Jeŭropa nie zamierzła. Ceny na haz upali da minimumu ź lipienia 2023 hoda
Haz tańnieje na fonie prahnozaŭ ciopłaha nadvorja, adnaŭleńnia pastavak narviežskaha hazu paśla pierabojaŭ na minułym tydni i vialikich zapasaŭ u padziemnych schoviščach.
Haz na biržy ŭ Jeŭropie tarhujecca nižej za $300 za 1 tys. kubamietraŭ (na maksimumie ŭ žniŭni 2022 hoda cana na haz dasiahała $2400, kali rasijskija i biełaruskija prapahandysty pałochali Jeŭropu chałodnaj zimoj).
Biržavy košt hazu na placoŭcy ICE Futures upaŭ da minimumu ź lipienia 2023 hoda. Košt sakavickaha fjučarsa na chabie TTF u Niderłandach źniziłasia na 4,8%, dasiahnuŭšy €25,86 za 1 MVt·h, abo $293,04 za 1 tys.kub. m z ulikam kursu na rynku Foreks, śviedčać danyja biržy ICE pa stanie na 10:14, piša RBK.
Nižej za hety ŭzrovień fjučarsy na haz apošni raz tarhavalisia 28 lipienia 2023 hoda.
Z pačatku 2024 hoda biržavyja ceny na haz u Jeŭropie ŭpali prykładna na 20%.
Da 12:40 košt jeŭrapiejskaha hazu skarektavaŭ da $26,15 za 1 MVt·h, abo $295,8 za 1 tys.kub. m pa biahučym kursie.
Biržavyja ceny na haz u Jeŭropie źnižajucca na fonie prahnozaŭ bolš ciopłaha nadvorja ŭ rehijonie i adnaŭleńnia pastavak narviežskaha hazu paśla pierabojaŭ na minułym tydni, a taksama na fonie vysokaha ŭzroŭniu zapasaŭ u padziemnych schoviščach hazu ŭ rehijonie. Zapavoleńnie pramysłovaj aktyŭnaści, asabliva ŭ jeŭrazonie, akazała dadatkovy cisk na ceny.
«Apošnija danyja pakazvajuć palapšeńnie prahnozu nadvorja: plusavaja tempieratura budzie naziracca da kanca lutaha, a zatym da kanca sakavika čakajecca narmalnaja siezonnaja tempieratura», — paviedamili ŭ kansałtynhavaj kampanii Auxilione. Raniej prahnazavałasia bolš chałodnaje nadvorje, dadali ŭ kampanii.
Prahnozy ab paciapleńni pryviali da źnižeńnia spažyvańnia elektraenierhii ŭ rehijonach, dzie jon vykarystoŭvajecca dla aciapleńnia pamiaškańniaŭ, paviedamiŭ analityk LSEG Ulrych Vebier.
Ciapier čytajuć
Cichanoŭskaja — Trampu: Łukašenku treba pakarać, a nie zaachvočvać19
Kamientary