Da vybaraŭ u KR u kamandzie Prakopjeva-Jahorava raspracavali ceły firmovy harderob — jak vam?
25-27 maja adbuducca vybary ŭ Kaardynacyjnuju radu. Ciapier užo startavaŭ etap ahitacyi. My zaŭvažyli, što błok Prakopjeva-Jahorava dla svajho prasoŭvańnia raspracavaŭ ceły mierč i ŭłasny łahatyp. Spytali, što jon u sabie niasie i kolki heta kaštavała.
U kamandzie adznačyli, što łahatyp dla ich raspracavali biaspłatna.
«Heta zrabili biełaruskija dyzajniery, jakija pracujuć u adnym ź viadomych mižnarodnych rekłamnych ahienctvaŭ. U jakim mienavita my skazać, na žal, nie možam, kab ich nie zvolnili za padpracoŭku (tam z hetym usio stroha). Ale my dakładna nie paciahnuli b apłatu ich pracy pa aficyjnych taryfach».
Centralnym elemientam brendynhu źjaŭlajecca sałatavy pramavuholnik. Jon stvorany pa matyvach vydzialeńnia markieram čahości najbolš važnaha. Toje, što ŭ naźvie błoka takich pramavuholnikaŭ try — heta simvał viežy lidarstva.
Vybar na karyść termajadziernych koleraŭ byŭ metanakiravanym.
«My chacieli adyści ad zvykłaha čyrvonaha-biełaha spałučeńnia, bo razumieli, što bolšaść budzie vykarystoŭvać mienavita hetyja kolery, i tady b my nie vyłučalisia. A tut nam dyzajniery adrazu skazali, što z takimi kolerami ludzi zvyknucca nie adrazu, šmat chto budzie abmiarkoŭvać hamu. A abmierkavańnie i, jak vynik, zapaminalnaść — heta toje, čaho my damahalisia».
Praciaham pracy na zapaminalnaść stała raspracoŭka mierču.
Jon uklučaje ŭ siabie nie tolki kubki, ale amal ceły harderob — biejsbołki, łonhślivy, śvitšoty, futbołki, kašuli, poła, holfy i navat sukienki.
«U nas jość dziaŭčyna, dla jakoj styl — žyćciovaje kreda. Jana i padbirała madeli dla kamandy na vybar. Praŭda, praz toje, što ludzi z našaha błoku žyvuć u 15 krainach śvietu, im treba adpravić hety mierč, ale praź śviaty ŭ Polščy nazirajucca nievialikija nakładki ŭ łahistycy».
Niekatorych aktyvistaŭ užo možna było zaŭvažyć u abnoŭkach u pramych efirach i kamientarach. Voś, naprykład, Taćciana Chomič, siastra Maryi Kaleśnikavaj, u firmovaj kašuli.
Ci Vadzim Prakopjeŭ u futbołcy.
U kamandzie adznačajuć, što prykład z raspracoŭkaj łukbuka dla ich vielmi pakazalny.
«Heta prykład, jak biełarusy mohuć dapamahać adno adnomu raźvivacca i rabicca zaŭvažniej. Z mocnaj dyjasparaj našy mahčymaści ŭpłyvać na situacyju ŭnutry Biełarusi i palityku zachodnich krain u dačynieńni da nas značna pavialičvajucca. Voś vy bačyli, kab u habrejaŭ byli prablemy ź vizami? Nu, voś. A ŭsio praź ich zhurtavanaść i ŭzajemapadtrymku».
Čytajcie taksama:
Prakopjeŭ patłumačyŭ, navošta idzie ŭ Kaardynacyjnuju radu
Apublikavali śpisy kandydataŭ u novy skład Kaardynacyjnaj rady
Kamientary