Hanna Złatkoŭskaja pakinuła Biełaruś u listapadzie 2020 hoda. Dniami stała viadoma pra zaviadzieńnie kryminalnaj spravy suprać kałumnistki. U kvatery jaje maci taksama prajšoŭ pieratrus, piša BAŽ.
8 kastryčnika ŭ Minsku siłaviki pryjšli ź pieratrusam u kvateru da maci žurnalistki i kałumnistki Hanny Złatkoŭskaj. Pra heta jana paviedamiła na svajoj staroncy ŭ fejsbuku.
U hety ž dzień stała viadoma, što ŭ dačynieńni Złatkoŭskaj u Biełarusi raspačataja kryminalnaja sprava, a na jaje majomaść — lecišča — nakładzieny aryšt. Pavodle jakoha artykuła pieraśledujuć žurnalistku i ŭ čym sutnaść abvinavačańnia — pakul nieviadoma.
«Na mianie zaviedzienaja kryminalnaja sprava. Ja zarehistravanaja ŭ kvatery mamy, vidać, tamu da jaje pryjšli ź pieratrusam. Chacia, moža być, jany prychodziać ź pieratrusam da blizkich ludziej, usio roŭna, prapisany tam fihurant kryminalnaj spravy ci nie», — raspaviała Hanna Złatkoŭskaja słužbie manitorynhu BAŽ.
«Što heta za kryminalnaja sprava suprać mianie, maci nie paviedamili. Pavodle ich słoŭ, skazać mohuć tolki mnie. U orhanach, vidać, viedajuć, što ja ŭ Litvie. Jak jany buduć paviedamlać asabista mnie, nie viedaju. Dumaju patelefanavać im, ale sumniajusia, što heta dapamoža. Chutčej, vietliva prapanujuć pryjechać i paabiacajuć usio raskazać pry sustrečy», — iranizuje Hanna Złatkoŭskaja.
Dača, na jakuju pastanovaj Śledčaha kamiteta nakładzieny aryšt, heta jaje adzinaja nieruchomaść kaža Hanna. «Vidać, zabirajuć usio, što jość, što mohuć. Jana aryštavanaja, a što budzie dalej — ja nie viedaju. Heta biada, biezumoŭna. Mama pravodzić kožny siezon na hetym leciščy, heta jaje adziny paratunak va ŭsim hetym. Dy i kolki sił tudy ŭkładziena, bajusia navat dumać ab tym, što jaje zabiaruć».
Hanna Złatkoŭskaja — piśmieńnica, žurnalistka, kałumnistka. Aŭtarka dźviuch knih prozy: «Strašno žiť, mama» i «Ochota na babočiek». Supracoŭničała z šeraham niezaležnych ŚMI i miedyjaprajektaŭ.
Ciapier čytajuć
«Abmiarkoŭvajem pytańnie ab vyzvaleńni jašče 1300 źniavolenych». Tramp raskazaŭ, pra što havaryŭ z Łukašenkam20
Kamientary