Viadomaja biełaruskaja piedyjatarka Nadzieja Dubatoŭka naradziła piataje dzicia ŭ Panamie
Nadzieja Dubatoŭka — adna z samych miedyjnych biełaruskich miedykaŭ. Jana źjaŭlajecca stvaralnicaj Centra sučasnaj piedyjatryi ŭ Minsku, a taksama aktyŭna viadzie błoh u instahramie i maje 83500 padpisčykaŭ. Naradžać piataje dzicia žančyna palacieła ažno ŭ Panamu.
Čakać naradžeńnia niemaŭlaci palacieła ŭsia vialikaja siamja Nadziei — muž i čaćviora starejšych dziaciej. Čakajučy važny dzień, usie atrymlivali asałodu ad akijanu, ciepłyni i ekzatyčnaj sadaviny. Svajo rašeńnie błohierka-piedyjatarka rastłumačyła tak:
— Voś tak my vyrašyli pačać novuju historyju siamji. I palacieli pa piatuju maleču u… Panamu. Čamu? Dy tamu, što heta praściej, čym atrymać italjanskuju vizu ŭ Biełarusi. Voś i ŭvieś sakret.
Jana adrazu adkazała chiejtaram, jakija čas ad času pišuć, što stolki dziaciej — heta ŭžo zašmat.
— Mnie nie zašmat piać dziaciej. Adkazna, składana, jak zaŭhodna! Ale ŭ ich i jość sens žyćcia.
Błohierka taksama zapeŭniła, što jany z mužam zmohuć usich dziaciej nie tolki prakarmić-apranuć, a jašče i «zasalić u akijanie i potym raskidać pa śviecie pa adukacyju».
Niadaŭna Nadzieja paviedamiła padpisčycam, što piataja dziaŭčynka naradziłasia. Na nastupny dzień paśla rodaŭ maci ź niemaŭlatam užo vypisali. I ŭ chutkim časie dziaŭčyncy pakazali akijan.
Błohierka-piedyjatarka raspaviała ŭ storys, što sanitarnyja normy ŭ Panamie nižejšyja za biełaruskija. Ale naradžać tut joj było bolš kamfortna, čym u lubym z radzilnych damoŭ na radzimie (a žančynie, jakaja naradziła ŭ Biełarusi čatyroch dziaciej, jość z čym paraŭnoŭvać).
Zamiežnicy mohuć naradžać u Panamie navat biaspłatna, kali źviarnucca ŭ dziaržaŭnyja kliniki. Ale Nadzieja chvalavałasia, što tam mohuć być nie vielmi kamfortnyja ŭmovy, tamu vyrašyła ŭsio ž naradžać u pryvatnaj klinicy.
Na sajcie kliniki Pacífica Salud, u jakoj naradžała Nadzieja Dubatoŭka, paznačana, što bazavy pakiet «naturalnyja rody» kaštuje ad 750 da 1050 panamskich balboa, a pakiet «kiesarava siačeńnie» — ad 1295 da 1795 panamskich balboa (u dalarach heta stolki ž). Ale paznačana, što ŭ hety prajs nie ŭklučany miedycynskija zbory i niekatoryja dadatkovyja pasłuhi i manipulacyi.
Cikavy momant: dzicia, narodžanaje ŭ Panamie, aŭtamatyčna atrymlivaje hramadzianstva hetaj krainy. Baćki taksama majuć mahčymaść atrymać hramadzianstva, ale padać dakumienty mohuć tolki paśla taho, jak pražyvuć u hetaj krainie 5 hadoŭ.
Ale Nadzieja Dubatoŭka supakoiła padpisčyc:
«Ja nikudy nie padzienusia i nie prapadu. Voś zaraz adpačnu i viarnusia».
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary