadzieŭ na krai łožka i sprabavaŭ zrazumieć, što ja baču. Ja prosta hladzieŭ na ličby ŭ svaim akaŭncie. Ja padumaŭ, što, mahčyma, vyjhraŭ 38000 funtaŭ sterlinhaŭ, ale potym źjaviłasia zanadta šmat nuloŭ. Ja pieradaŭ telefon žoncy, kab jana pravieryła, i jana taksama nie mahła ŭ heta pavieryć. My aboje padumali, što heta rozyhryš ci navat machlarstva», — raspavioŭ Džonstan.
Niahledziačy na bujny vyjhryš, dastaŭščyk vyjšaŭ na pracu napiaredadni Kaladaŭ i razvoziŭ pradukty, kab nie padvieści svaich kalehaŭ. Pakul što i jon, i jaho žonka majuć namier zachavać pracoŭnyja miescy.
«My pavinny zastavacca pryziemlenymi, heta nie robić nas inšymi ludźmi. Nam padabajecca praca. Jana prymušaje nas być napahatovie i daje nam adčuvańnie mety», — skazała žonka Džoni Kryścin.
Ciapier siamja źbirajecca pajechać na Karyby, nabyć aŭtamabil i traktar.
Kamientary