«Biełaruś — najlepšaja kraina. Ale treba padrychtavacca». Mužčyna čyściŭ telefon, ale jaho ź siamjoj usio roŭna zatrymali na miažy
Michaił, jaki daŭno žyvie ŭ Izraili, usio roŭna ličyć Biełaruś najlepšaj krainaj. Ale zadumaŭsia pra toje, jak čyścić padpiski efiektyŭniej.
Michaił raskazaŭ u sacsietkach, što ŭžo siem hadoŭ žyvie ŭ Izraili, ale čas ad času pryjazdžaje ŭ Biełaruś. Kožny raz pierad takimi vizitami jon čyścić telefon: praviaraje, kab nie było padpisak na «niapravilnyja» kanały.
Ale apošniaja pajezdka pajšła nie pa płanie. Michaił z žonkaj i dvuma dziećmi pierasiakali biełaruska-litoŭskuju miažu. Paśla pravierki telefonaŭ — heta zdaryłasia ź Michaiłam upieršyniu — siamju zatrymali.
«Ja addaŭ telefon, nie addać niemahčyma. Niepryjemnaść znajšłasia nie ŭ telehramie, nie ŭ fejsbuku ci instahramie, a ŭ jutubie. Ja byŭ padpisany na dva [zabaronienyja] kanały, žonka — na adzin.
Kajdany, troje sutak u IČU, sud, štraf, kanfiskacyja telefonaŭ», — padvioŭ vynik Michaił. Im z žonkaj dali štrafy pa 1125 rubloŭ, telefony pryjšłosia kuplać novyja.
Čas za kratami mužčyna pravioŭ u rozdumach. Jon zrazumieŭ, što ŭ takuju situacyju mohuć trapić takija ž ludzi, jak jon, — tyja, chto vypaŭ z unutrypalityčnaha paradku dnia. Jon zadumaŭ zrabić servis, jaki dapamoža pravieryć pryłady na «najaŭnaść nienadziejnych elemientaŭ».
Michaił byŭ šakavany tym, što kanały ŭ śpisie zabaronienych źjaŭlajucca štodnia — u siarednim pa piać-šeść. I pryjšoŭ da vysnovy, što samomu adsačyć heta vielmi składana.
Mužčyna asobna padkreśliŭ, što dystancujecca ad palityki. Na dumku Michaiła, «palitykaj musiać zajmacca tyja ludzi, jakija znachodziacca ŭ krainie. A tyja, chto źjechaŭ, musiać zajmacca palitykaj u tych krainach, u jakija źjechali».
U kamientarach niechta, vidavočna ź ironijaj, adznačyŭ, što ciapier źjaviłasia žadańnie jechać u Biełaruś.
«Biełaruś — najlepšaja kraina ŭ śviecie, i ja nie žartuju. Prosta treba padrychtavacca i hulać pa praviłach», — adkazaŭ Michaił.
Padpałkoŭnika z fakulteta vajskovaj raźviedki sudziać za «zdradu dziaržavie» pa spravie, jakaja vyhladaje palityčnaj. Što pra jaho viadoma?6
Kamientary
[Zredahavana]