Iran moža zaciahnuć vajnu sa Złučanymi Štatami Amieryki jak minimum jašče na dva z pałovaj hady — da zakančeńnia prezidenckaha terminu Donalda Trampa ŭ studzieni 2029 hoda. Pra heta ŭ intervju amierykanskaj telekampanii PBS zajaviŭ bryhadny hienierał Machamad Reza Nahdzi, daradca hałoŭnakamandujučaha Korpusa vartavych isłamskaj revalucyi.
Pavodle słoŭ iranskaha hienierała, Tehieran ličyć, što ŭžo atrymaŭ biezumoŭnuju pieramohu, bo Vašynhton nie dasiahnuŭ hałoŭnych metaŭ, jakija staviŭ pierad saboj. Siarod ich hienierał nazvaŭ źviaržeńnie iranskaha kiraŭnictva i raspad Irana.
Adnak, jak śćviardžaje Nahdzi, Iran taksama pakul nie dasiahnuŭ svajoj kančatkovaj mety. Jon adznačyŭ, što raniej iranskija ŭzbrojenyja siły nikoli nie viali sapraŭdnaj vajny suprać ZŠA, a za apošnija piać miesiacaŭ atrymali značny vopyt supraćstajańnia amierykanskamu vojsku.
Hienierał zajaviŭ, što iranskija vajskoŭcy pierakanalisia: amierykanskaje vojska słabiejšaje, čym jany mierkavali. Ciapier Tehieran, pavodle jaho słoŭ, imkniecca stvaryć ustojlivy miechanizm strymlivańnia, kab u budučyni inšyja krainy nie advažvalisia atakavać Iran.
Adnym sa sposabaŭ dasiahnieńnia hetaj mety Nahdzi nazvaŭ praciah vajny da zakančeńnia prezidenckaha terminu Donalda Trampa. Na jaho dumku, kali amierykanskija siły buduć daviedzienyja da źniasileńnia, lubaja novaja ataka suprać Irana budzie kaštavać ZŠA zanadta doraha.
Pry hetym iranski hienierał padkreśliŭ, što Tehieran nie imkniecca źniščyć amierykanski narod. Kamientujučy papularny ŭ Iranie łozunh «Śmierć Amierycy!», jon zajaviŭ, što pad im majecca na ŭvazie nie varožaść da nasielnictva ZŠA, a supraćstajańnie amierykanskamu kiraŭnictvu.
Vajna pamiž ZŠA i Iranam pačałasia paśla sumiesnaj amierykana-izrailskaj vajskovaj apieracyi suprać Irana ŭ lutym hetaha hoda. U červieni Vašynhton i Tehieran padpisali miemarandum ab uzajemarazumieńni, jaki praduhledžvaŭ spynieńnie bajavych dziejańniaŭ, adnak paźniej pieramirje było sarvanaje, a doŭhaterminovaha pahadnieńnia dahetul niama.
10 žniŭnia Donald Tramp zajaviŭ, što ZŠA mohuć albo dazvolić Iranu dalej ruchacca da ekanamičnaha krachu, albo nanieści pa krainie «vielmi, vielmi mocny» ŭdar. Amierykanski prezident taksama śćviardžaŭ, što Vašynhton kantraluje značnuju častku iranskich finansavych resursaŭ.
Kamientary