U płanach Rasii — padzialić Ukrainu na try častki. Voś karta z sakretnaha rasijskaha dakumienta

Scenar ukrainskaha budučaha, z punktu hledžańnia Rasii, jaki apisvajecca ŭ sakretnym dakumiencie Ministerstva abarony Rasii, apublikavała sa spasyłkaj na raźviedku Ukrainy ahienctva «Interfaks-Ukraina». 

Pavodle danych ahienctva, Pucin hatovy abmiarkoŭvać z Donaldam Trampam spynieńnie ahniu pry ŭmovie, što Rasija zachavaje za saboj značnyja terytoryi Ukrainy, a sama Ukraina admovicca ad płanaŭ ustupleńnia ŭ NATA.

Pavodle hetaj infarmacyi, Kreml maje namier padzialić Ukrainu na try častki.

Uvieś uschod krainy (Danieckaja, Łuhanskaja, Zaparožskaja i Chiersonskaja vobłaści), a taksama Krym pavinny adyści da Rasii.

Druhuju bujnuju častku krainy (uklučajučy rehijony Kijeva, Sum i Adesy) płanujecca pieratvaryć u «prarasijskaje dziaržaŭnaje ŭtvareńnie». Uładnyja struktury ŭ hetaj zonie buduć ukamplektavany prarasijskimi kadrami, a na jaje terytoryi buduć raźmieščany rasijskija vojski dla kantrolu. To-bok Ukraina pieratvorycca ŭ maryjanietkavuju dziaržavu, jakaja kirujecca z Maskvy.

Astatniaja častka na zachadzie Ukrainy ŭ dakumiencie nazvana «sprečnymi terytoryjami». Što ź imi rabić, miarkujecca vyrašyć u chodzie pierahavoraŭ pamiž Rasijaj i susiednimi krainami — Vienhryjaj, Polščaj i Rumynijaj.

U sakretnym dakumiencie nibyta razhladajucca taksama čatyry scenaryi raźvićcia suśvietnych padziej u bližejšyja hady. Pieršyja dva nazyvajucca «Farmiravańnie šmatpalarnaha śvietu i padzieł viadučymi aktarami śfier upłyvu» (bujnyja dziaržavy dzielać pamiž saboj śfiery ŭpłyvu) i «Rehijanalizacyja / chaatyzacyja» (mižnarodny paradak asłablajecca). U abodvuch scenarach Rasija pieramahaje Ukrainu, a suśvietnaja situacyja składvajecca dla Maskvy «prymalna».

Kali ž vajna budzie zamarožanaja ci Rasija jaje prajhraje, mahčymyja dva inšyja scenary: «Daminavańnie ZŠA i Zachadu» i «Nabyćcio Kitajem statusu viadučaj dziaržavy śvietu». Abodva varyjanty ličacca niespryjalnymi.

U HUR Ukrainy paćvierdzili isnavańnie płana RF pa padziele Ukrainy na try častki. Tam zajaŭlajuć, što Ministerstva abarony i Hienštab Uzbrojenych sił Rasii prykładna ŭ śniežni 2023 hoda padrychtavali płan padziełu terytoryi Ukrainy na try častki. Heta ŭ kamientary ahienctvu «Interfaks-Ukraina» zajaviŭ pradstaŭnik Hałoŭnaha ŭpraŭleńnia raźviedki Ministerstva abarony Ukrainy Vadzim Skibicki.

Kamientaroŭ inšych struktur, u tym liku zachodnich, jakija b paćvierdzili takija płany Kramla, niama.

• 5
• 1
• 5
• 1
• 4
• 1
• 42
• 0