Paŭstancy ŭ Siryi ŭziali Palmiru, šturmujuć Choms, uvajšli ŭ Damask. Dzie Asad — nieviadoma

Krynicy telekanała Al Jazeera śćviardžajuć, što siryjskaja armija pakinuła i svaju najbujniejšuju avijabazu — T-4, raźmieščanuju niepadalok ad Palmiry.

Ciapier paŭstancy padyšli da Chomsa — klučavoha horada, ad jakoha zaležyć suviaź Damaska z uźbiarežžam Mižziemnaha mora. Strata Chomsa, dzie žyvie kala 800 tysiač čałaviek, adreža ŭradavyja siły ad prybiarežnaha rehijonu, dzie raźmieščanyja rasijskija bazy ŭ Tartusie i Chmiejmimie.

Ahienctva Reuters adznačaje, što ŭradavyja vojski ciapier skancentravanyja na abaronie Chomsa, kudy i ściahvajuć siły ź inšych rajonaŭ i vakoł jakoha nanosiać avijaŭdary.

Pavodle danych The New York Times, jakaja spasyłajecca na krynicy siarod iranskich i rehijanalnych čynoŭnikaŭ, pasolstva Irana ŭ Damasku i kiraŭnictva padraździaleńnia Korpusa vartavych iranskaj revalucyi «Al-Kuds», jaki adkazvaje za źniešnija apieracyi, pačali evakuacyju ź Siryi. Hety krok moža śviedčyć pra niazdolnaść Irana praciahvać akazvać Asadu padtrymku, nieabchodnuju dla ŭtrymańnia ŭłady, adznačaje vydańnie.

Na 20:00 pavodle biełaruskaha času byŭ anansavany zvarot da nacyi prezidenta Siryi Bašara Asada, ale ŭ apošni momant jahonaja pres-słužba abvierhła paviedamleńnie, što taki zvarot maje adbycca. Źjaŭlałasia infarmacyja, što nibyta z Damaska ŭ bok krain Piersidskaha zaliva vylataŭ niejki samalot, ale najaŭnaść na jaho borcie Asada — pakul tolki čutki.

Tym časam The Wall Street Journal paviedamiła sa spasyłkaj na siryjskich siłavikoŭ i čynoŭnikaŭ arabskich krain, što žonka Bašara Asada z tryma dziećmi nibyta jašče na minułym tydni vyjechała ŭ Rasiju, a dva ziaci Asada — u Abjadnanyja Arabskija Emiraty.

Bi-bi-si ŭdałosia paćvierdzić sapraŭdnaść videa, na jakim ludzi znosiać biust Chafieza Asada, baćki ciapierašniaha lidara, u pryharadzie Damaska. Na inšych vieryfikavanych videa vidać, jak ludzi zryvajuć vialiki siryjski ściah u Muadamii, raźmieščanaj na poŭdzień ad stalicy. Hetyja videa, jak ličyć vydańnie, mohuć śviedčyć pra poŭny razvał sistemy dziaržaŭnaj biaśpieki ŭ Siryi.

Miž tym Svabodnaja siryjskaja armija — farmavańnie, jakoje padtrymlivajuć ZŠA — uvajšła ŭ pryharad Damaska Irmin. Žychary sustreli jaje bajcoŭ fiejervierkami

SSA była sfarmavanaja siłavikami, jakija pierajšli na bok paŭstancaŭ u 2015 hodzie. 

Inšyja paŭstancy, što nastupajuć z poŭdnia, z rajona Der'a, padyšli da damaskaj turmy ŭ pryharadzie Sachnaja.

Paviedamlajecca taksama, što raniej siońnia SSA pierarezała trasu, jakaja viadzie z Damaska da Chomsa i ŭźbiarežža, dzie znachodziacca rasijskija vajskovyja bazy i žyvuć ałavity, da jakich naležyć kłan Asadaŭ. Paŭstancy vyjšli až na miažu ź Livanam.

U vypadku, kali heta infarmacyja paćvierdzicca, heta budzie aznačać faktyčnaje adrazańnie stalicy Siryi ad Chomsa na poŭnačy, dzie jašče iduć bai, i ad uźbiarežža Łatakii z rasijskimi bazami na zachadzie.

Pavialičyć

• 10
• 0
• 1
• 0
• 1
• 0
• 0
• 0