Firma, jakaja naležała madeli ź Minska, adpraŭlała ŭ Rasiju brytanskuju vajskovuju optyku

Zroblenuju ŭ Vialikabrytanii vajskovuju optyku Rasii adpraŭlała zarehistravanaja ŭ Kyrhyzstanie kampanija, jakoj, mierkavana, kiravała madel, jakaja rekłamuje kupalniki.

Rasśledavańnie Bi-bi-si pryviało da Valeryi Bajhaskinaj, 25-hadovaj uradženki Kazachstana, jakaja ciapier žyvie ŭ Biełarusi. Jana pracuje čas ad času madellu i viadzie śvieckaje žyćcio. Za apošnija dva hady jana naviedała Dubaj, Šry-Łanku i Małajziju.

U sacsietkach Bajhaskinaj nie havorycca, što paralelna jana źjaŭlajecca dyrektaram firmy, jakaja pastaŭlała abstalavańnie na miljony dalaraŭ rasijskim kampanijam, jakija trapili pad sankcyi. Heta pakazała žurnalisckaja pravierka mytnych dakumientaŭ.

Pavodle biełaruskich rejestraŭ, Bajhaskina była zasnavalnikam i dyrektaram kampanii pad nazvaj TAA «Rama Hrup», zarehistravanaj u lutym 2023 hoda ŭ Biškieku, stalicy Kyrhyzstana.

Pavialičyć

Z atrymanych Bi-bi-si mytnych dakumientaŭ vynikaje, što kampanija «Rama Hrup» dvojčy pastaŭlała ŭ Rasiju vysokatechnałahičnuju optyku, jakaja moža vykarystoŭvacca ŭ rakietach, tankach i samalotach.

U mytnaj dekłaracyi pakazana, što abstalavańnie vyrablena kampanijaj Beck Optronic Solutions u Chiemieł-Chiempstiedie, u hrafstvie Chartfardšyr. Kampanija vyrablaje vysokadakładnyja linzy, jakija vykarystoŭvajucca ŭ sistemach celeŭkazańnia i nazirańnia.

Choć niekatoryja ź jaje raspracovak prymianiajucca ŭ achovie zdaroŭja i mašynabudavańni, na sajcie Beck Optronic padrabiazna apisana šyrokaje vajennaje i abaronnaje prymianieńnie.

Linzy i aptyčnyja technałohii, jakija pradajucca Beck Optronics, paznačany jak tavary, jakija albo nielha lehalna ekspartavać u Rasiju, albo dla ich prodažu patrabujecca dazvoł brytanskich uładaŭ.

Pavodle mytnych dakumientaŭ Bi-bi-si vyjaviła šeść partyj pradukcyi, vyrablenaj kampanijaj Beck Optronics, ahulnym koštam 2,1 młn dalaraŭ (1,6 młn funtaŭ), jakija trapili ŭ Maskvu praz kampaniju «Rama Hrup» i inšuju kampaniju-pasiarednika, TAA «Šysan».

U śniežni 2023-ha i studzieni 2024 hoda «Rama Hrup» ažyćciaviła dźvie pastaŭki ŭ Maskvu. Atrymalnikam vystupiła raźmieščanaja ŭ Smalensku kampanija Sol Group, jakaja raniej patrapiła pad sankcyi ZŠA.

Niezrazumieła, jakim mižnarodnym maršrutam išli tavary — z dakumientaŭ možna zrabić vysnovu, što niekatoryja z hruzaŭ mahli być adpraŭlenyja ŭ Tajłand.

Jašče čatyry pastaŭki pradukcyi Beck Optronics na sumu 1,5 młn dalaraŭ (1,1 młn funtaŭ) praviała inšaja kampanija z Kyrhyzstana — TAA «Šysan».

Bajhaskina zajaviła žurnalistam, što była zasnavalnikam kampanii, ale pradała jaje ŭ traŭni hetaha hoda. Zajaviŭšy, što kali jana vałodała kampanijaj, «ničoha padobnaha nie pastaŭlałasia», jana paviesiła trubku.

Paźniej pa elektronnaj pošcie jana paviedamiła, što abvinavačvańni zasnavanyja na «iłžyvaj infarmacyi».

Rasśledavańnie pakazała, što ŭ traŭni hetaha hoda Valeryja pradała «Rama Hrup» svajoj lepšaj siabroŭcy Anhielinie Žurenka, jakaja vałodaje firmaj pa prodažy nižniaj bializny ŭ Kazachstanie.

Žurenka skazała žurnalistam: «Handlovaja dziejnaść viadziecca vyklučna ŭ ramkach dziejučaha zakanadaŭstva Kyrhyzstana. Kampanija nie parušaje nijakich zabaronaŭ. Lubaja inšaja infarmacyja źjaŭlajecca iłžyvaj».

U kampanii «Šysan» zajavili, što zajmajucca «pastaŭkami vyklučna cyvilnych tavaraŭ, vyrablenych u azijackich krainach».

Brytanski vytvorca, kampanija Beck Optronic Solutions, jakaja brała ŭdzieł u pracy nad brytanskimi tankami Challenger 2 i źniščalnikami F35, zajaviła žurnalistam, što nie parušała sankcyi, nie mieła spraŭ z Rasijaj ci Kyrhyzstanam i nie viedała pra hetyja pastaŭki.

U kampanii ličać, što častka abstalavańnia naohuł zroblena dzieści jašče, a mytnyja dakumienty mahli być padroblenyja.

Ale hetyja mierkavanyja ekspartnyja pastaŭki — častka značna bolš maštabnaj schiemy, jakaja ŭklučaje ŭ siabie pastaŭki ź niekalkich krynic.

Ź lipienia pa śniežań 2023 hoda «Rama Hrup» ažyćciaviła ahułam 1 756 pastavak u Rasiju. Ź ich 1 355 pryjšłosia na tavary sa śpisu «vysokapryjarytetnych tavaraŭ dla prymianieńnia na poli boju».

Apošnija pastaŭki, uklučajučy elektronnyja kampanienty amierykanskich i brytanskich kampanij, byli zroblenyja dla rasijskaj kampanii «Tytan-mikra», jakaja z traŭnia 2023 hoda znachodzicca pad sankcyjami ZŠA za pracu ŭ rasijskim VPK.

U śviecie viadoma pra rolu Kyrhyzstana va ŭchileńni ad sankcyj, uviedzienych suprać Rasii. 

Pavodle handlovych źviestak, z momantu ŭviadzieńnia sankcyj suprać Rasii ŭ lutym 2022 hoda ekspart Vialikabrytanii ŭ Kyrhyzstan vyras bolš čym na 300%. Ekśpierty padazrajuć, što častka tavaraŭ nasamreč pryznačanaja dla Maskvy.

• 2
• 0
• 0
• 3
• 3
• 0
• 20
• 0