Stvałamazhavy impłant upieršyniu pastavili biełaruskamu dziciaci. Chłopčyk naradziŭsia całkam hłuchim
Dziakujučy jamu trochhadovy Płaton Miranovič pačaŭ čuć.
Upieršyniu ŭ Biełarusi dzicia atrymała stvałamazhavy impłant — ciapier jon čuje. Na apieracyju źbirali ŭsioj krainaj — €85 tys. pastupili na rachunak baćkoŭ za dva z pałovaj miesiacy, piša vydańnie Minskaha rajona «Prystaličča».
Płaton žyvie ŭ vioscy Laskoŭka Minskaha rajona. Jon naradziŭsia hłuchim, choć jaho brat-bliźniuk Jaryk źjaviŭsia na śviet całkam zdarovym.
Dakładny dyjahnaz dziciaci — pryrodžanaja adsutnaść vušnych skrutkaŭ i paŭkruhłych kanałaŭ, dvuchbakovaja niejrasiensornaja tuhavuchaść.
Znoŭ čuć Płaton moh pačać tolki paśla apieracyi na mozhu — jamu byŭ nieabchodny stvałamazhavy impłant.
Kab sabrać usiu sumu na apieracyju (€85 tys.), baćki adkryli dabračynny zbor. Hrošy źjavilisia niečakana chutka — za dva z pałovaj miesiacy.
I ŭžo ŭ sakaviku va Univiersiteckaj klinicy Viurcburha ŭ Hiermanii Płatonu zrabili nieabchodnuju apieracyju. Ahułam chłopčyk pravioŭ pad narkozam 11 hadzin.
«Było strašna. Daktary papiaredžvali, što apieracyja moža prajści nie pa płanie. Kali b mozh nie daŭ adkazu na datčyki, ranu prosta zašyli b i adpravili nas dadomu», — raspaviała mama Anastasija.
U mai ŭ reanimacyi pad nahladam daktaroŭ dziciaci padklučali 12 datčykaŭ. Praces byŭ chvalujučy, bo spracavać mahli nie ŭsie.
«Mnie chaciełasia vieryć, što Płaton adrazu skaža: «Mama, ja ciabie lublu». Ale, naturalna, hetaha nie adbyłosia. Choć nam vielmi pašancavała — usie 12 datčykaŭ padklučylisia», — adznačyła Anastasija.
Ciapier chłopčyku zdymajuć aparat tolki na noč. Za vucham u jaho ŭžyŭlena mietaličnaja płaścina, da jakoj i macujecca aparat — maleńkaja mahnitnaja tabletka.
Pakul što dadatkova davodzicca vykarystoŭvać paviazku, bo aparat pryznačany dla darosłych.
Adčuvalnaść datčykaŭ buduć naładžvać pastupova, kab nie pierahružać dzicia i nie pałochać jaho mocnymi hukami.
Płaton užo vučycca razmaŭlać
Ciapier Płaton zajmajecca ź piedahohami. I ŭžo jość pieršyja pośpiechi: jon navučyŭsia vymaŭlać huki «a» i «u».
Časam chłopčyk moža mižvolna paklikać baćkoŭ, skazać doŭhačakanyja słovy «mama» i «tata».
Taksama Płaton pajšoŭ u dziciačy sadok, u tuju ž hrupu, kudy chodzić jaho brat Jaryk.
Anastasija pryznajecca, što časam adpuścić syna byvaje niaprosta — jana vielmi za jaho pieražyvaje. Bo lubaja traŭma dla Płatona moža stać fatalnaj.
U Hiermaniju siamji jašče daviadziecca jeździć — stabilna raz na try miesiacy dla naładžvańnia datčykaŭ.
Usie vydatki siamja płanuje apłačvać samastojna.
Ciapier čytajuć
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary