Danyja ŭsich karystalnikaŭ Pokemon GO ciapier pieratvoracca ŭ hłabalnuju mapu miascovaści
Stvaralniki miehapapularnaha dadatku dla pošuku virtualnych pakiemonaŭ zrabili rezanansnuju i adnačasova skandalnuju zajavu — danyja miljonaŭ karystalnikaŭ Pokemon GO lahuć u asnovu stvareńnia novaha hłabalnaha štučnaha intelektu, jaki zmadeluje detalizavanuju mapu ŭsich abjektaŭ śvietu, jakija traplali ŭ abjektyvy kamier pryład hulcoŭ na praciahu 8 hadoŭ.
Amierykanskaja kampanija Niantic anansavała vypusk «Vialikaj hieaprastoravaj madeli» (Large Geospatial Model, LGM), što «stanie revalucyjaj u razumieńni fizičnaha śvietu štučnym intelektam».
LGM budzie ŭjaŭlać hłabalnuju i miehadetalizavanuju suśvietnuju mapu, u asnovu jakoj lahuć danyja skanavańniaŭ miascovaści z pryład miljonaŭ karystalnikaŭ hulniaŭ Pokemon Go, Ingress i inšych dadatkaŭ Niantic, aficyjna paviedamiła kampanija.
«Madel štučnaha intelektu LGM zasnavana na vielizarnym abjomie danych — bolš za 50 miljonaŭ maleńkich niejrasietak apracoŭvajuć 150 tryljonaŭ paramietraŭ na bazie miljardaŭ vyjaŭ, źviazanych z hieahrafičnymi kaardynatami i skanavańniami miascovaści pryładaŭ karystalnikaŭ našych dadatkaŭ, što dapamoža stvarać 3D-rekanstrukcyi realnaha śvietu z dakładnaściu da santymietra.
Cistema LGM adroźnivajecca ad usich astatnich kankurentaŭ tym, što našy danyja całkam unikalnyja, bo sabranyja mienavita ź piešachodnaj pierśpiektyvy i ŭ miescach, kudy aŭtamabili sa skanierami prastory prosta nie zdolnyja patrapić.
Heta robić technałohiju asabliva karysnaj dla takich zadač, jak haradskaja navihacyja, łahistyka, dyzajn transpartnych maršrutaŭ i intehracyja ličbavych elemientaŭ u realny śviet, što vielmi spatrebicca raspracoŭščykam akularaŭ virtualnaj realnaści i inšych vysokatechnałahičnych hadžetaŭ. My imkniemsia stvaryć technałohiju, jakaja całkam złučyć fizičny i ličbavy śviet», — zajavili raspracoŭščyki Pokemon Go z kampanii Niantic.
Jak adznačajuć niezaležnyja analityki i ekśpierty pa kibierbiaśpiecy, padobnyja płany i dziejańni kampanii Niantic mohuć stvaryć pahrozu pryvatnamu žyćciu i biaśpiecy miljonaŭ čałaviek pa ŭsim śviecie, bo karystalniki łavili pakiemonaŭ i karystalisia inšymi dadatkami Niantic u samych roznych miescach: ad ułasnych damoŭ i kvater da dziaržaŭnych i vajskovych abjektaŭ.
«Nichto z tych, chto zahruziŭ Pokemon Go u 2016 hodzie, nie moh pradkazać, što ich danyja adnojčy stanuć asnovaj dla hłabalnaha i nie da kanca zrazumiełaha praduktu sa štučnym intelektam», — piša partał 404 Media.
Nahadajem, što dva miesiacy tamu načalnik adździeła hałoŭnaha ŭpraŭleńnia ideałahičnaj raboty ministerstva abarony Biełarusi Alaksandr Ivanoŭ abvinavaciŭ stvaralnikaŭ Pokemon Go u špijanažy.
«Davajcie voźmiem hulniu Pokemon Go. Hadoŭ dziesiać nazad jana była vielmi papularnaja. Usie padletki-dzieci siadzieli na niejkim dadatku — uklučaješ kamieru, dapoŭnienaja realnaść, i šukaješ niejkich pakiemonaŭ. Redkich źbiraješ sabie ŭ kalekcyju.
Dzie było bolš za ŭsio pakiemonaŭ u toj čas? Na terytoryi 50-j avijacyjnaj bazy (Mačuliščy), dzie ŭźlotna-pasadačnaja pałasa, dzie kuča vajskovaj techniki. Ci heta nie raźviedvalnickaja infarmacyja?» — zajaviŭ Ivanoŭ u efiry dziaržtelebačańnia.
Ciapier čytajuć
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ75
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?88
Kamientary