Prakuratura ŭ Polščy inicyjavała aficyjnaje rasśledavańnie pa fakcie sačeńnia za pradstaŭnikami polskaj apazicyi i lidaram biełaruskich demsił Śviatłanaj Cichanoŭskaj u minułyja hady z boku polskich śpiecsłužbaŭ i členaŭ byłoj kiroŭnaj partyi PiS. Pa viersii śledstva, prasłuchoŭvańnie adbyvałasia ŭ varšaŭskim hateli Marriott.
Pa infarmacyi polskaha vydańnia Gazeta Wyborcza, jakuju pieradaje Polsat News, polskaje Ahienctva ŭnutranaj biaśpieki (ABW) padčas kiravańnia ŭ Polščy partyi PiS (Prava i spraviadlivaść) mahło «niezakonna prasłuchoŭvać» nie tolki pradstaŭnikoŭ tahačasnaj polskaj apazicyii — partyi «Hramadzianskaja płatforma» Donalda Tuska, — ale i Śviatłanu Cichanoŭskuju.
Pavodle aficyjnaha śledstva, sačeńnie śpiecsłužbaŭ za pradstaŭnikami Donalda Tuska adbyvałasia ŭ pieryjad z 2019 pa 2021 hady i taksama ŭklučała ŭ siabie tajemnaje prasłuchoŭvańnie sustrečy niekatorych palitykaŭ «Hramadzianskaj płatformy» sa Śviatłanaj Cichanoŭskaj u varšaŭskim hateli Marriott kala aeraporta imia Šapena.
«Hieorhie Krystesku, prezident hatelnaha chołdynhu PHH, kudy ŭvachodzić i varšaŭskaja sietka Marriott, zahadzia papiaredziŭ člena partyi PiS Iaachima Brudzińskaha ab sustrečy Śviatłany Cichanoŭskaj ź niekalkimi viadomymi pradstaŭnikami «Hramadzianskaj płatformy», u tym liku i Tomašam Siemaniakam, jaki ciapier źjaŭlajecca členam Rady ministraŭ Polščy i kaardynataram śpiecsłužbaŭ krainy.
U svaim papiaredžańni Krystesku adznačyŭ, što na sustrečy budzie prysutničać «sanitarny doktar» — niefarmalny znak polskich śpiecsłužbaŭ, što budzie ŭstalavana prasłuchoŭvańnie, ci siarod supracoŭnikaŭ hatela buduć ahienty ABW», — piša Gazeta Wyborcza sa spasyłkaj na rasśledavańnie.
Fakt praviadzieńnia rasśledavańnia paćvierdziŭ i sam ministr Siemaniak, «jaki nazvaŭ usiu situacyju šakujučaj, asabliva kali ŭličyć uciahvańnie ŭ jaje Śviatłany Cichanoŭskaj, jakaja i tak naciarpiełasia ŭ svajoj krainie z-za tatalitarnych abmiežavańniaŭ».
Siemaniak spadziajecca, što ŭsie vinavatyja «paniasuć suravaje pakarańnie».
Pa viersii śledstva, da niezakonnaha sačeńnia mohuć mieć dačynieńnie nie tolki Hieorhie Krystesku, Iaachim Brudziński i niekatoryja inšyja členy partyi PiS, ale i były ministr unutranych spraŭ Polščy Maryjuš Kamiński i jaho namieśnik Maciej Vonsik.
Apošni nazvaŭ infarmacyju pra svajo dačynieńnie da niezakonnaha sačeńnia fejkam. Takoje ž mierkavańnie vykazaŭ i Iaachim Brudziński, jaki ciapier źjaŭlajecca deputatam Jeŭraparłamienta.
Stali viadomyja padrabiaznaści pra trahiedyju ŭ Połackim manastyry16
Stali viadomyja padrabiaznaści pra trahiedyju ŭ Połackim manastyry
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary