Błohier aburyŭsia mamaj u handlovym centry, jakaja karmiła hrudźmi niemaŭla. Jana jamu iranična adkazała
Staličny błohier pabačyŭ u handlovym centry «Hryn Sici», jak maci kormić niemaŭla. Svajo abureńnie jon zapisaŭ na videa na fonie toj samaj žančyny. Historyja atrymała niečakany praciah: vierahodnaja hierainia roliku — viadomaja doktarka. Jana nie stała maŭčać.
Niekalki dzion tamu tyktok-karystalnik Rusłan vykłaŭ rolik, u jakim aburaŭsia:
— Žančyna na zadnim płanie (tvar nie pakazvaju) siadzić i hrudźmi kormić dzicia. Ja liču, heta nienarmalna. Heta asabistaje, heta intymnaje. Ja viedaju, što mamašy mianie pačnuć chejcić. Ale heta niapravilna.
Heta anałahična, kali b ja niešta moh rabić u handlovym centry i kazać: «Heta naturalna». Tym bolš, u kožnym handlovym centry jość pakoj maci i dziciaci. Tudy možna pajści i spakojna pakarmić. Abo, ja liču, kali ty idzieš kudyści i nadoŭha, prosta možna scadzicca ŭ butelečku i pakarmić dzicia z butelki — heta budzie estetyčna i pryhoža.
Videa nabrała 168 tysiač prahladaŭ. Dyskusija pačałasia aktyŭnaja. Niechta padtrymaŭ mužčynu, ale najbolš papularnyja kamientaryi pryśviečany tamu, što niama ničoha žudasnaha ŭ karmleńni niemaŭla na ludziach.
Błohier paśla zapisaŭ jašče niekalki videa z razvažańniami na temu hrudnoha karmleńnia. I navat abiacaŭ pravieści žyvy efir, pryśviečany tamu «jak čałavieka, jaki maje ŭłasnaje mierkavańnie, palivajuć brudam».
Pra hetuju historyju napisali mnohija ŚMI, videa abmiarkoŭvali ŭ sacyjalnych sietkach. Učora jaho pabačyła i vierahodnaja hierainia roliku. Viadomaja piedyjatarka i stvaralnica Centra sučasnaj piedyjatryi ŭ Minsku Nadzieja Dubatoŭka, jakaja niadaŭna naradziła piataje dzicia, paznała ŭ videa siabie.
Adkaz šmatdzietnaja maci apublikavała ŭ svaim błohu ŭ instahramie, dzie na jaje padpisana kala 84 tysiač čałaviek.
— Dobra, ja nie lublu leźci ŭ takija rečy. Tamu što navat takaja drobiaź dla mianie vidavočny chajp. Maja pazicyja nakont karmleńnia hrudźmi ŭ hramadskich miescach? Mužyk, chutčej za ŭsio ŭ «Hryn Sici» ty bačyŭ mianie. Dziakuj za ŭvahu. Kamu brydka hladzieć na karmleńnie dziaciej — chaj sami nie jaduć u hramadskich miescach. Ja tak liču. A to čviakajecie, rot svoj raziaŭlajecie. Heta fuuu. Prykryvajciesia, kali łaska, kali jaście. Soramna ž pavinna być.
Kamientary