Niejrasietki mohuć vypadkova vydać instrukcyju stvareńnia jadziernaj zbroi?
Ministerstva enierhietyki ZŠA razam ź inšymi viedamstvami vykarystoŭvaje papularnuju sistemu štučnaha intelektu dla teściravańnia jadziernaj biaśpieki. Adnak, jak piša vydańnie Axios, heta moža pryvieści da scenaru, kali niejrasietki, dapuščanyja da jadziernych prahram, mohuć vypadkova vydać sakrety lubomu karystalniku.
Amierykanskaja vysakatechnałahičnaja kampanija Anthropic razam ź Ministerstvam enierhietyki ZŠA vypraboŭvaje svaje madeli štučnaha intelektu (ŠI), kab pierakanacca, što jany nie mohuć być vykarystany dla stvareńnia jadziernaj zbroi. Pra heta kampanija paviedamiła vydańniu Axios.
Anthropic zajaŭlaje, što jaje sistema štučnaha intelektu Claude (adna z samych pieradavych na siońnia niejrasietak) stała pieršaj, jakoj aficyjna dazvolili vykarystoŭvacca ŭ sakretnych uradavych prahramach ZŠA, u tym liku jadziernaj.
Z krasavika hetaha hoda Anthropic supracoŭničaje z Administracyjaj pa nacyjanalnaj jadziernaj biaśpiecy (NNSA), i adnačasova ładzić ź joj maštabnaje sumiesnaje daśledavańnie, ci moža Claude raptoŭna vydać jadziernyja sakrety trecim asobam pa zapycie.
Śpiecyjalisty NNSA i Anthropic naŭmysna sprabujuć «uzłamać» Claude i prymusić jaho, naprykład, źlić instrukcyju pa raspracoŭcy jadziernaj zbroi, piša Axios (z hetaha vynikaje, što štučny intelekt užo maje dostup da takoha typu danych).
Daśledavańnie jašče praciahvajecca i skončycca tolki ŭ lutym 2025 hoda, tamu vyniki teściravańnia Claude pakul nie viadomyja. Kampanija Anthropic, u svaju čarhu, płanuje padzialicca vysnovami z navukovymi łabaratoryjami i inšymi arhanizacyjami, kab jany mahli taksama pravieści anałahičnyja vyprabavańni.
Navošta ŭvohule davać ŠI dostup da jadziernaj prahramy?
Niejrasietki mohuć istotna pavysić efiektyŭnaść jadziernych udaraŭ: jany zdolnyja raźličvać trajektoryju palotu bojehałoŭki takim čynam, kab patrapić u cel ź minimalnymi stratami i razbureńniami. Heta asabliva važna dla taktyčnaj jadziernaj zbroi, jakaja pryznačana dla parazy łakalnych abjektaŭ.
Pieradavyja sistemy ŠI, jak toj ža Claude, taksama zdolnyja z vysokaj dakładnaściu simulavać jadziernyja vybuchi i analizavać ich nastupstvy. Hetaja infarmacyja moža spatrebicca dla ŭdaskanaleńnia kanstrukcyi bojehałovak. Akramia taho, ŠI moža apracoŭvać danyja ab łandšafcie, ekałohii, infrastruktury na terytoryi praciŭnika i hetak dalej, zadajučy, zadajučy aptymalnyja paramietry dla ŭdaru.
«Kali łaska, pamry». Niejrasietka z abrazami i praklonami nakinułasia na karystalnika. Spytali ŭ jaje, čamu jana razzłavałasia
Čat-boty mohuć padtrymlivać nacyzm i inšyja antyčałaviečyja ideałohii z-za adnoj asablivaści
Šviejcaryja prezientavała revalucyjnuju technałohiju, jakaja amal całkam moža pazbavić śviet ad radyjeaktyŭnych adkidaŭ
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali12
Kamientary