Hałoŭny litoŭski pamiežnik: Nie vieru, što biełarusy, jakija vyjšli ź ciahnika ŭ Vilni, chacieli palubavacca horadam
Rustam Lubajeŭ kaža, što za minuły hod nie było nivodnaha vypadku, kab ludzi vychodzili z tranzitnaha ciahnika ŭ Vilni.
Kiraŭnik Słužby achovy dziaržmiažy Litvy (SPDŁ) Rustam Lubajeŭ nie vieryć, što biełarusy, jakija vyjšli ź ciahnika Kalininhrad — Sankt-Pieciarburh u Vilni, chacieli palubavacca horadam. Takuju viersiju nazvali zamiežniki. Lubajeŭ adznačyŭ, što apošnimi hadami takich zdareńniaŭ nie było, piša Delfi.lt.
Lubajeŭ padkreśliŭ, što na hety momant hramadzianie trecich krain, jakija mohuć pryjechać u Litvu, mohuć vyjści ź ciahnika ŭ Kienie (na biełaruskaj miažy) abo ŭ Kibartach (na miažy z Kalininhradskaj vobłaściu). Takich vypadkaŭ, kali hetyja ludzi sprabujuć syści ź ciahnika ŭ inšych haradach, byvaje niašmat.
«Takich vypadkaŭ niašmat. Za minuły hod nie było nivodnaha», — skazaŭ kiraŭnik SADŁ. U 2023 hodzie było 100 parušeńniaŭ, źviazanych z dazvołami pieramiaščacca pa terytoryi Litvy.
«Heta vypadki, kali ŭ ludziej byŭ dakumient ablehčanaha tranzitu ŭ Kalininhrad i jany znachodzilisia ŭ Litvie daŭžej za patrebnaje.
Ale što tyčycca ciahnikoŭ — takich vypadkaŭ nie było», — skazaŭ Lubajeŭ.
U sieradu ŭviečary ŭ 22:20 na čyhunačnym vakzale ŭ Vilni ź ciahnika Kalininhrad — Sankt-Pieciarburh, jaki spyniŭsia ŭ stalicy Litvy, vyjšli dvoje mužčyn. Ich zatrymała achova vakzała. Vyśvietliłasia, što heta hramadzianie Biełarusi, adzin 1980, a druhi 1972 h. n. U abodvuch mužčyn byli šenhienskija vizy. Biełarusy na tym ža ciahniku źjechali ŭ Biełaruś. Ich achoŭvała pamiežnaja słužba da Kieny.
Pa słovach pradstaŭnika Słužby achovy dziaržmiažy Hiedrusa Mišucisa, nieparazumieńnie adbyłosia z-za piersanału ciahnika. U Vilni piersanał ź nieviadomaj pryčyny adčyniŭ dźviery vahona. Dvoje pasažyraŭ zaŭvažyli heta i vyjšli.
«Na vilenskim čyhunačnym vakzale ciapier niama KPP. Ciahnik robić u Vilni tolki techničny prypynak. Pasažyry nie mohuć vyjści ź ciahnika ŭ Vilni. Pasažyry mohuć vyjści ŭ Kienie, dzie jość KPP», — skazaŭ Mišucis.
Vylecieła ŭ nieviadomym kirunku śpikierka KR Anžalika Mielnikava30
Kamientary
Byli!
Nu i pošli pacany za pivkom zdorov́je popraviť!