U adkryćci Mižnarodnaha fiestyvalu carkoŭnaj muzyki ŭ Biełastoku voźmie ŭdzieł biełaruski chor
43-ci Mižnarodny fiestyval carkoŭnaj muzyki «Hajnaŭka 2024» pačynajecca ŭ Biełastoku 29 traŭnia ŭ kancertnaj zali Padlašskaj opiery i fiłarmonii. Sioletni fiestyval pryśviečany pamiaci šmathadovaha staršyni žury fiestyvalu prafiesara Ramualda Tvardoŭskaha. U miežach fiestyvalu ŭ Biełastoku vystupiać chary z Polščy, Ukrainy, Litvy, Małdovy, Vienhryi i Armienii. Biełaruś pradstavić Concordia Choir z Varšavy, piša Reform.news.
Dyrektar fiestyvalu Mikałaj Buško raskazaŭ radyjo «Racyja», što carkoŭnyja chary ź Biełarusi — prafiesijnyja i samadziejnyja — raniej časta brali ŭdzieł u imprezie, adnak apošnim časam heta stanovicca vielmi składanym:
«My ŭsie razumiejem, i chary razumiejuć, što nie mieli b šancaŭ na vyjezd ź Biełarusi. Taksama jak niama aficyjnych zajavak z Rasii ź viadomych pryčyn. My škadujem tamu, što kali b było inakš, to my b z pryjemnaściu pradstavili našaj publicy vydatnyja, prafiesijnyja chary našych łaŭreataŭ ź Biełarusi ci Rasii».
43-ci fiestyval raspačniecca kancertam, u jakim prymaje ŭdzieł Concordia Choir.
Reform.news pacikaviŭsia ŭ mastackaj kiraŭnicy i dyryžorki Concordia Choir Haliny Kazimiroŭskaj pra asablivaści sioletniaj imprezy.
«Concordia Choir pradstaŭlaje Biełaruś užo treci raz na hetym fiestyvali. U 2022 hodzie my byli zaprošanyja, kab uziać udzieł u konkursnaj prahramie, i zaniali pieršaje miesca. Tamu ŭ nastupnym 2023 hodzie my jak pieramožcy arhanizavali solny kancert «Mahutny Boža», na jakim vykonvali duchoŭnyja tvory biełaruskich aŭtaraŭ.
Sioleta ŭdzielničajem treci zapar, ale nie ŭ konkursie, a ŭ adkryćci fiestyvalu, u kancercie «Trochhałośsie za mir», ideja jakoha — jadnańnie narodaŭ suprać vajny.
Z charoŭ troch krain — ukrainskaha choru «Sofija», polskaha «Mus Arietes» i biełaruskaha «Concordia» — zrabili adziny, zvodny. Prahrama składziena ŭ asnoŭnym z tvoraŭ ukrainskich kampazitaraŭ…
Taksama my ŭsie razam zaśpiavajem tvor biełaruskaha kampazitara Mikoły Kulikoviča, jakoha my viedajem pa muzycy da «Pahoni». My vykanajem unikalny tvor, adzin sa znojdzienych u archivie łondanskaj biełaruskaj biblijateki, u aryhinale jon napisany na carkoŭnasłavianskaj movie, ale my praśpiavajem jaho ŭ pierakładzie Alaksandra Nadsana. Tvor nazvany «Dar miru», jon davoli vialiki, jaho praciahłaść — vosiem chvilin».
Fiestyval projdzie z 29 traŭnia pa 2 červienia ŭ kancertnaj zali Padlašskaj opiery i fiłarmonii pa adrasie: Biełastok, ul. Podleśna, 2.
Ciapier čytajuć
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary