Pravaabaroncy paviedamlajuć pra masavyja zatrymańni z udziełam KDB u Hrodzienskaj vobłaści
Pravaabaroncy pišuć, što 14 listapada jany atrymlivajuć mnostva paviedamleńniaŭ pra zatrymańni ŭ Hrodzienskaj vobłaści. U abłavie ŭdzielničajuć supracoŭniki KDB, paviedamlaje telehram-kanał «Sudy, zatrymańni. Hrodna i vobłaść».
Kolkaść zatrymanych, pryčyny vizitaŭ siłavikoŭ, inšyja akaličnaści siońniašnich zatrymańniaŭ nieviadomyja.
Niadaŭna pravaabaroncy paviedamlali ab masavaj «začystcy» ŭ Smarhoni i Słonimie — tam zatrymanyja kala 50 čałaviek, a taksama ŭ Navahrudku.
Čarhovaja chvala masavych zatrymańniaŭ u Biełarusi pačałasia 31 kastryčnika i praciahvajecca da hetaha času.
Pavodle infarmacyi «Našaj Nivy», častka zatrymańniaŭ źviazana z tym, što 29 kastryčnika KDB pryznaŭ «ekstremisckim farmavańniem» kaalicyju dvarovych čataŭ.
Padobna, što ŭ toj ža čas HUBAZiK «adpracavaŭ» niekalki pradpryjemstvaŭ i rajonaŭ u rehijonach. Jon dziejničaŭ pa ŭłasnym płanie, paralelna.
HUBAZiK pieravažna prychodziŭ da ludziej, jakija traplali pad uvahu siłavikoŭ raniej. Heta adpaviadaje łohicy apieracyi pa pieradvybarčym zastrašvańni nasielnictva, pra jakuju «Naša Niva» paviedamlała raniej.
Abłavu 31 kastryčnika — 1 listapada pa maštabie možna paraŭnać z aryštami svajakoŭ palitviaźniaŭ i ludziej, jakija im dapamahali, zimoj 2024-ha.
Viadoma, što izalatary časovaha ŭtrymańnia ŭ rehijonach i Akreścina ŭ Minsku pierapoŭnienyja.
«Nachapali kuču narodu. U dvuch– i trochmiesnych kamierach — pa 15—20 čałaviek», — raskazvaje čałaviek, jaki vyzvaliŭsia niadaŭna.
Kali vy viedajecie pra toje, što zdaryłasia, bolš, pišycie redaktaru «Našaj Nivy» ŭ TH ci na [email protected]. Abo lubomu redaktaru ci žurnalistu «Našaj Nivy», jakoha viedajecie asabista.
Ciapier čytajuć
«Retranślatary vyklučyć, źniać i pakazać nam, što jany źniatyja». Zialenski patłumačyŭ, čamu pastaviŭ ultymatum i što maje zrabić Minsk47
Kamientary